Me Shoqatën “Durrësi”, Berisha: Afera më korruptive në planet, Rama-Basha e Portit!
Në një tryezë të organizuar me Shoqatën “Durrësi” nga kandidati i koalicionit “Shtëpia e Lirisë”, Ardian Muka, lideri historik i Partisë Demokratike, Sali Berisha, tha se edhe vjedhja flagrante me inceneratorët është më e vogël se kjo që po zhvillohet në Portin e Durrësit ku janë implikuar Edi Rama dhe Lulzim Basha.
“Ne mblidhemi sot këtu për njërën nga aferat korruptive ndoshta tani për tani më të madhe të planetit. Jo vetëm të Ballkanit e të Europës, por të planetit. Mblidhemi në një moment kur mega-grabitës, mega-plaçkitës kanë vendosur t’i rrëmbejnë qytetit në një skemë klasike mafioze, 800 mijë metra katrorë me një vlerë disa miliardë euro.
Kanë përdorur një skemë tipike për mafien, kanë gjetur një kompani në Emiratet e Bashkuara e njohur në shumë aspekte, kanë firmosur një marrëveshje me qeverinë e Emirateve për të bërë kornizën e maskës me të cilën duan të rrëmbejnë tokën dhe fill pas kësaj, Emari është zhdukur, siç thotë ministrja që meriton më shumë se çdo gjë tjetër apo që njihet më shumë se çdo gjë tjetër për grykësinë e saj, me rregullat e saj i shiti 100% koompanive offshore apo kompanisë offshore Rama-Basha, të gjithë aksionet e 800 mijë metrave katrorë, tokë në zemër të Durrësit”.
Aferën e inceneratorëve e konsideron vjedhje flagrante por është një nënfish i vogël i kësaj që po zhvillohet në Durrës.
“Edhe inceneratorët që janë vjedhje flagrante, duken një nënfish i vogël i kësaj që po zhvillohet në Durrës. Durrësi, një qytet 3-mijë vjeçar, ekzistencën ia ka dedikuar portit. E thotë Milan Shuflaj, në kohëra të mira Durrësi zgjerohet, në kohëra të vështira rrudhet. Por asnjë pushtues nuk e la Durrësin pa port. Në këtë mënyrë, babëzia dhe lakmia e verbër e fitimit, çon në vendime të pashembullta në 3 mijë vite,” tha Sali Berisha ndërsa citoi edhe thirrjet e Grida Dumës, se në këtë çështje duhet të bashkohen Rama dhe Basha.
Ndryshe, kandidati i koalicionit “Shtëpia e Lirisë” në zgjedhjet e pjesshme vendore të 6 Marsit, Ardian Muka, i shoqëruar nga lideri historik i Partisë Demokratike, Sali Berisha, ka zhvilluar një takim edhe me punonjësit e një biznesi fason në zonën e Shkozetit, Durrës.
