Saliun e largoi, por jo gjumin! Basha vazhdon Teatrin edhe me 6 Mars!
“Edhe gjumi është një formë e kritikës, në veçanti në teatër!” E ka thënë shumë kohë më parë dramaturgu i njohur irlandez George Bernard Shaw dhe çuditërisht Lulzim Basha e aplikon në perfeksion sot në politikë, si gjumin, pra, kritikën, ashtu dhe teatrin.
Sot, kur çdo demokratë normal i është bashkuar Komisionit të Rithemelimit të PD ndërsa pritet akti i fundit i dramës së dhimbshme “6 Marsi”, Lulzim Basha vazhdon me teatrin ndonëse nuk i gjeti as 6 demokratë për ti kandiduar për kryetar në 6 bashki!
Edhe pa Saliun kandidatët i përcaktoi siç bëri 8 vjet e kaluara të humbjes, me arbitraritet, derisa “Saliu i keq” me Komisionin e Rithemelimit zbatoi Primaret!
Megjithëse duhet pranuar se këtë radhë emrat nuk i çoi pesë minuta para orës 12:00, nuk është e qartë pse i prezanton me pompozitet ose pse ata kandidatë pranojnë të prezantohen në mënyrën e tillë, kur humbjen e kanë të sigurtë!
Fajet i ka Saliu!
Pas humbjes së zgjedhjeve pa fund që arritën kulmin me ato të 25 Prillit që shkaktoi dhe pakënaqësi të madhe ndër demokratë, një pasdite, kryetari i PD Lulzim Basha u zgjua nga gjumi dhe u kujtua se duhet të vazhdoj me aktrimin; Ku të kapet, fije kashte nuk kishte në dhomën e gjumit dhe u kap aty ku kapen gjithë komunistët që nga viti 1992: Fajet i ka Saliu!
Kur këshillohesh nga spiun të Sigurimit të Shtetit vetëm metoda Sigurimi mund të aplikosh!
U tha, u bë! Fajet i ka lideri historik Sali Berisha edhe për humbjen e Partisë Demokratike më 25 Prill dhe si person NON GRATA i shpallur nga DASH u përjashtua nga partia. Reagoi një pjesë e konsiderueshme e demokratëve ndërsa vetë Basha i pashqetësuar dhe i blinduar me morra të kuq përreth, mendoj se mund të vazhdoj me aktrimin edhe pse ringjalli kot një njeri që praktikisht veten e kishte çuar në pension politik.
Meqë pa ‘urdhrat e Saliut” tashmë duheshin 6 kandidatë që do të tregojnë liderin perfekt që mbanë timonin ndonëse me policë të Edi Ramës në mbrojtje gjithandej, Lulzim Basha gjuajti grepat nga Shkodra deri në Lushnje!
Primaret që inicioi Komisioni i Rithemelimit të PD i dhanë një mundësi të artë Bashës për të vazhduar betejën politike ndonëse nuk po i shqiteshin nga goja retorikat idiote me Metën dhe Berishën.
Edhe pse pësoi një goditje nga këto Primare meqë rezultuan të suksesshme dhe nga ato doli një produkt i mirë, Lulzim Basha ishte i favorizuar pasi që nuk kishte caktuar asnjë nga kandidatët për zgjedhjet e 6 Marsit. Por një njeri i favorizuar nga Sali Berisha që nga dita e parë që shkeli në politikë dhe sot thotë “Fajet i ka Saliu” nuk ka se si të veproj ndryshe.
Nuk pyeti njeri, u lexuan emrat në Kryesinë që e qëndisi me dorën e tij, por që edhe aty rezultoi se nuk janë pyetur Drejtuesit Politik për këto kandidatura. Gjithsesi ky është Lulzim Basha, o në gjumë o duke aktruar!
Xhemali i Xhemal Bushatit
Të caktohet njeriu më i votuar në zgjedhjet e 25 Prillit 2021 në Shkodër nga Primaret e Komisionit të Rithemelimit PD, Dr.Bardh Spahia, për kandidat në zgjedhjet e pjesshme vendore të 6 Marsit, dhe ta përbaltësh figurën e tij dhe familjes së njërit ndër simbolet e demokracisë së këtij qyteti dhe jo vetëm, Ali Spahia, që është dhe historia e Partisë Demokratike, nga njerëz që nuk e dinë se i kujt është qeni që kishin në shtëpi, kjo nuk është fyerje vetëm nga njeriu që vazhdon të jetë në gjumë pa Saliun por edhe atij që aktron.
