Buxheti 2022/ Prezantimi, Rama: Plani për të jetësuar vizionin “Shqipëria 2030”!

Buxheti 2022 është dëshmi e një arritjeje domethënëse të këtyre dy viteve të vështira tha Kryeministri Edi Rama duke prezantuar sot Projektbuxhetin në Parlamentin e Shqipërisë pa pasur turp jo nga ata të bashkëqeverisjes që kishte përballë por nga ata pak qytetarë që po e ndjekin këtë debat i cili pritet të përfundoj me miratimin e buxhetit.

Dhe, për të konfirmuar delirin në të cilin ka ra pas fitores së mandatit të tretë, ai u shpreh sot nga foltorja e parlamentit se ky buxhet është kapitulli i parë i planit për të jetësuar vizionin “Shqipëria 2030”.

“Ky është buxheti i parë i mandatit tonë të tretë dhe kapitulli i parë i planit për të jetësuar vizionin ‘Shqipëria 2030’. Është një buxhet i ndërmjetëm mes fazës së imponuar të emergjencës së shkaktuar nga dy fatkeqësi të mëdha natyrore dhe fazës së re të adresimit të ambicies për arritjen e një niveli të ri zhvillimi në dekadën që kemi hyrë. Skema e këtij buxheti është dëshmi e një arritjeje domethënëse të këtyre dy viteve tejet të vështira.

Për të mbetur ambiciozë për të nesërmen gjatë kurimit të dy plagëve të rënda të së sotmes. Siç flet qartë dhe ky buxhet asnjë sektor, aspo reformë nuk është lënë pas dore dhe me këtë buxhet të ndërmjetëm pavarësisht dhe krizës së energjisë rrisim financimin për të mbështetur njerëzit, kategoritë më në nevojë, forcat e punës, fëmijët, nxënësit, të rinjtë, shërbime publike. injektojmë financime të konsiderueshme,” tha Edi Rama duke shtuar se do rrisin pagat me një bonus të posaçëm deri në 150% për punonjësit e policisë që punojnë larg vendbanimit.

“Nuk rrisim asnjë taksë për asnjë kategori. Dyfishojmë ndihmën ekonomike për rreth 15 mijë familje që kanë 3 a më shumë fëmijë deri në 18 vjeç. Ligjërojmë me këtë buxhet pagën prej 30 mijë lekësh të reja në muaj për naftëtarët e Fierit për gjithë vitin 2022 ndërkohë që kërkojmë një zgjidhje. 26 mln dollarë indeksimi i mëtejshëm i pensioneve, si dhe 36 mln dollarë bonusi i fundvitit.

Financojmë rimbursimin e barnave për mbi 400 mijë qytetarë me 111 mln dollarë. 27 mln dollarë për vaksinimin. Për herë të parë fillojmë dhe me programet kombëtare të arteve dhe të zejeve, teknologjia, sportet për fëmijët dhe nxënësit me një financim të posaçëm në buxhetin e shtetit.”

Me këtë rast, Kryeministri tha se sektor më sektor, duke nisur nga reforma në drejtësi, financohet 84 mln dollarë.

“Jemi në një fazë të rëndësishme të reformës në drejtësi, ku vijon nga njëra anë pastrimi i llumit që s’ka të mbaruar dhe nga ana tjetër ngritja e institucioneve të reja të drejtësisë. Për të gjithë ata që me të drejtë presin më shumë rezultate dhe më shpejt, dua të them se duhet dhe më shumë durim,” tha Edi Rama ndërsa u mburrë edhe nga foltorja e parlamentit për një revolucion dixhital në shërbim të qytetarit, sipërmarrjes, zhvillimit ekonomik, luftës kundër krimit e korrupsionit që me buxhetin e 2022 merr një shtysë të re.

