Erdogan konfirmon bisedimet me talibanët

Disa orë pas sulmeve vetëvrasëse jashtë Aeroportit të Kabulit ku mbetën të vrarë mbi 90 persona, Presidenti i Turqisë, Recep Tayyip Erdogan, tha se vendi i tij ka mbajtur bisedimet e para me talibanët në Kabul dhe shtoi se Ankaraja është duke vlerësuar ofertën e grupit islamik për të operuar me Aeroportin e Kabulit.

Erdogan tha se bisedimet janë zhvilluar në një njësi ushtarake të Aeroportit të Kabulit, ku përkohësisht është vendosur Ambasada turke, raporton RFE.

“Kemi mbajtur bisedimet e para me talibanët, të cilat kanë zgjatur tri orë e gjysmë. Nëse është e nevojshme, do të kemi mundësi për të zhvilluar bisedime të tjera”, tha Erdogan ndërsa iu përgjigj kritikave të brendshme për angazhimin e Turqisë me grupin kryengritës, shtoi se Ankaraja nuk e ka luksin të qëndrojë duarkryq në rajonin e paqëndrueshëm.“Ju nuk mund ta dini se cilat janë pritjet e tyre ose cilat janë pritjet tona pa biseduar”, tha Erdogan.

Turqia ka planifikuar të ndihmojë në sigurimin dhe drejtimin e aeroportit të Kabulit, por të mërkurën ajo filloi të tërheqë trupat e saj nga Afganistani.

Erdogan tha se talibanët tani duan të mbikëqyrin sigurinë në aeroport, ndërsa Ankarasë i kanë ofruar mundësinë për të drejtuar logjistikën e tij.

Erdogan tha se sulmet vetëvrasëse që ndodhën një ditë më herët në aeroportin e Kabulit, kanë bërë që Turqia të kërkojë më shumë detaje se si do të sigurohet qendra ajrore.

Ndryshe, Presidenti i Shteteve të Bashkuara, Joe Biden, u zotua se do të hakmerret kundër grupit militant Shteti Islamik, pasi sulmet e tij vetëvrasëse jashtë aeroportit të Kabulit vranë së paku 13 ushtarë amerikanë dhe dhjetëra afganë. Ministria e Shëndetit Publik e Afganistanit tha se mbi 90 vetë u vranë në sulmet e së enjtes, sulem të cilat ndodhën vetëm pak ditë para afatit të 31 gushtit për tërheqjen e trupave të huaja nga Afganistani.