Gjermania duhet të ruhet edhe nga një mallkim historik

Një fantazmë e vërtetë, që shfaqet sa herë luhet Kore e Jugut-Gjermani. Gjermanët duhet të ruhen edhe nga një mallkim historik i Botërorit.

Në të vërtetë, askush në Gjermani nuk ka qenë i kënaqur që skuadra luan në Grupin F. Jo për shkak të kundërshtarëve (Meksikë, Suedi dhe Kore e Jugut), të cilët kanë rezultuar më të vështirë nga sa mendohej, por për shkak të historisë. Asnjë skuadër që ka qenë në Grupin F, në historinë e Kupës së Botës, nuk ka arritur ta fitojë trofeun.

Një grup i tillë në Botëror ekziston që nga 1986-a. Atë vit ka qenë Anglia që ka luajtur në Grupin F. Ata u eliminuan nga “Dora e Zotit”. Edhe në 1990-ën, Anglia ka luajtur në të njëjtin grup dhe është eliminuar në gjysmëfinale. Në 1994-ën i ka takuar Holandës (jashtë në çerekfinale), përsëri Anglia në 2002-in (doli mes 8 më të mirave), Brazili në 2006-ën (jashtë në çerekfinale). Ky mallkim ka goditur Italinë në 2010-ën, e eliminuar në fazën me grupe. Argjentina ka patur mundësinë t’i jap fund kësaj statistike në 2014-ën, por u mund në finale.

Gjithashtu, gjermanët nuk kanë kujtime të mira në Botëror kundër Koresë. Edhe pse kanë fituar gjithmonë, ato takime janë shoqëruar me episode të pakënaqshme.

Në 1994-ën, Gjermania fitoi 3-2 në ndeshjen e fundit të grupit, por Effenberg, i zëvendësuar gjatë ndeshjes, i tregoi gishtin e mesit tifozëve dhe u pezulluar nga federata, duke i dhënë fund karrierës me kombëtaren.

Në gjysmëfinalen e 2002-it, Gjermania fitoi përsëri, por Ballack shkaktoi një faull për të ndaluar një aksion të rrezikshëm të koreanëve dhe u ndëshkuar me karton të verdhë, duke humbur finalen kundër Brazilit.

Në fund vjen Shin Tae-Yong, trajneri i Koresë së Jugut, që kopjon Low në gjithçka: të njëjtat këmisha, të njëjtat pantallona, të njëjtin model flokësh (edhe ngjyrën). Edhe byzylyku dhe ora janë të njëjtë.