Dhe, kur Basha pretendon se Dr.Bardh Spahia që ishte kandidati i PD kur ai ishte kryetar, se do ta ketë ndihmën e Edi Ramës në qytetin më antikomunistë në historinë e Shqipërisë, kjo është pak të quhet çmenduri!
Ashtu siç nuk mund të quhet ndryshe as pranimi i Xhemal Bushatit të futet në garë përballë Dr.Bardh Spahisë, për hatër të njeriut të gjumit dhe teatrit, Lulzim Basha!
Pa përdorur teori konspirative se kush është Xhemal Bushati, historia na mëson se Shkodra kishte një Xhemal të tillë, njihej si demokrat dhe në momentet më kritike për Shqipërinë ai iu bashkua bolshevikëve të Nolit!
A është i tillë Xhemali aktual nuk mund të thuhet por meqë ndër shqiptarë është konfirmuar se gjaku nuk është ujë, historia e gjatë patriotike e Xhemal Bej Bushatit dy herë deputetë, firmëtar i parisë shkodrane për vendimet e Kongresit Lushnjes, kundërshtar i Zogut, i për ndjekur nga ai, i vënë kapak angazhimi në Qeverinë e Fan Nolit si ministër pa portofol dhe anëtarë i Komitetit të Vjenës për formimin e Konares e cila u themelua me ndihmën e Bashkimit Sovjetik.
Pse u dekorua Xhemal Bej Bushati më 1993 pas vdekjes nga Presidenti Sali Berisha, me dekoratën “Pishtar i demokracisë” , kjo duhet ti interesoj kandidatit të Lulzim Bashës për zgjedhjet e 6 Marsit.
Por, Dr.Bardh Spahia si fitues i kësaj gare duhet të jetë krenar që i ati, Dr.Ali Spahia respektonte me admirim periudhën patriotike të Xhemal Bej Bushatit, për të cilën ai fliste me admirim pa e ngatërruar me atë të bashkëpunimit me bolshevikun Noli!
Bamka i Lushnjes!
Ndryshe nga Shkodra ku Lulzim Basha si gjithmonë nuk respekton as krahinën, as fenë dhe as traditën, rasti i Lushnjes është shumë më i qartë. Se çfarë ka thënë Saliu për Metën ose dhe vetë Lulzim Basha për Metën e Rama duhet dhe të kërkohet por çfarë ka thënë Bamir Topi për Lulzim Bashën është botuar një libër!
Ç’ne Bamir Topi?!
Ky tipi që Lulzim Basha e kandidon në Lushnje për kryetar bashkie dhe e futi kudo në PD, si në Kryesi, KQZ e tashmë edhe kandidat për Kryetar të Bashkisë Lushnje, para se të shkelte në Partinë Demokratike duhet të sqarohej nëse Bamir Topi është idiot, Lulzim Basha është idiot ose vetë Indrit Sefa është idiot që vendosi të kandidonte si deputet për partinë e Bamir Topit në Lushnje, dhe pak rëndësi ka se kush e bëri 21 Janarin, Edi Rama siç e deklaronte PD, Sali Berisha siç thotë Lulzim Basha ose varianti i Bamkës që është përshkruar në libër!
Ndoshta Bamka i Lushnjes s’ka arye të lexoj librin e Bamir Topit meqë tani mjaftohet dhe lexon vetëm atë që i thotë Gaz Bardhi ama në librin e tij “Nocturn”, Bamir Topi, rrëfen se si Basha u shfaq në shtëpinë e tij mëngjesin e 23 janarit 2011, dy ditë pas vrasjeve në bulevard dhe intrigat që pasuan:
Të nesërmen, më datë 23 janar, ditë e diel, herët në mëngjes mora një telefonatë nga Lulzim Basha, ministër i Brendshëm dhe pas përshëndetjes së rastit kërkoi të më takojë. Rreth orës nëntë të atij mëngjesi e prita Lulin në një zyrë të improvizuar në banesën time. Ishte i shqetësuar, nuk e fshihte dot gjendjen e tij dhe ndërrimin e kursit të ngjarjeve.
