Tensionet në Veri, Presidentja e Kosovës flet me Sekretarin e NATO-s
Presidentja e Kosovës, Vjosa Osmani në takim me Sekretarin e Përgjithshëm të NATO-s, Jens Stoltenberg u shpreh se synimi themelor i Kosovës mbetet anëtarësimi sa më i shpejtë në NATO, anëtarësim ky i rëndësishëm për ta siguruar paqen në rajon si dhe promovimin dhe mbrojtjen e vlerave të përbashkëta.
“Qëllimi ynë është të bëhemi pjesë e infrastrukturës globale të sigurisë, duke kontribuar për paqen. Forca e Sigurisë e Kosovës, është forcë profesionale, e përgatitur në përputhje me standardet e NATO-s, e cila do t’i mundësojë Kosovës të bëhet forcë aktive në kuadrin e sigurisë rajonale dhe globale,” tha Vjosa Osmani duke theksuar përkushtimin e Kosovës për të hapur një kapitull të ri të bashkëpunimit me NATO-n, i cili nënkupton përfshirjen e Kosovës në Partneritetin për Paqe ndërsa shtoi:
“Ne jemi krenarë që ushtarët tanë po marrin pjesë së bashku me ushtarët e Forcave të Armatosura të SHBA-së në një mision të përbashkët ushtarak në Kuvajt. Ky mision, i pari i këtij lloji për Kosovën, është dëshmi e gatishmërisë sonë për të kontribuar në paqen dhe sigurinë globale.”
Me këtë rast, Presidentja Osmani e informoi Sekretarin e Përgjithshëm të NATO-s edhe për zhvillimet e fundit në dialogun me Serbinë duke saktësuar se Republika e Kosovës i ka zbatuar marrëveshjet e Brukselit për lirinë e lëvizjes dhe i dënoi kërcënimet dhe veprimet e Serbisë dhe të strukturave ilegale të saj në Kosovë.
Jens Stoltenberg, e falënderoi Kosovën për strehimin e përkohshëm të refugjatëve afganë bashkëpunëtorë të NATO-s si dhe vlerësoi veprimin e saj si shembull të bashkëpunimit dhe të koordinimit me aleatët.
Presidentja Vjosa Osmani tha se vendimi i Kosovës ishte në përputhje me orientimin gjeostrategjik dhe reflektimin e vlerave të përbashkëta të të drejtave të njeriut ndërsa siguroi kreun e NATO-s se Kosova është e gatshme që edhe në të ardhmen të kontribuojë në misione të ngjashme humanitare dhe ato të sigurisë.
Në takim me Sekretarin e Përgjithshëm të NATO-s, Jens Stoltenberg, Presidentja e Kosovës, Vjosa Osmani ishte e shoqëruar nga ministrja e Jashtme, Donika Gërvalla.
