Australia i anulon vizën Gjokoviçit

Qeveria australiane anuloi për herë të dytë vizën për yllin e tenisit, Novak Gjokoviç, por procesi nuk ka marrë ende fund.

Ministri australian i Imigracionit, Alex Hawke, raportoi DW, zbatoi një kompetencë të tijën që lejon anulimin e vizës dhe e deklaroi si të pavlefshme vizën e yllit të tenisit të pavaksinuar, Novak Gjokoviç. Hawke e argumentoi këtë masë me “interesin publik.”

Nëse ylli i tenisit nuk ka sukses me ankimimin, atëherë ai duhet të largohet nga Australia dhe nuk mund të mbrojë titullin në kampionatin e tenisit, Australian Open që fillon të hënën. Përveç kësaj Gjokoviçin e kërcënon edhe ndalimi për tre vjet i hyrjes në Australi.

Sipas mediave australiane, avokatët e Gjokoviçit janë të përgatitur për të apeluar anulimin e sërishëm të vizës për Gjokoviçin. Nëse do ta bëjnë këtë ishte e paqartë të premten në mëngjes.

Vendimi i autoriteteve australiane u la të kuptohej nga një deklaratë e zëvendëskryeministrit të vendit, Barnaby Joyce. “Shumica e australianëve nuk ka simpati për idenë që një individ tjetër, qoftë lojtar tenisi, qoftë mbreti i Spanjës, apo mbretëresha e Anglisë mund të hyjë në vend përmes rregullave të tjera ndryshe nga çdokush tjetër.” Kryeministri australi, Scot Morrison në një deklaratë publike u shpreh, se vendimi u mor në interes të rendit publik, por për shkak të implikimeve juridike, ai nuk do të deklarohet më tej.

Novak Gjokoviç, raporton DW, kishte vazhduar trajnimet këto ditë për t’u përgatitur për Australian Open, ku ai mban titullin e kampionit. Në ndeshjen e parë ai do të përballej me tenistin tjetër serb, Miomir Kecmanovic.