Vjosa Osmani: Ballkani i Hapur shfaq ekspansion të hegjemonisë serbe

Presidentja e Kosovës, Vjosa Osmani, pas takimit me Presidentin e Sllovenisë, Borut Pahor, tha qartë se Ballkani i Hapur është iniciativë vetëm për të shfaqur ekspansion të hegjemonisë serbe ndërsa ka kërkuar nga Bashkimi Evropian të reagojë ndaj retorikës destabilizuese të Serbisë në Ballkanin Perëndimor.

Vjosa Osmani me këtë rast ka akuzuar Serbinë se nuk është e interesuar të arrijë marrëveshje finale me njohje reciproke me Kosovën, derisa nënvizoi se Asociacion me kompetenca ekzekutive nuk do të ketë në Kosovë.

“Republika e Kosovës gjithnjë ka qenë pala konstruktive në këtë proces, por përshtypja jonë është që Serbia nuk është e interesuar të arrijë një marrëveshje ligjërisht të obligueshme me Kosovën. Në këtë proces po e përsëris, ashtu siç është përmendur edhe nga presidenti Biden edhe shumë miqtë tanë në botë, njohja reciproke është ajo që duhet të jetë në qendër të këtij procesi. Për fat të keq, fqinji jonë verior nuk e dëshiron një Ballkan Perëndimor stabil dhe në paqe, prandaj po përdorë retorik dhe veprime të ndryshme që po e destabilizojnë rajonin tonë. Për këtë shpresojmë që BE-ja do të jetë e qartë në raport me Serbinë dhe do të kërkojë të ndërprenë edhe retorikën nxitëse, por edhe veprimet destabilizuese, jo vetëm në raport me Kosovën, por edhe me Malin e Zi, Bosnjës dhe shtetet tjera. Për fat të keq Serbia po vazhdon përmes strukturave ilegale në veri të vendit tonë të destabilizojë Kosovën, po ashtu rritja e ndikimit rus paraqet një kërcënim për destabilizim të mëtejmë të rajonit,” tha Presidentja e Kosovës duke shtuar se Serbia nuk zbatuar dy të tretën e marrëveshjeve të nënshkruara me Kosovën ndërsa kundërshtoi Asociacionin e komunave me shumicë serbe.

“Gjykata Kushtetuese e ka thënë qartë se është në mos përputhje me Kushtetutën dhe ka shkelje të Kushtetutës dhe Asociacioni nuk është i lejueshëm të ketë të drejta ekzekutive,” tha Vjosa Osmani ndërsa për iniciativën rajonale Ballkani i Hapur, tha se Kosova është kundër, pasi ka shqetësime serioze për këtë nismë.

“Për ne Ballkani i Hapur është një hapësirë për ekspansion të hegjemonisë serbe. Në këtë moment, Serbia që po tenton të luaj rolin kryesor në këtë iniciativë nuk ka qëllime të mira në raport me rajonin tonë. Do të ishte krejtësisht ndryshe, sikur Serbia të ishte shtet që ka paqen, stabilitetin si synim dhe sikur të kishte njohur Kosovën. Por, derisa synon që Kosova të hynë në iniciativa si provincë e saj gjë që nuk është sepse realiteti është ndryshe, natyrisht se një iniciativë e tillë nuk i shpërben interesave të vendit tonë dhe rajonit. Kjo iniciativë ka shkelur parimin themelor të iniciativave rajonale, i cili është parimi i gjithë përfshirjes. Kur është iniciuar ka qenë vetëm me dy shtete në fillim, e dyta është shkelur parimi i trajtimit të barabartë të gjitha shteteve. E treta kemi shqetësime se do të shndërrohej në një paradhomë pritje që do t’i jepte arsye skeptikëve brenda BE-së që të na lënë neve të merremi me njëri tjetrin në vend që të qartësohej perspektiva jonë evropiane. Shqetësime tjera kanë të bëjnë me aspekte të ekonomisë, sigurisë dhe të tjera,” tha Osmani duke shtuar para Presidentit të Sllovenisë se liberalizimi i vizave për Kosovën duhet të ndodh sa më parë.

