Kancelari i Austrisë jep dorëheqjen dy muaj pas marrjes së detyrës

Kancelari i Austrisë, Alexander Schallenberg ka dhënë dorëheqjen duke shtuar se do ta dorëzoj Zyrën sapo të arrihet marrëveshja e re e koalicionit.

“Kurrë nuk e kisha për qëllim të marr postin e liderit federal partiak. Jam i mendimit që të dyja zyrat, atë të kreut të qeverisë dhe presidentit të partisë më të fuqishme në Austri, duhet ta udhëheq një dorë,” tha Schallenberg.

Publikoi dorëheqjen pas deklaratës së Sebastian Kurz

Për momentin nuk dihet se cilat janë planet e Schallenberg për të ardhmen. Ai nuk komentoi paralajmrimet se ai do të mund të kthehet në krye të Politikës së Jashtme, raporton e përditshmja Spiegel.

Schallenberg e publikoi lajmin mbi dorëheqjen vetëm disa orë pasi Kryetari i ÖVP dhe Ish-Kancelari, Sebastian Kurz, paralajmëroi dorëheqjen nga të gjitha funksionet politike.

Mediat austriake raportojnë se postin e Kryetarit të ÖVP dhe Kancelarit duhet ta marrë ministri aktual i Punëve të Brendshme, Karl Nehammer.

Ndryshe, në fillim të muajit Tetor, Sebastian Kurz tha dorëheqjen pasi kundër tij filloi hetimi për korrupsion i lidhur me fushatën e zgjedhjeve të vitit 2017 ku ÖVP fitoi shumicën dhe Kurz u bë Kancelar.