“Ishte lajm sot në mediat italiane, vajtja e Presidentit të Italisë për të tërhequr certifikatën online dhe ndërkohë debati sot po ashtu ishte lidhur me faktin që shërbime të ndryshme nuk mund të ofrohen për shkak të mossigurimit të ndërpverpimit të bazave të të dhënave. Për ne kjo është histori. Jo më certifikatat janë online, por me 31 dhjetorin e këtij viti mbyllen online të gjitha shërbimet publike të dokumenteve që nuk kanë nevojë për praninë fizike.

Ndërkohë hyjmë në fazën e mbylljes së ciklit jo vetëm për aplikimet online dhe për një pjesë të shërbimeve që mbyllen edhe me dhënien e dokumentacionit online me vulë elektronike, por për të gjitha shërbimet. Platforma e bashkëqeverisjes ka kaluar në kuvend dhe është ligj, sot duke e çuar në një nivel tjetër gjithë rrjetin tradicional të komunikimit të institucioneve me qytetarët se ka shumë konfuzion dhe teori, por thelbi është që çdo shtet kanë tradicionalisht disa prej shekujsh, disa prej dekadash, zyrat e marrëdhënieve me publikun, me qytetarët, të cilat janë zyra që në pjesën më të madhe funksionojnë me letra. Platforma i ka çuar këto marrëdhënie në nivelin e ndërveprimit online, duke siguruar dhe një monitorim dhe një kontroll mbi administratën dhe duke garantuar një bazë mbi të cilën edhe njësia antikorrupsion e Ministrisë së Drejtësisë ka hyrë tanimë në një fazë të re. Ajo çka ne do të garantojmë në vijim dhe është ambicia e këtij mandati është që të sigurohet jo vetëm mbyllja përfundimtare e të gjitha sporteleve në RSH, që ofrojnë shërbime me radha dhe kontakte të drejtpërdrejt me punonjësit e administratës që pastaj rezultojnë shpesh herë në marrëdhënie ku futet ryshfeti, por edhe për të garantuar që përfundimisht qytetari të bëjë kërkesën dhe i gjithë dokumentacioni mbështetës që duhet për të marrë një shërbim të garantohet brenda përbrenda sistemit të dixhitalizuar të shtetit dhe të mos ketë më qytetarë që të shkojë në 17 dyer të tjera për të bërë gati dosjen,” tha Rama duke vazhduar prezantimin e Buxhetit 2022 me listën e dëshirave ndërsa foli për sektorët ku do të investohet më tepër.

“Kadastra digjitale është në proces të avancuar, e dimë shumë mirë se çfarë plage është në marrëdhënien mes shtetit dhe qytetarit çështja e marrjes së pronësisë. Me digjitalizimin edhe kadastra do të jetë një institucion i aseksueshëm përmes kompjuterit dhe do të japë të gjitha dokumentet e pronësisë bazuar në vulat elektronike. Mbrojtja e territorit hyn në një fazë tjetër, falë buxhetit të vitit 2022 falë satelitëve dhe dronëve inteligjentë. Ku do të na japë të dhëna për të gjitha krimet e mjedisit në territor, te ndërtimet pa leje, e deri në aspekte që kanë të bëjnë me bujqësinë, energjinë, me lumenjtë, zjarret dhe pa lënë mënjane luftën kundër krimit në sensin e një potenciali komplet tjetër të identifikimit dhe elementëve kriminal.

Qendra digjitale e qarkullimit rrugor është në proces. Jemi sot në kushtet ku kemi gati njërën pjesë dhe tani duhet të kalojmë në pjesën tjetër që është shtrirja e kamerave inteligjente për të monitoruar qarkullimin, duke hequr nga rrugët policinë dhe patrullat, trarët apo kontrollet në rrugë. Mbrojtja kibernetike do të futet në prioritetet tona dhe do të financohet në mënyrë të posaçme duke krijuar një qendër të mbrojtjes kibernetike të të gjitha sistemeve tona të komunikimit. Edukimi teknologjik i fëmijëve i të rriturve përbëjnë një paketë që shton plus 6.5 mln dollarë nga çfarë kishim në dispozicion këtë vit lidhur me teknologjinë. Me fondet e të tretëve kjo shifër do të arrijë në 100 mln dollarë në vitin 2022,” tha Kryeministri duke vlerësuar rolin e ri të Ministrisë së Mbrojtjes që do të kthehet në qendër të re graviteti për Shqipërinë digjitale.

