Qeveria me Mekanizëm për Dokumentimin e Krimeve të kryera gjatë luftës në Kosovë

Qeveria e Kosovës ka miratuar koncept-dokumentin për themelimin e Mekanizmit për Dokumentimin e Krimeve të kryera gjatë luftës. Kryeministri Albin Kurti tha me këtë rast se dokumentimi do t’i shërbejë edhe edukimit dhe ngritjes së vetëdijes që vendi të mos shohë kurrë më krime.

“Kanë kaluar 22  vite pas luftës dhe adresimi i krimeve është shumë larg, ne nuk mund ta zhbëjmë kohën, por duhet ta bëjmë më të mirën. Krimet do të trajtohen nga mekanizmi, koncept-dokumenti që po e shqyrtojmë ka për qëllim themelimin e mekanizmit për dokumentimin e krimeve,” tha Albin Kurti duke shtuar:

“Dokumentimi i krimeve do t’i shërbejë ngritjes së vetëdijes që vendi jonë dhe rajoni mos të shoh më. Ky është momenti për të mbrojtur kujtesën kolektive për gjeneratat pas nesh.”

Qëllimi i mekanizmit, sipas ministres së Drejtësisë, Albulena Haxhiu, është që krimet të mblidhen, verifikohen, sistemohen, të ruhen dhe të jenë të asksesueshme.

 “Qëllimi i krijimit është që krimet që kanë ndodhë të mblidhen, të verifikohen dhe të jenë të qasshme për viktimat, për shoqërinë dhe pastaj për institucionet e drejtësisë.”