“Liberalizimi i vizave është vonuar dhe kjo e dëmton kredibilitetin e BE-së. Andaj ky liberalizim duhet të ndodh sa më parë dhe nuk ka arsye për hezitime. Për këtë gjë dua të falënderojë presidentin Pahor për mbështetjen e tij të fuqishme dhe natyrisht i kërkoj përkrahje të mëtejmë që të binden edhe pak ato shtete që kanë hezitime sa i përket këtij procesi,” tha Presidentja e Kosovës duke vlerësuar raportin mes Kosovës dhe Sllovenisë, derisa marrëdhëniet dypalëshe mes shteteve, tha ajo, duhet të shtohen edhe në shumë fusha të tjera.

Kurti-Pahor: Reflektimi i Serbisë mbi krimet si parakusht për dialog serioz

Përkushtimi i dyanshëm për thellim të bashkëpunimit mes Kosovës dhe Sllovenisë dhe forcim të partneritetit ndërmjet dy vendeve, janë dy çështjet për të cilat kanë diskutuar sot kryeministri i Kosovës, Albin Kurti dhe Presidenti slloven, Borut Pahor.

Në një komunikatë për media të Zyrës së Kryeministrit bëhet e ditur po ashtu se kreu i ekzekutivit, Albin Kurti ka thënë se Sllovenia është partner i çmuar dhe se pret me padurim avancimin e marrëdhënieve dypalëshe në mbrojtje dhe siguri.

“Sllovenia është partneri ynë i çmuar pasi ndajmë të njëjtin interes për paqen dhe stabilitetin në rajon dhe më gjerë, ka thënë kryeministri Kurti, duke u shprehur mirënjohës për kontributin e Sllovenisë në misionin e NATO-s në Kosovë, KFOR, thuhet në komunikatë.

Kryeministri Kurti theksoi përkushtimin e Kosovës për anëtarësim në NATO dhe Bashkim Evropian, si dhe punën e qeverisë në këtë drejtim.

Ai kërkoi përkrahje nga Sllovenia për anëtarësimin në organizata dhe iniciativa ndërkombëtare.

Kryeministri theksoi se përkundër faktit që kemi filluar me vonesë vaksinimin nuk kemi marrë vaksina nga Kina apo Rusia, por vetëm ato të certifikuara nga FDA dhe EMA.

Duke thënë se këtë vit Kosova tregoi se është e gatshme të marrë përgjegjësi të reja me kalimin nga një konsumues i sigurisë në një ofrues sigurie, kreu i ekzekutivit veçoi se Kosova me krenari mbështeti operacionin e drejtuar nga NATO për evakuimin e refugjatëve afganë, gjë që sipas tij, dëshmon se Kosova është një partner i besueshëm.

Ne ishim të gatshëm të ndihmonim sepse kjo është ajo që vendet që ndajnë të njëjtat vlera të demokracisë dhe paqes bëjnë për njëri-tjetrin, tha kryeministri.

Kryeministri foli për përkushtimin e qeverisë në luftën kundër krimit e korrupsionit dhe për politikat qeverisëse.

Në komunikatë thuhet po ashtu se Presidenti Pahor ka përgëzuar kryeministrin për qasjen e re në qeverisje, derisa është interesuar të dijë më shumë rreth ecurisë së bisedimeve me Serbinë.

“Sllovenia është e interesuar të shoh progres. Përkundër vështirësive bisedimet duhet të vazhdojnë”, ka thënë Pahor.

Kryeministri e vlerësoi rolin e Sllovenisë në këtë proces si shumë të rëndësishëm dhe kërkoi mbështetjen e saj për të elaboruar rëndësinë e reflektimit të Serbisë për dëmet e shkaktuara, shkatërrimet dhe luftën, si dhe krimet e kryera në Kosovë.