-Mirëmëngjesi, mirë se erdhe! – hapa bisedën.
-Mirëmëngjesi!- Ndoshta herët se është dhe e diel! – më tha.
-Jo, i thashë. Jam pothuajse pa gjumë gjithë natën duke ndjekur ç’po ndodh. Meqenëse jemi këtu, ç’po ndodh në këndvështrimin tënd në marrëdhëniet me prokurorinë? – vazhdova bisedën.
Pas një hezitimi të shkurtër më thotë:
-Në fakt këtë çështje erdha të bisedoj! Ne jemi të shqetësuar për urdhërndalimet e zinxhirit komandues të Gardës!
Ai jo vetëm kishte ardhur me porosi të Saliut, por po përsëriste besnikërisht të njëjtat fjalë që shefi i tij i kishte thënë publikisht një ditë më parë.
-Erdha të them edhe në emër të kryeministrit të ndërhyni te Prokurorja e Përgjithshme për t’u tërhequr nga kjo iniciativë! – tha Luli duke e mbyllur kërkesën e tij.
Ky ishte sipas meje çasti që do të kuptohej nëse presidenti do të merrte pozicion në favor të qeverisë apo të kryetarit të shtetit, ku shërbimi i tij duhet të jetë kushtetues dhe jo arbitrar. Tashmë gjithçka ishte e qartë dhe vendosmëria për të mbështetur prokurorinë ishte e palëkundur.
-Dëgjo, Luli! Besoj se biem dakord që ka ndodhur një ngjarje e përmasave tragjike, me implikime të rënda të politikës dhe shtetit. Unë jam kryetar shteti dhe interesi është që me qetësi të vendosemi të zbulojmë shkaktarët, duke filluar me politikanët, demonstruesit, policët, gardistët e kushdo qoftë pas tyre. Unë nuk mund të marr përgjegjësi historike për të devijuar të vërtetën. i kam dhënë besimin kryeprokurores në një takim të zhvilluar dje, nga ku rezulton se qeveria dhe Garda apo Policia nuk po bashkëpunojnë për mbledhjen e provave dhe hetimin.
Në fund, para se të ndaheshim, duke dashur të ruaj një komunikim më njerëzor, ndoshta i dhashë një këshillë të panevojshme.
-Shiko letrat e tua nëse i ke në rregull se kjo punë parashikoj se do të shkojë jo mirë!
Pasi dëgjoi fjalinë e fundit, të dy në të njëjtën kohë u ngritëm, u përshëndetëm ftohtë dhe u ktheva në mendime, duke parashikuar shpërthimin e një njeriu, të cilin e njihja mirë, Sali Berishës, në kushtet kur do të akuzohej për vrasjen e katër njerëzve të pafajshëm në bulevard, jo në territorin e rrethuar të godinës së qeverisë.
Sipas Mero Bazes, i cili kishte miqësi të afërt me Sokol Olldashin, rrëfehet një bisedë që këta të dy kishin bërë lidhur me përfshirjen e emrit tim në akuzat e rënda që shoqëronin dështimin e takimit të Bashës me mua. Sokoli i kishte thënë se “përfshirjen e Bamirit në listë me të tjerë, e shikoj si pafuqi të Bashës për të kundërshtuar paranojën e Berishës”.
Madje Olldashi i kishte treguar për një vizitë të Bashës në zyrën e tij, pikërisht në kulmin e ngjarjeve. Sipas tij, Luli ishte i trembur nga gjithçka ndodhte brenda e jashtë Kryeministrisë. Kur situata precipitoi dhe u pa se ishin vrarë njerëz, Luli u lidh me Bamir Topin dhe Ai (unë) e ftoi të shkonte në zyrën e tij dhe të bisedonin. Kur u kthye ishte më i qetë.
E vërteta ime (Bamir Topi) është në një drejtim tjetër. Kur ende nuk ishin vrarë njerëzit në bulevard, kur po shikoja që punonjësit e policisë kishin rënë nën dhunën e demonstruesve, i telefonova Lulzim Bashës për ta pyetur dhe për t’i shprehur mbështetje për policët. Basha nuk u përgjigj për rreth dy orë dhe mesa duket është momenti kur ndodhej tek Sokol Olldashi kur më ka telefonuar.
