“Komisionet online”, PS: Dakord për mbledhje tradicionale! PD: S’është betejë e fituar!

Pas shumë përplasjeve ku opozita refuzoi mbajtjen e Komisioneve Parlamentare online, sot mazhoranca u shpreh se do ti drejtohet Konferencës së Kryetarëve me kërkesën që Komisionet të zhvillohen në mënyrë tradicionale. Kryetari i Grupit Parlamentar të PS, Taulant Balla tha se do i propozojnë Konferencës që Komisionet ë zhvillohen me deputetë prezentë në sallë, por duke ruajtur distancat, në kundër të masave Anticovid si dhe çertifikatë vaksinimi apo test negativ Anticovid.

Partia Demokratike e mirëpriti këtë reflektim për të zbatuar ligjin dhe rregulloren nga drejtuesit e Partisë Socialiste, dhe nuk e konsideron betejë të fituar.

“Do i proppzojmë konferencës së kryetarëve që mbledhjet të zhvillohen duke respektuar distancat deputetët të deklarojnë certifikatën e vaksinimit. Edhe në parlamentin italian nuk merr pjesë në mbledhje komisioni pa bërë vaksinën. Koha e fituar gjatë kësaj jave, ishte një kohë për shkak se agjenda parlamentare ishte e tillë që të kërkonte mirëkuptim nga ana e Partisë Demokratike. Hallet deri në shtëpi, i shtyjnë që të krijojnë problematika të panevojshme. Praktika e mbledhjeve të komisioneve online do të vijojë, për aq kohë sa bëhet fjalë për çështje që nuk janë të rëndësie të veçantë, por për çështje me debat të zgjeruar, kjo do të vazhdojë. Do i bëja thirrje shpirtrave të trazuar në PD, se kjo çështje është e qartë,” tha Taulant Balla duke i bërë thirrje deputetëve që të vaksinohen.

“Prej javës tjetër, konferenca e kryetarëve do i japi dritën jeshile kalimit të një mënyre tradicionale zhvillimit të komisionit. Nga çfarë është diskutuar, kemi rënë dakord, në kuptimin e atij komunikimi që pjesëmarrja duhet të jetë me certifikate vaksinimi, ka raste kur mjekët nuk rekomandojnë vaksinimin, por duhet të jesh i pajisur me një test PCR, rregull ky normal kur udhëton me avion dhe udhëton në një vend të Evropës. Do i lutesha opozitës të mos harxhojnë kohë me këtë çështje dhe të vijojnë punën normale. Jam informuar në rastin e tre komisioneve që ka kërkesa nga opozita, nga përfaqësues të këshillit të ministrave,” tha Kryetari i Grupit Parlamentar të PS, Taulant Balla, duke përfunduar:

“Dëshira jonë është që kjo legjislaturë e re të fillojë punë mbarë dhe natyrshëm ajo historia e tjerrur dje se ne paskemi frikë nga debati, këto historira do kërkoja t’i linim mbrapa e të ecnim përpara me detyra shumë të rëndësishme që ka parlamenti. Të mos harrojmë rolin që ka Kuvendi.”

Pas deklaratës së Kryetarit të Grupit Parlamentar të PS, Taulant Balla lidhur me mbledhjet e komisioneve parlamentare, Kryetari i Grupit Parlamentar të PD, Alfred Rusha tha se nuk e konsideron fitore.

“Më vjen mirë që pati një kthesë në ligjshmëri dhe reflektim për të zbatuar ligjin dhe rregulloren nga drejtuesit e Partisë Socialiste,” tha Alfred Rushaj duke shtuar se ishte një kërkesë e deputetëve të PD, që të kryhej vaksinimi i anëtarëve të Parlamentit, dhe në mbledhjen e ardhshme të Kryesisë së Kryetarëve do të mësohet se si do të zhvillohen sesionet e komisioneve në vazhdim.

“Nuk e konsideroj si betejë të fituar. Ata kanë rënë dakord që të zbatojnë ligjin. Është kaq e thjeshtë dhe nuk do të doja që të drejtën që qytetarët shqiptarë kanë në bazë të rregullores dhe Kushtetutës për transparencë, për të dëgjuar përfaqësuesit e tyre politikë në Kuvend teksa diskutojnë për projektligje, për nismat që do të prekin jetën e tyre, të quhet si fitore,” tha Rushaj duke përfunduar:

“Përkundrazi, është diçka që drejtuesit e PS duhet ta bënin që në fillim dhe të mos futeshin fare këtij debati.”