Dështon ankandi për shitjen e naftës, asnjë ofertë për Albpetrol
Kompania publike e nxjerrjes dhe prodhimit të naftës njoftoi se ankandi për shitjen e 40 mijë tonëve naftë i hapur në fund të vitit të shkuar është anuluar.
Kjo duket se lidhet me faktin që në ditën e mbajtjes së ankandit nuk është paraqitur asnjë ofertë.
“Autoriteti shitës, Albpetrol sh.a njofton anulimin e procedurës të ankandit “Procedurë e hapur”, me objekt “Shitje nafte brut, sasia 40 194 ton”, zhvilluar më datë 29.12.2021, ora 11.00, pranë ambienteve të MIE, për arsye të mungesës së konkurrencës, pasi nuk u paraqit asnjë ofertë, bazuar kjo në pikën 15, të urdhrit Nr. 83, datë 10.02.2012 “Për rregullat dhe procedurat e shitjes të produkteve hidrokarbure”, i ndryshuar” thuhet në reagimin e shkurtë të kompanisë.
Ky është ankandi i dytë i Albpetrol pas atij të mbajtur në muajin prill 2021 kur u shitën 100 mijë tonë.
Ankandi i dhjetorit
Kompania njoftoi në fund të vitit të shkuar se sasia e naftës që do të shitej ishte pak më shumë se 40 mijë tonë dhe në rast të një fituesi evadimi duhet të behej brenda 8 muajsh. Duket se asnjë nga kompanitë në vend, kryesisht rafineri nuk e kanë parë të arsyeshme blerjen e naftës në këtë moment nga Albpetrol. Në dokumente më herët kompania njoftonte dhe mbi formulën që do të aplikohej për naftën.
“Në kushtet FOB është: Çmimi minimal fillestar për njësi është: 73.88 % e Çmimit Brent + K
- b) Në pikat e lëvrimit: Çmimi minimal fillestar për njësi është: 73.88 % e Çmimit Brent – 2.94 USD/bbl + K
– 73.88 % është koefiçenti i cili përfaqëson karakteristikat mesatare të naftës (pesha specifike, aciditeti i naftes, % e squfurit). – Brent është çmimi në USD/bbl i Brent i Platts, i publikuar në Buletinin e Prokurimit Publik. – 2.94 USD/bbl kosto mesatare totale (transport, magazinim, stokim, analizim produkti, sigurim). – K- eshte vlera USD/bbl e ofruar nga ofertuesi mbi çmimin minimal të shitjes të përllogaritur nga formula (K ˃ 0)” sqarohej në dokumentet e ankandit.
Të njëjtat detajonin se vendndodhja e naftës brut është në Albpetrol sha Patos: Në pikat e lëvrimit Stacioni Usoje, Stacioni Visoke, Stacioni Gorisht, Stacioni Zharrëz, Stacioni Kuçovë, Stacioni Amonice.
Situata e pandemisë në vitin 2020 vuri në pozitë të vështirë thuajse gjithë sektorët përfshirë nxjerrjen e naftës ndërkohë që rimëkëmbja gjatë 2021 e ekonomisë globale rriti interesin për naftën dhe dha sinjale përmirësimi. Por kjo mbetet për t’u parë nëse do të reflektohet me një rritje të interesit edhe për naftën brut në vend./Monitor/