Nuk ka pasur asnjë ftesë nga ana ime për ta ftuar në Presidencë, edhe për faktin se ngjarjet po i ndiqja nga zyra në mjediset e shtëpisë së bashku me bashkëpunëtorët e mi. Përkundrazi ishte dita e diel, 23 janar që unë e kam takuar Lulzim Bashën, në shtëpinë time, me kërkesën e tij, gjë të cilën e kam përshkruar në mënyrë të hollësishme më sipër.
Sipas Olldashit, që ka gabuar në rrëfim ditën dhe vendin e takimit ose i ishte thënë qëllimisht nga Lulzim Basha, ky i fundit i kishte thënë për mua se nuk isha negativ dhe i kisha thënë të kishte kujdes me letrat se ka ngjarje (fakt ky që është i vërtetë). Sokol Olldashi kishte vazhduar të tregojë se gjatë bisedës me Lulin kishte telefonuar Berisha dhe i kishte thënë diçka të rëndë për Topin dhe ngjarjet që kishin rrjedhur. Kishin shkuar së bashku me Lulin te zyra e Berishës, i cili sipas Sokolit ishte totalisht i axhituar dhe jashtë kontrollit.
Berisha ishte hedhur në sulm kundër meje. Luli nuk kishte folur. Sipas Sokolit, këtu kishte kuptuar që Basha nuk i kishte treguar që kishte takuar Bamirin. Sokoli kishte marrë në telefonin e zyrës së Berishës njërin nga rojet dhe e kishte pyetur se ku isha unë. Ai i ishte përgjigjur që isha në shtëpi (e vërtetë). Berisha e kishte pyetur se me kë po fliste dhe Sokoli i kishte treguar me rojen e Bamirit. Në ato momente Berishës i kishte rënë tërbimi dhe i kishte thënë që ta linte e të mos na ngatërronte tani, sepse ai e kishte bërë puçin.
Ishte e qartë që i duhej puçisti. Basha e kishte kuptuar këtë dhe filloi të fliste. i kishte treguar se kishte qenë në takim me mua, për të më bërë thirrje, sipas tij, për të ndaluar puçin, por ai (unë) i paskam thënë: “kujdes me letrat”. Sokoli kishte përfunduar duke thënë se versioni i ri i Bashës ishte emocional dhe krejt i ndryshëm nga ajo që i kishte thënë pak më parë.
E vërteta (sipas meje Bamir Topi): Luli, sikurse e kam përshkruar, erdhi me kërkesën e tij në shtëpinë time dhe më foli për kërkesën e Sali Berishës që të ndërhyja tek Ina Rama. Siç kuptohet ata po i ruheshin edhe Olldashit.
Pas pak orësh, nga ky çast, u mblodh grupi parlamentar i mazhorancës, ku po projektohej një skenar i zi, i ideuar nga urdhëruesi i masakrës në bulevard.”
Kjo, pra ishte e vërteta e Bamir Topit, kryetarit të partisë me të cilën kandidoi Indrit Sefa, jo demokrati Indrit Sefa siç e lartëson Gaz Bardhi që Basha vazhdon ta quaj Sekretar.
Pse është shqetësuar Lulzim Basha më 23 Janar dhe a e ka dërguar Sali Berisha siç ka thënë Basha, apo nuk e dërguar siç e përshkruan Bamir Topi, sot nuk janë të rëndësishme vetëm për të vërtetën e 21 Janarit por dhe për të kuptuar se kush është Indrit Sefa, me çfarë intriganti bashkëpunon dhe është i gatshëm ti nënshtrohet vetëm për përfitimet e tij personale; Sepse, pavarësisht të dyja të vërtetave, në asnjërën prej tyre Lulzim Basha nuk del qelibar për 21 Janarin!
Dhe, nëse kandidati për Kryetar të Bashkisë Lushnje pranon të jetë kandidat i një partie, ku kryetari i partisë në rastin më të mirë është mashtrues, meqë kriminel nuk e ka thënë gjykata, atëherë Indrit Sefa me gjithë këto të vërteta që janë thënë është më i zi se Basha dhe Bamka!
