Liberalizimi i vizave, Kurti: Kemi përmbushur kriteret, besojmë se BE do lëvizë para
Kemi përmbushur të gjitha kriteret për liberalizimin e vizave dhe besojmë që BE do të lëvizë para, tha Kryeministri Albin Kurti pas takimit me Komisionerin për Zgjerim dhe Fqinjësi të Bashkimit Evropian, Oliver Varhelyi, i bindur se shtetet anëtare brenda Këshillit të BE-së të marrin vendim pozitiv për liberalizimin e vizave për qytetarët e Kosovës.
“E vlerësova diskutimin e sotëm me Oliver Varhelyi për progresin e Kosovës në MSA. Kemi përmbushur të gjitha kriteret për liberalizimin e vizave dhe besojmë që BE-ja të lëvizë para. Integrimi në BE nuk ka alternativë. Ne jemi të motivuar të vazhdojmë reformat tona transformuese në bashkëpunim të ngushtë me BE-në,” tha Albin Kurti pas takimit me Komisionerin Varhelyi ku vlerësoi mbështetjen e vazhdueshme të Komisionit Evropian për reforma.
Para takimit me Komisioneri Varhelyi, Kryeministri i Kosovës, Albin Kurti, është takuar dhe me Përfaqësuesin e Lartë për Politikë të Jashtme dhe Siguri pranë BE, Josep Borrell, në prag të takimit të Këshillit të Stabilizim Asociimit, Kosovë-BE, në Bruksel ku u bisedua mbi marrëdhënien ndërmjet Republikës së Kosovës dhe Bashkimit Evropian në kontekstin e marrëveshjes kontraktuale të Stabilizim-Asociimit, si pjesë e procesit të integrimit të Republikës së Kosovës në Bashkimin Evropian, me theks te angazhimi i vazhdueshëm dhe progresi që Kosova ka bërë për reformën në drejtësi dhe luftën kundër krimit të organizuar.
Kryeministri i Kosovës, Albin Kurti, në takimet e zhvilluara në Bruksel ishte i shoqëruar nga Zv/Kryeministri Besnik Bislimi, ministrja e Punëve të Jashtme, Donika Gërvalla, ministri i Financave, Hekuran Murati, ministri i Brendshëm, Xhelal Sveçla, ministri i Mjedisit dhe Infrastrukturës, Liburn Aliu dhe Zv/ministrja e Drejtësisë, Nita Shala.
Ndryshe, Këshilli i Stabilizim Asociimit është formuar në bazë të Marrëveshjes së Stabilizim Asociimit mes Kosovës dhe Bashkimit Evropian ku analizohet zbatimi i kësaj marrëveshjeje nga të dy palët.
