Në HEC-et e Gener 2 në Valbonë ndërpritet puna, KE: Të zbatohen vendimet gjyqësore!
Duke reaguar në letrën e drejtuar nga Shoqata TOKA lidhur me situatën e krijuar me HEC-et e “Gener 2” në Valbonë, Komisioni Europian thekson se i rëndësishëm është zbatimi i shpejtë i vendimeve gjyqësore të detyrueshme.
“Jemi të vetëdijshëm për zhvillimet e fundit në lidhje me HEC-et në Luginën e Valbonës. Theksojmë rëndësinë e një procesi gjyqësor të drejtë për çështjen, i rëndësishëm është zbatimi i shpejtë i vendimeve gjyqësore të detyrueshme. Kemi ngritur shpesh nevojën për respekt të standarteve mjedisore. Komisioni e ka nënvizuar më tej këtë çështje në Raportin e tij Vjetor 2021 për Shqipërinë,” thekson Komisioni Europian në përgjigjen drejtuar Shoqatës Toka duke shtuar se investimet në hidrocentrale duhet të bëhen në mënyrë rigoroze, në përputhje me mbrojtjen e mjedisit ndërsa përfundon:
“Duhet zbatimi i shpejtë i vendimeve gjyqësore të detyrueshme, është një parim kyç i shtetit të së drejtës. Në dialogun tonë politik me autoritetet shqiptare, veçanërisht në kuadrin e Marrëveshjes së Stabilizim Asociimit BE-Shqipëri, ne kemi ngritur shpeshherë nevojën për të respektuar standardet mjedisore.”
Ndryshe, Gjykata e Lartë që ka vendosur që të pezullohet puna në HEC-et e “Gener 2” në Valbonë. Dje, me ndërhyrjen e zyrës së përmbarimit dhe policisë së Tropojës, u konstatua se puna në HEC-e ka ndalur, ndërkohë Shoqata “Toka” duke konstatuar se dëmi i bërë në natyrë është i konsiderueshëm e bënë të qartë se kompania do të ndjeket penalisht sikur vetëm pesë minuta të hap çelësin.
