PD e akuzoi për korrupsion, sot Edi Rama e emëroi Afrim Qendron, Prefekt të Tiranës!
Partia Demokratike e akuzoi për projektin të Unazës së Madhe të Tiranës kur ai ishte në krye të Autoritetit Rrugor Shqiptar, por sot Afrim Qendro u emërua Prefekt i Tiranës.
Vendimi është marrë sot nga Këshilli i Ministrave dhe të gjithë heshtin.
Tre vjet më parë Partia Demokratike ka akuzuar bashkinë e Tiranës dhe ARRSH se projekti për Unazën e Madhe të Tiranës është korruptiv dhe se njëra nga kompanitë fituese është kompani guackë, akuza të cilave Drejtori i ARRSH, Afrim Qendro iu përgjigj duke akuzuar Kryetarin e PD, Lulzim Basha, për çmimin e ndërtimit të asaj pjese të Unazës kur ai ishte në krye të Bashkisë Tiranë. Por, pavarësisht këtij spektakli të Qendros ai u ftua në Prokurori.
Dhe, një vit më pas, ndonëse Ish-Ministri i Energjisë dhe Infrastrukturës, Damian Gjiknuri, e kishte pranuar se kompania fituese në lotin e parë të projektit të “Unazës së Madhe” ka falsifikuar dokumentet dhe kjo është dokumentuar edhe nga autoritetet amerikane, madje duke saktësuar se DH Albania ka falsifikuar dokumente jashtë territorit të Shqipërisë, në lidhje me këtë çështje, Afrim Qendro, Ish-Drejtor i ARRSH-së, është thirrur në prokurori duke mohuar çdo akuzë.
Ndryshe, Prefekt i Tiranës ishte Toni Gogu, i cili tashmë është zgjedhur deputet i Partisë Socialiste.
