Dështimi i Argjentinës në Kupën e Botës, zbardhet arsyeja

Eliminimi i Argjentinës nga Kupa e Botës pas humbjes ndaj Francës në 1/8 e finales të shtunën përkufizohet më së miri nga fakti se trajneri i saj, Jorge Sampaoli, nuk e ka zhvilluar as edhe një ndeshje me formacionin e njëjtë që prej se e mori drejtimin e saj verën e 2017-s.

Që nga gushti 2017, kur edhe zyrtarisht u emërua trajner i Argjentinës, Sampaoli e ka drejtuar kombëtaren amerikano-jugore në 15 ndeshje, me 15 formacione të ndryshme.

Sampaoli është kritikuar për skemat e tij dhe lojtarët e zgjedhur sidomos në sulm edhe në Botërorin Rusia 2018, ku shënoi vetëm një fitore, u mposht dy herë dhe barazoi një herë.

Edhe në katër ndeshjet e zhvilluara në Botëror, tri në fazën e grupeve dhe një në 1/8 e finales, Sampaoli luajti me skema dhe lojtarë titullarë të ndryshëm.

Madje, në humbjen ndaj Francës ai u fut pa asnjë sulmues klasik, duke lënë në stol si Kun Agueron ashtu edhe Gonzalo Higuain.