Ndërsa Lulzim Basha, përveç se mashtrues, në hallin e tij më të madh për të gjetur një demokrat lushnjar që ta kandidoj për Kryetar të Bashkisë më 6 Mars, ofendon gjithë qytetin. Qytet i cili ka histori, traditë dhe sot intelektual të njohur që mund ta drejtojnë një shtet, dhe jo më qytetin ku kanë lindur!
A do ta votojnë Indrit Sefën apo Elton Banon demokratët lushnjarë?! Përgjigjen e ka dhënë Lulzim Basha në momentin kur ka përcaktuar kandidimin dhe për këtë Eltoni duhet të jetë mirënjohës pavarësisht meritat që ka ai dhe familja e tij!
Në rrjetën e ILDKPI
Shqiptarët janë të bindur se ILDKPI është një institucion kot, por imagjinoni që edhe ky lloj institucioni kap njerëzit të cilët i përzgjedhë Lulzim Basha.
Pse është në gjumë Basha apo bënë teatër pak rëndësi ka, por Vora ishte e qartë edhe kur u zhvilluan Primaret në këtë qytet, votuan Lulzim Vranën si kandidat të Vorës që ishte dhe rezultati i parë që doli nga Primaret e Komisionit Rithemelimit të PD.
Çfarë zgjedhë Lulzim Basha, këtë nuk mund ta imagjinoj jo Ymer Marku si kandidat por asnjë demokrat në këtë tokë, sikur kjo përzgjedhje ti atribuohet edhe Kunatit, sot, kur kandidatët blihen dhe nuk paguajnë për të kandiduar nën siglën e PD.
Ndoshta Edi Rama e ka garantuar Lulzim Bashën që Ymer Marku nuk do të ketë probleme por ai në vitin 2010 është akuzuar dhe paditur nga Inspektoriati i Lartë për fshehje të pasurisë.
Inspektorati i Lartë ka kërkuar nisjen e procedimit penal edhe për subjektin Ymer Marku, me funksion kryetar i Komunës Bërxull, Tiranë. Në përfundim të kontrollit të plotë, bazuar në rezultatet e veprimeve verifikuese të kryera gjatë hetimit administrativ, si dhe ekspertiza e specializuar për vlerësimin e pasurisë, verifikimet në terren, është arritur në përfundimin se subjekti ka bërë deklarim të rremë lidhur me të dhënat e pasurisë së paluajtshme dhe ka fshehur likuiditete te vendosura ndër vite në bankat e nivelit të dytë si më poshtë:
a) Bar-Restorant Domje, vlera e deklaruar nga subjekti është 5.000.000 lekë. Nga Raporti i Vlerësimit të datës 03.02.2010 të ekspertit vlerësues, rezulton se prona objekt shqyrtimi është vlerësuar në shumën 12.591.000 lekë. Pra, është deklaruar 7.591.000 lekë më pak.
b) Autoveturë deklaruar 1.500.000 lekë. Nga hetimi administrativ ka rezultuar që ky automjet është blerë në shumën 19.375 euro ose e vlerësuar me kursin e Bankës së Shqipërisë, në shumën 2.359.488 lekë. Pra, është deklaruar 859.788 lekë më pak.
c) Depozita bankare dhe llogari rrjedhëse në Tirana Bank, në shumat në total 11.340 euro.
d) Depozitë afatshkurtër në vitin 2006 shuma 71.700 euro, (derdhur dhe tërhequr brenda vitit).
e) Depozitë afatshkurtër në vitin 2007, në llogarinë në lekë shuma prej 4.500.000 lekë (derdhur dhe tërhequr brenda vitit).
Nga hetimi administrativ ka rezultuar se pasuritë dhe interesat private të subjektit Ymer Marku, objekt i verifikimit të ILDKP, nuk mbulohen dhe as nuk justifikohen me burime të ligjshme, që në total ka vlerën 22.656.000 lekë.
A mjaftojnë këto gjetje të ILDKPI?! Për shkelje të kësaj natyre dhe jo vetëm, është miratuar Ligji i Dekriminalizimit dhe nëse Basha mendon se me mbylljen e gojës Komisionit Rithemelimit të PD në KQZ ka zgjidhur çështjen, atëherë gabohet rëndë!
