Prokuroria: “Autorët e krimit s’janë gjallë” Të përndjekurit: Shikoni mediat, Pilo Shanto me librin e “fitoreve” të Sigurimit!

Reforma në Drejtësi mund të prodhojë shumëçka por Drejtësi në Shqipëri kurrë! Këtë e konfirmon dhe rasti i padisë së Të Përndjekurve Antikomunist të cilët ngritën padi kundër krimeve kundër njerëzimit dhe gjenocid në masakrën komuniste, të njohur si “Masakra e Bombës në Ambasadën Sovjetike” dhe Prokuroria e Tiranës u shpreh shkurt: “Autorët e krimit nuk janë më gjallë”!

Ndonëse Shoqata Antikomuniste e të Përndjekurve Politikë të Shqipërisë kishte renditur emrat e atyre që janë shëndosh e mirë, e ca prej tyre jetojnë në shtetet perëndimore, njëri prej tyre përgenjshtroi Prokurorinë dhe konfirmoi se mediat në Shqipëri vazhdojnë të jenë nën kontrollin e Sigurimit të Shtetit.

“Në kallëzimin tonë ne kemi shkruar edhe emra të autorëve të krimit që janë gjallë, njëri prej të cilëve është edhe ish drejtuesi i lartë i Sigurimit të Shteti, Pilo Shanto. Ai ka hartuar listat dhe ka urdhëruar drejpërdrejtë arrestimin e 22 viktimave të këtij krimi dhe shumë të tjerëve që i shpëtuan pushkatimit por u burgosën e internuan. Nga informacionet tona Shanto është i gjallë dhe jeton në SHBA, dhe i kemi kërkuar prokurorisë ta ekstradojë e ta hetojë si një nga autorët kryesorë të krimit gjë qe nuk ka ndodhur deri sot,” thekson Shoqata Antikomuniste e të Përndjekurve Politikë të Shqipërisë duke shtuar:

“Ditët e fundit media po i bën jehonë një libri të tij kushtuar “fitoreve” të Sigurimit të Shtetit ndaj shërbimeve sekrete amerikane e britanike gjatë luftës së ftohtë, të botuar pak ditë më parë duke konfirmuar botërisht qenien gjallë dhe të aftë mendërisht. Mendoj që ky fakt publik e detyron prokurorinë të nis procedurat e ekstradimit dhe arrestimit te tij si autor i krimit, gjë kjo e faktuar me prova shkresore të firmosura prej tij,” thekson Shoqata Antikomuniste e të Përndjekurve Politikë të Shqipërisë përmes një Letre publike sigluar nga kryetari Nebil Çika duke i kërkuar në këto kushte prokurorit Breçani të nis menjëherë procedurat ligjore për vendosjen e tij përpara drejtësisë për krimin e kryer.

Shoqata Antikomuniste e të Përndjekurve Politikë të Shqipërisë

Letër publike: Arrestoni autorin e krimit, Pilo Shanto, z.Prokuror!

Drejtuar: Prokurorit të çështjes z.Bajram Breçani, Prokuroria e Tiranës

Prokurorit të Përgjithshëm z.Olsian Çela

Inspektorit të Lartë të Drejtësisë

Këshilli të Lartë të Prokurorisë

Avokatit të Popullit Znj.Erinda Ballanca

Komisionit të Pavarur të Kualifikimit për Reformën në Drejtësi

Misionit Ndërkombëtar të Monitorimit për Reformën në Drejtësi

Ambasadores së SHBA në Shqipëri SH.T.Znj. Yuri Kim

Ambasadorit të Delegacionit të Bashkimit Evropian në Tiranë, SH.T.Z. Luigi Soreca

Të nderuar zotëri !

Që në datën 18 shkurt 2018, Shoqata Antikomuniste e të Përndjekurve Politike të Shqipërisë, që unë përfaqësoj, dhe familjarët e martirëve, kemi depozituar në Prokurorinë e Krimeve të Rënda në Tiranë një kallëzim penal për krime kundër njerëzimit dhe gjenocid lidhur me masakrën komuniste, të njohur si “Masakra e Bombës në Ambasadën Sovjetike” ku në vitin 1951 në mënyrën më të paligjshme të mundshme, u rrëmbyen nga banesat e tyre në Tiranë dhe u pushkatuan pa gjyq 22 qytetarë të pafajshëm ndërkohë që familjet e tyre u internuan. Që prej asaj dite çështja është ende në prokurori pa përfunduar hetimi .

