Kryeministri Edi Rama merr çmimin “Vital Voices Global”, Hillary Clinton: Iu hapi dyert afganëve!
Duke vlerësuar kontributin e Shqipërisë dhe të Kryeministrit për strehimin e emigrantëve afganë që u detyruan të iknin nga Afganistani pas marrjes së pushtetit nga talebanët, sot Ish-Sekretarja e Shtetit, Hillary Clinton nderoi Edi Ramën me çmimin “Vital Voices Global”.
“Në një kohë kur në mbarë globin tonë të drejtat dhe siguria e grave janë në momente të vështira, angazhimi i Kryeministrit Rama për të çuar përpara mirëqenien, mundësitë në Shqipëri dhe për afganët e të tjerët duhet të na frymëzojë të gjithëve për të vepruar. Kur e mora në telefon kryeministrin për ta falënderuar për këtë angazhim të jashtëzakonshëm, ai u përgjigj shumë natyrshëm ‘po çfarë tjetër duhet të kishim bërë’. Më duket sikur dëgjoj Denin që thotë ‘pse, ç’duhet të bëjmë tjetër, përveçse t’i paguajmë njerëzit në mënyrë të barabartë’. Kryeministri Rama kuptoi thuajse instinktivisht sa e rëndësishme ishte të shtrinte dorën, të thoshte ‘PO’.
Do doja të kishte më shumë udhëheqës me këtë lloj qasjeje. Tani, mjaft udhëheqës ndërkombëtarë nuk ishin të gatshëm të bënin shumë. Edhe kur iu kërkua, gjithnjë në rastin kur u përgjigjën pozitivisht, angazhimet që morën ishin shumë të vogla. Megjithatë, pati një numër të vogël – dhe, për fat të keq, kaq janë, një dorë e vogël – udhëheqësish, që u shprehën të gatshëm në një kohë nevoje të madhe. Në krye të kësaj liste është Kryeministri Edi Rama. Pas rizgjedhjes së tij, në shtator, kryeministri Rama shënoi një rekord historik duke emëruar numrin më të madh ndonjëherë në Shqipëri të grave në qeverinë e vendit. Mbi 70 për qind e ministrave të kabinetit të tij qeveritar janë gra dhe disa prej tyre gjenden këtu këtë mbrëmje – partnere të barabarta në përpjekjen për të formësuar vendin të cilit i shërbejnë,” tha Ish-Sekretarja e Shtetit, Hillary Clinton, duke shtuar se ai vazhdon ta vendosë barazinë gjinore në qendër të agjendës së qeverisë së tij dhe të ngrejë zërin kundër dhunës gjinore dhe krah forcimit të pjesëmarrjes ekonomike të gruas shqiptare.
Këtë çmim, Kryeministri Edi Rama e ka cilësuar një krenari për Shqipërinë.
Në ceremoninë e marrjes së çmimit “Vital Voices Global” që u organizua në New York, Kryeministri Edi Rama ishte i shoqëruar nga bashkëshortja Linda dhe djali Zaho Rama.