Dhe, nëse Ymer Marku përveç gabimit të rëndë me Deklarimin e pasurisë, gabon duke garuar me një subjekt që drejtohet nga Lulzim Basha, ky do të jetë gabimi fatal që mund ti kushtoj dhe me përmbylljen e përjetshme të karrierës së tij politike sepse në çdo rrethanë ai këto zgjedhje nuk mund ti fitoj sikur Jemin Gjana ta zëvendësoj edhe Ilirjan Celibashin.
Durrësi, Dibra e Rrogozhina
Ardian Muka nuk është me fat vetëm që fitoi në Durrës nga Primaret e organizuara nga Komisioni i Rithemelimit por edhe që kandidati i Lulzim Bashës në Durrës prezantohet nga Grida Duma!
Kandidatja e dështuar e Durrësit, prezanton Luan Hotin me premtimin se bashkia do kthehet në shërbim të durrsakëve është tallja më e madhe që mund ti bënte si Lulzim Basha ashtu dhe premtuesja Grida Duma këtij qyteti bregdetar, porti i të cilit u shit nga vetë Basha!
Pse Luan Hoti pranoi të kandidohet nga një grupim partiak i cili kryesohet nga ai që shiti partinë në emër të bashkëmenaxhimit të Portit të Durrësit nuk dihet, por Ardian Muka e ka të qartë se Luani nuk është as rivali dhe as pengesa e tij politike sepse betejën për çlirimin e Durrësit e ka me Edi Ramën dhe Lulzim Bashën!
Bashkia Dibër, nuk ishte cirk vetëm për demokratët kur dëgjuan kandidimin e Luan Hakës nga Lulzim Basha, por u bë cirk për të gjithë shqiptarët kur u zbardhën debatet nga Kryesia e Bashës.
Lulzim Basha edhe pa Saliun cakton kandidatin për Kryetar të Bashkisë Dibër pa e ditur Drejtuesi i saj politik. Pse foli Xhelal Mziu një Zot e din, por avokatia që i bëri Kreshnik Çollaku shefit të tij Basha pas ankesës së Mziut se nuk ishte në dijeni si Drejtues Qarku për përzgjedhjen e kandidatit me konstatimin se degët janë konsoliduar, ishte më shumë tragjike se komike. Ndoshta irritimi i Mziut që i kthehet Çollakut se në Matin e tij i kishin ikur 1.300 demokratë në Foltore për lexuesin është normal, por debati në PD pa Saliun që kryesohet nga Lulzim Basha është katastrofë që shpërfaq atë që tashmë pak s’e kanë besuar: Lulzim Basha është diktator!
Premtim Kryemadhi i dalë nga Primaret e Komisionit Rithemelimit PD mund të vazhdoj të sulmohet nga Gaz Bardhi, që tjetër punë nuk din të bëjë, por ai betejën elektorale e ka me Edi Ramën i cili me trafikantët e tij të drogës do të vazhdoj ta praktikoj manipulimin zgjedhor edhe sot kur Damian Gjiknuri nuk është ministër!
Ndërsa Hekuran Xhani si fitues i Primareve të Komisionit të Rithemelimit PD normalisht nuk është ndjerë mirë në ditën kur ato u zhvilluan dhe dëgjonte në një vend të vogël si Rrogozhina se çfarë sajonin ata që deri dje ishin bashkëpartiak. Por, sot, kur Ferdinand Saraçi si kandidat i zgjedhur nga Lulzim Basha nuk ka turp të prezantohet nga Gaz Bardhi, është e qartë se turpi ka braktisur selinë e blinduar të Bashës të stolisur me kriminel!
Në fund, me shpalljen e rezultateve të zgjedhjeve të pjesshme vendore të 6 Marsit, ata që nuk e kuptuan gjumin e Lulzim Bashën do ta kuptojnë teatrin që ai ndërtoi nga viti 2005, ndërtim ky pa leje që e lejoi Sali Berisha dhe për këtë e ka pranuar fajin ekskluziv. Ata që e duartrokitën Lulzim Bashën dhe vazhdojnë ta duartrokasin nuk mund të vepronin ndryshe për deri sa e kanë pranuar të jenë, MILET!
