Thaçi : Me Serbinë s’ka vija të kuqe, dialogu s’mund të kushtëzohet
Presidenti i Kosovës, Hashim Thaçi, ka pranuar se Kosova nuk do të mund të kushtëzojë dialogun me Serbinë, me asnjë temë. Kësisoj, sipas tij, as Serbia nuk mund të bëjë një gjë të tillë.
Pas kthimit nga Brukseli, ku ka nisur atë që po cilësohet si faza e fundit e dialogut mes Kosovës e Serbisë, Thaçi tha se do të negociohen vetëm tema për të cilat do të dakordohen të dy palët.
“Për sqarim, nuk do të ketë vija të kuqe sikurse se ka pasur nga Grupi i Kontaktit në bisedimet e Vjenës, do të elaborohen vetëm tema për të cilat pajtohen dy palët si mundësi që dërgon drejt arritjes së marrëveshjes përfundimtare, nuk do të ketë marrëveshje tjetër të përkohshme, palët nuk do të lejohet të kushtëzojnë negociatat dialogun me këtë apo atë çështje”, tha Thaçi.
Për faktin se ai nuk ka mandat nga Kuvendi i Kosovës për të udhëhequr këtë fazë të negociatave, Thaçi është përgjigjur se “ai është zgjedhur president i vendit nga Kuvendi i Kosovës”.
“Jam duke zhvilluar takime intensive, të nevojshme e të sinqerta edhe me faktorë ndërkombëtarë që Kosova të jetë e përgatitur dhe e përgjegjshme për marrëveshjen përfundimtare”, tha ai, duke shtuar se negociata të jetë e fundit me Serbinë.
Thaçi edhe në Prishtinë ka ripërsëritur atë që tha në Bruksel, se me këtë fazë finale synohet arritja e një marrëveshje ligjërisht ndërkombëtarisht obliguese për të gjitha palët.
“Ka më shumë se dy dekada që Kosova ka kërkuar dialog si mjeti i vetëm për të zgjidhur kontestet e hapura në konfliktin mes Kosovës dhe Serbisë. Gjatë gjithë këtij procesi Kosova ka qenë e hapur për çdo takim dhe iniciativë për të mirën e jetës së qytetarëve”, tha Thaçi, duke shtuar se i tillë ka qenë edhe në takimin e fundit.
“Ky ishte vetëm takimi i parë fillestar, dhe në takimet në javët dhe muajt e ardhshëm do të diskutohet për substancën e marrëveshjes,” tha ai duke saktësuar se në takimin e parë është folur vetëm për kornizën e marrëveshjes, derisa palët presin nga Mogherini ftesën për takimet e ardhshme.
Sipas tij, në Kosovë të gjithë janë pro dialogut, derisa ka përmendur shoqërinë civile, mediat e akademikët.
“Është thelbësore që konsensusi politik të arrihet sa më shpejt, sepse koha po ecë e ne nuk mund të ndalemi”, tha ai, teksa ka shtuar se partitë janë duke negociuar për të gjetur modalitetet e përfshirjes në dialog. Kjo fazë sipas tij do të jetë transparente.
“Jam i gatshëm që të raportojë para Kuvendit, qeverisë dhe qytetarëve. Tek e fundit marrëveshja do të ratifikohet në Kuvendin e Kosovës”, tha Thaçi.
Sipas Thaçit, bisedimet, ashtu siç kanë filluar, pret që të jenë të rënda dhe të vështira.
“Është një konflikt më shumë se një shekullor. Synimi jonë është që të bëhemi anëtar i OKB-së, për të përshpejtuar anëtarësimin tonë edhe në organizma tjerë, përfshirë NATO-n. Në fund duhet të ndodhë njohja e pavarësisë së Kosovës nga Serbia, në të kundërtën dialogu do të ishte i pakuptimtë”, theksoi Thaçi duke përmendur në mënyrë të veçantë përkrahjen e SHBA-së në këtë proces, ndërsa ka shtuar se shtetet anëtare të BE-së janë më të interesuara më shumë se kurdoherë për arritjen e marrëveshjes si një kusht për anëtarësimin e Kosovës dhe të Serbisë në BE.
“Procesi i dialogut do të jetë transparent dhe do të udhëhiqet nga institucionet. Unë ju siguroj se do të mbrojë interesin e vendit, ashtu siç kam bërë gjithë jetën time. Është një mundësi që nuk guxojmë ta humbim”.
Demarkacioni me Malin e Zi, tha ai, është fakti më i mirë që nuk duhet të ndodhë në Kosovë ndërsa përfundoi me fjalët që i kishte artikuluar homologu i tij serb, Vuçiç :
“Nuk kemi kohë për të humbur, s’kemi kohë për debate të thata, duhet fokusuar në dialog, marrëveshjet e arritura në Bruksel duhet të kalojnë në Kuvend”.
