Dita e dhjetë e pushtimit rus ngjall frikën e vdekjeve të civilëve ukrainas

Ushtria ukrainase ka paralajmëruar se forcat pushtuese ruse po luftojnë për të rrethuar kryeqytetin, Kiev, dhe qytetin e dytë të rrethuar të Harkivit, derisa diplomatët perëndimorë kërkojnë masa për të frenuar konfliktin dhe paralajmërojnë se civilët ka të ngjarë të përballen me sulme më intensive.

Rusia dhe Ukraina kanë konfirmuar se janë pajtuar për armëpushimin e përkohshëm në dy qytete.

Autoritetet ukrainase thanë se po punojnë për detajet e evakuimit të qytetarëve ndërkohë evakuimi filloi nga qyteti i Mariupolit. Autobusët u organizuan për të lëvizur njerëzit ndërsa banorëve u është thënë gjithashtu se ata mund të përdorin transportin e tyre për të udhëtuar në mënyrë të sigurt përgjatë një rruge të veçantë në veri-perëndim për në qytetin Zaporizhja.

“Negociatat e armëpushimit vazhduan gjatë natës,” tha Nënkryetari i bashkisë së Mariupolit, Serhiy Orlov për BBC duke shtuar:

“Ne filluam menjëherë procedurën tonë për të provuar të evakuojmë njerëzit. Kemi rregulluar 50 autobusë dhe mendojmë se 5-6000 njerëz mund të dalin me autobus për në Zaporizhja. Besojmë se njerëzit mund të largohen edhe me makinë private,” tha ai duke saktësuar:

“Ne mendojmë se gjithsej 7mijë deri në 9 mijë njerëz mund të ikin me autobus dhe me makinë private, nëse armëpushimi qëndron. Nuk ka trena që qarkullojnë sepse infrastruktura hekurudhore është shkatërruar nga trupat ruse,” tha Orlov i bindur se nuk kanë garanci nga pala ruse se armëpushimi do të vazhdojë edhe nesër ndërkohë armëpushimi është në fuqi edhe për qytetin e vogël, Volnovakha.

Ndërsa Zv/Kryeministrja e Ukrainës, Iryna Vereshchuk, paralajmëroi se Rusia nuk duhet të përfitojë nga një korridor humanitar për të çuar përpara trupat e saj.

Qeveria ukrainase, tha ajo po verifikon informacionin se trupat ruse po përdornin armëpushimin për t’iu afruar me pozicioneve ukrainase në zonat përgjatë rrugëve të evakuimit.

“Ne po e përdorim këtë kanal për të evakuuar civilët, gra dhe fëmijë,” tha Vereshchuk duke shtuar.

“E gjithë bota po shikon!”

Zv/Kryeministrja e Ukrainës, Iryna Vereshchuk, konfirmoi se Komiteti Ndërkombëtar i Kryqit të Kuq ndërmjetësoi bisedimet për armëpushimin dhe se do të kryesojë kolonat e evakuimit ndërkohë Presidenti Volodymyr Zelensky përmes një video-mesazhi tha sot se ai dhe zyrtarët e lartë mbeten në Kiev:

“Ne vazhdojmë të luftojmë. Do të mbrojmë shtetin tonë. Do të çlirojmë tokën tonë!”

Sekretari amerikan i Shtetit, Antony Blinken, tha në Bruksel se situata në Ukrainë “ka gjasa të përkeqësohet përpara se të përmirësohet”.

Ushtria ukrainase tha sot në ditën e 10-të të pushtimit, se forcat ruse po përdorin mbështetje ajrore dhe armë shumë precize në sulmin e tyre.

Ministrat e Jashtëm të NATO-s që u mblodhën një ditë më parë hodhën poshtë thirrjet, përfshirë nga Kievi, për Perëndimin për të vendosur një zonë ndalim-fluturimi në Ukrainë për të vendosur ushtrinë dhe mbrojtjen e saj civile në një pozicion më të barabartë me forcat ruse deri sa Zelenskiy tha po dje se refuzimi i NATO-s për të futur një zonë ndalim-fluturimi tregon “dobësi” dhe mungesë uniteti.

“Të gjithë njerëzit që vdesin nga kjo ditë e tutje do të vdesin gjithashtu për shkakun tuaj, për shkak të dobësisë suaj, për shkak të mungesës suaj të unitetit,” tha ai duke shtuar:

“Aleanca i ka dhënë dritën jeshile bombardimeve të qyteteve dhe fshatrave të Ukrainës, duke refuzuar krijimin e një zone ndalim-fluturimi.”

Komanda ukrainase tha se Kievi vazhdon të luftojë kundër “ofensivës armike”.

Dhjetëra mijëra banorë u grumbulluan në stacionin kryesor të trenit të Kievit, derisa kryesisht gra dhe fëmijë përpiqeshin të largoheshin nga kërcënimi i rrethimit dhe bombardimeve.

Zyrtarët e inteligjencës perëndimore besojnë se Rusia është e gatshme të përpiqet të “bombardojë qytetet për t’i pushtuar”, raporton CNN.

Qyteti kryesor bregdetar jugor i Mariupolit thuhet se mbetet i rrethuar, me ujin dhe energjinë e ndërprerë si pasojë e sulmeve.

OKB-ja ka vlerësuar të paktën 331 vdekje të civilëve. Autoritetet ukrainase thonë se të paktën 2000 civilë kanë vdekur.

Agjencia e OKB-së për refugjatët, UNHCR, tha se më shumë se 1.2 milionë njerëz ishin larguar nga Ukraina që nga fillimi i luftës nga presidenti rus, Vladimir Putin, më 24 shkurt.

Më shumë se gjysma e atyre refugjatëve kanë shkuar në Poloni.

Në Rusi, autoritetet kanë intensifikuar goditjen e tyre ndaj mediave vendase dhe ndërkombëtare deri sa nga Moska zyrtare bëhet e ditur se raundi i tretë i bisedimeve për armëpushim me zyrtarët ukrainas është planifikuar këtë fundjavë, por nuk është konfirmuar koha apo vendi.

CNN citoi burime që thanë se Zelenskiy ka planifikuar sot të zhvilloj një takim online me senatorët amerikanë./RFE/