Zgjerohet harta e gripit të shpendëve, Ministria e Bujqësisë: Vatër e re infeksioni në Vlorë
Zgjerohen vatrat me gripin e shpendëve. Sipas situatës të përditësuar nga zv.ministrja e Bujqësisë, Ermira Gjeçi në 24 orët e fundit ka pasur një rast të ri të konfirmuar nga ISUV në qarkun Vlorë, fshati Aliban. Deri tani rastet e gripit të shpendëve janë konfirmuar edhe në 6 rrethe të tjera, si Durrës, Dibër, Korçë, Devoll, Divjakë dhe Fier.
“Kemi një rast të ri të konfirmuar. Kemi një vatër të re infeksioni në qarkun Vlorë. Nuk kemi asnjë stabiliment me drejtim prodhim për mish të infektuar. Jemi në monitorim të vazhdueshëm të të gjithë territorit . Vazhdojmë fushatën sensibilizuese për informimin e fermerëve mbi evidentimin dhe raportimin e rasteve të dyshuara”, pohoi Gjeçi.
Sakaq nga institucionet shtetërore vijon monitorimi në të gjithë territorin e vendit.
“AKVMB vazhdon kontrollet në ferma me drejtim prodhimtari vezë, mishi dhe miks, në të gjithë territorin e vendit. Autoriteti Kombëtar i Ushqimit vazhdon rregullisht kontrollet në të gjithë territorin e vendit. Nuk janë konstatuar shkelje apo problematika.
Kemi marrë zotim nga bashkitë për bashkëpunim të plotë në lidhje me marrjen e masave për ndalimin e tregtimit të shpendëve të gjallë në mjediset e hapura të pamiratuara për shitje në zbatim të urdhrit Nr.131, datë 25.3.2022 “Për marrjen e masave kufizuese për parandalimin dhe kontrollin e sëmundjes së influencës aviare në shpendë, në mjediset e hapura dhe në tregjet e kafshëve të gjalla,” citon Zv/Ministren e Bujqësisë, Ermira Gjeçi, revista “Monitor” duke përfunduar:
“Konsumatori shqiptar është e rëndësishme të ndihet i sigurt, se ushqimet në tregun tonë, në qendrat e licencuara janë të kontrolluara. Nuk ka asnjë rrezik nga konsumi i mishit dhe vezëve të gatuara me temperature më të larta se 70 gradë Celsius. Nëse konstatoni shenja të dyshimta për influencë aviare në ferma apo oborre, ju bëjmë thirrje të kontaktoni menjëherë veterinerin zyrtar të zonës ose të telefononi falas në numrin e gjelbër 0800 33 66”.