Më tutje shëndetësia, arsimi dhe mjedisi.

“Buxheti i Shëndetësisë shkon në 91.3 mld, që përbën 4.89 të prodhimit të përgjithshëm kombëtar. Buxheti për shëndetësinë financon 3.6% të prodhimit të brendshëm. Sa i përket arsimit janë disa hapa të rinj që hidhen dhe financohen nga buxheti, përfshirja e gjuhës angleze në klasën e parë. Futja e mësimit të teknologjisë digjitale në ciklin e ulët dhe një riorientim kurrikuluar drejt shkencës, teknologjisë, matematikës i lidhur me këtë përfshirje me rrugën e edukimit digjital të më të vegjëlve. Për laboratërot e shkollave dhe mësimin e informatikës, janë 1.9 mld ose 19 mln dollarë. Do të ketë një rëndësi të veçantë për artin dhe zejet, ku përfshihet edhe teknologjia. Programet po detajohen dhe qysh për vitin e ardhshëm shkollor do të jenë të shtrirë në të gjitha shkollat. Disa hapa do të bëhen në muajt e parë të viteve të ardhshme. Për universitetet është e vetmja rrugë ndërkombëtarizimi. Kemi një tryezë të përbashkët të qeverisë me rektorët e universiteteve.

Po shikojmë zhvillime inkurajuese. Nga buxheti për vitin e ardhshëm janë akorduar 7 mln dollarë në nxitje të ndërkombëtarizimit për ato universitete që do të ecin më shpejt për të krijuar raporte me universitete ndërkombëtare që shkojnë në programe e diploma të përbashkëta. Është proces që do të kërkojë kohë, por jam i sigurt që do t’ia dalim, pavarësisht ecurisë së integrimit në BE që diktohet nga faktorë të jashtëm që s’kanë të bëjnë me ne. Një tjetër hap është pastërtia. Ajo e qyteteve, e plazheve, e trashëgimisë kulturore. Këtu do të hyjmë me një buxhet të përshtatshëm. Dua të ritheksoj sot, se pushteti vendor duhet të marri mesazhin që pastërtia dhe garantimi i pastrimit në të gjithë perimetrin e tyre është një kriter i pa tjetërsueshëm i përcaktimit të masës për pushtetin vendor. Siç kemi vendosur një fond për të mbështetur ato që performojnë si duhet. Do të marrin masa financiare dhe masa drastike administrative ato që performojnë dobët. Asnjë buxhet bashkiak që nuk do të ketë të garantuar buxhetin e bashkimit,” tha Edi Rama ndërsa fermerët vazhdojnë me protesta ao foli për arritje dhe investimet.

“Vijmë te bujqësia, mendoj që buxheti i vitit 2022 është kuptimplotë në këtë drejtim pavarësisht disa shprehjeve të pakënaqësisë dhe shprehjeve për të kuptuar se kemi të bëjmë me një qasje dhe asgjë tjetër. Dua t’ju them një gjë, atyre që ankohen për riorientimin e TVSH-së, se e gjitha ajo shumë që faktikisht hiqej nga buxheti i shtetit në formën e uljes së TVSH-së është dyfishuar dhe rivënë në shërbim të bujqësisë. Kemi rritur fonde. Në një sektor i cili ka një masë që shkon në afro 350 mln, llogariteni se çfarë efekti ka një masë prej 7-8 milionësh. Një masë që është hequr nga buxheti i shtetit dhe sot me buxhetin e ri dyfishohet duke iu shtuar fondeve të financimit të drejtpërdrejt, për të vazhduar të krijojmë modele. Janë disa shifra të nxjerra nga librat e shtetit. Kemi, si 9 mujor 323 % më shumë eksporte se në 9 mujorin e 2020. Me buxhetin e vitit 2022, shkojnë në 12.7 mld për mbështetje.”