Reagimi, Kurti: Kontrabandën do ta luftojmë e do ta parandalojmë!

Pas situatës së krijuar dhe tensioneve në veri të Mitrovicës ka reaguar edhe Kryeministri i Kosovës, Albin Kurti, duke theksuar se aksioni i Policisë është zhvilluar kundër krimit e kontrabandës në Prishtinë, Pejë dhe në veri e jug të Mitrovicës.

“Krimi dhe grupet kriminale nuk do të tolerohen dhe do të luftohen. Kontrabandën do ta luftojmë e do ta parandalojmë. Aksioni i sotëm policor ka përfunduar. U bëj thirrje qytetarëve në komunën veriore të Mitrovicës që të mos bien pre e disa medieve në Serbi që e mbrojnë krimin, korrupsionin dhe kontrabandën dhe duan ta politizojnë dhe etnizojnë atë,” thekson Albin Kurti në reagimin e tij përmes rrjetit social Facebook duke saktësuar se veprimet policore janë paraprirë nga hetimet intensive dhe janë me urdhër e të bashkërenduara me prokuroritë dhe gjykatat kompetente.

Dhe ndonëse Albin Kurti e quajti të mbyllur aksionin, reagoi Përfaqësues i Lartë për Politikë të Jashtme dhe Siguri pranë BE, Josep Borrel duke theksuar se incidentet e dhunshme në veri duhet të ndalen menjëherë ndërsa përdori fjalorin e Vuçiçit për veprime të njëanshme dhe të pakoordinuara se janë të papranueshme.

“Incidentet e dhunshme në veri të Kosovës duhet të ndalen menjëherë. Aksionet e njëanshme dhe të pakoordinuara që rrezikojnë stabilitetin janë të papranueshme. Të gjitha çështjet e hapura duhet të adresohen përmes Dialogut të lehtësuar nga BE. Ne jemi në kontakt me Beogradin dhe Prishtinën,” shprehet Borrel në reagimin e tij përmes rrjetit social “Twitter” duke i dhënë një sugjerim të frikshëm Kryeministrit të Kosovës, që në rastin e sotëm e tutje ai duhej të koordinoj aksionet me kontrabandistët që vazhdojnë tregtinë e paligjshme me mallin pa TVSH nga Serbia në veri të Kosovës që nga ardhja në pushtet e Aleksandar Vuçiçit!

Reagimi i plotë:

Aksion i Policisë kundër krimit e kontrabandës në Prishtinë, Pejë dhe në veri e jug të Mitrovicës

Herët në mëngjesin e sotëm, Policia e Kosovës, me qëllim të luftimit të kontrabandës ka filluar operacione bastisjeje në disa lokacione të ndryshme në Prishtinë, Pejë e Mitrovicë (si në jug ashtu edhe në veri).

Këto veprime policore janë paraprirë nga hetimet intensive dhe janë me urdhër e të bashkërenduara me prokuroritë dhe gjykatat kompetente. Janë sekuestruar mallra e dëshmi të tjera që paraqesin edhe prova materiale.

Krimi dhe grupet kriminale nuk do të tolerohen dhe do të luftohen. Kontrabandën do ta luftojmë e do ta parandalojmë.

Aksioni i sotëm policor ka përfunduar. U bëj thirrje qytetarëve në komunën veriore të Mitrovicës që të mos bien pre e disa medieve në Serbi që e mbrojnë krimin, korrupsionin dhe kontrabandën dhe duan ta politizojnë dhe etnizojnë atë.