Nga informacioni jonë hetimi i kësaj çështje është bllokuar për arsye jo ligjore nga akuza shqiptare.

Në Prokurorinë e Krimeve të Rënda, deri sa ajo funksiononte, hetimi as nuk filloi kurrë. Tetë prokurorë të sajë, përfshi edhe Prokurorin e Përgjithshëm aktual z.Olsian Çela, kanë dhënë dorëheqjen pa nis fare hetimin.

Aktualisht kallëzimi i ka kaluar Prokurorisë së Tiranës dhe hetimi i është ngarkuar prokurorit Bajram Breçani. Nga komunikimi jonë, një nga pretendimet e bllokimit të këtij hetimi nga prokuroria është se “autorët e krimit nuk janë më gjallë”, gjë që nuk është e vërtetë.

Në kallëzimin tonë ne kemi shkruar edhe emra të autorëve të krimit që janë gjallë, njëri prej të cilëve është edhe ish drejtuesi i lartë i Sigurimit të Shteti, Pilo Shanto. Ai ka hartuar listat dhe ka urdhëruar drejpërdrejtë arrestimin e 22 viktimave të këtij krimi dhe shumë të tjerëve që i shpëtuan pushkatimit por u burgosën e internuan. Nga informacionet tona Shanto është i gjallë dhe jeton në SHBA, dhe i kemi kërkuar prokurorisë ta ekstradojë e ta hetojë si një nga autorët kryesorë të krimit gjë qe nuk ka ndodhur deri sot.

Ditët e fundit media po i bën jehonë një libri të tij kushtuar “fitoreve” të Sigurimit të Shtetit ndaj shërbimeve sekrete amerikane e britanike gjatë luftës së ftohtë, të botuar pak ditë më parë duke konfirmuar botërisht qenien gjallë dhe të aftë mendërisht. Mendoj që ky fakt publik e detyron prokurorinë të nis procedurat e ekstradimit dhe arrestimit te tij si autor i krimit, gjë kjo e faktuar me prova shkresore të firmosura prej tij.

Prandaj, në këto kushte i kërkojmë prokurorit Breçani të nis menjëherë procedurat ligjore për vendosjen e tij përpara drejtësisë për krimin e kryer .

I kërkojmë institucioneve të tjera që u drejtohemi me këtë letër publike të ndërmarrin çdo akt të zbatimit të ligjit që detyron hetimin dhe dënimin e krimeve kundër njerëzimit dhe gjenocidit, sipas ligjit shqiptar dhe konventave ndërkombëtare.

I kërkojmë në mënyrë të veçantë Ambasadores së SHBA, Shkëlqesisë se sajë Znj. Yuri Kim të bëjë çdo përpjekje diplomatike që ky autor i krimeve kundër njerëzimit dhe gjenocidit që jeton në Shtetet e Bashkuara të kthehet në Shqipëri dhe të vihet para drejtësisë për krimet e kryera.

Duke përfituar nga rasti përsërit Shkëlqesisë së Sajë kërkesën time të vazhdueshme që SHBA të mos strehojë e përkrah autorët shqiptarë të krimeve të komunizmit, krimeve kundër njerizimit dhe gjenocidit.

Si përfundim dua të theksoj se bërja gjallë publikisht e autorit të masakrës se Bombës në Ambasadën Sovjetike i heq akuzës shqiptare çdo mundësi për të justifikuar mos hetimin dhe ndëshkimin e këtij krimi të komunizmit .

Mbetemi në pritje të veprimeve konkrete ligjore nga prokuroria. Çdo justifikim apo zvarritje, si deri më tani, do të konsiderohet nga ne si shpërdorim detyre dhe përpjekje për të përkrahur autorët e krimeve te komunizmit , gjenocid dhe krime kundër njerëzimit .

Kryetari

Nebil Çika