KPA, shkarkohet Kryeprokurorja e Tiranës, Elisabeta Imeraj
Kolegji i Posaçëm i Apelimit, KPA, ka shkarkuar nga detyra kryeprokuroren e Tiranës, Elisabeta Imeraj.
Pavarësisht se shkalla e parë, KPK, e konfirmoi në detyrë, KPA ka vendosur shkarkimin e Elisabeta Imeraj nga detyra, duke e nxjerrë jashtë sistemit të drejtësisë.
KPA konstatoi se disa kritere nga prokurorja nuk plotësoheshin. Duke iu referuar të dhënave të bëra publike nga KPA, rezulton se për kriterin e pasurisë, për njërën nga pasuritë ka mungesë burimesh financiare.
Mësohet se kryeprokurorja ka bërë një deklarim të pasaktë për një apartament në zonën e Ali Demit, pasi ka mungesë burimesh. Po ashtu thuhet se ka mosdeklarim të gjendjes cash në deklaratat vjetore.
Ndër të tjera flitet edhe për një godinë 5 kateshe në rrugën Sabaudin Gabrani ku thuhet se Imeraj ka kryer deklarim të pasakte dhe të pamjaftueshme.
“Për kriterin e pasurisë; nuk ka raportuar një rekord te kunatit ne Itali. Subjekti gjendet ne kushtet e cenimit te besimit,” u tha sot nga KPA.
Pas vendimit të KPA, Elisabeta Imeraj tha se ka parashtruar pyetjen dhe shpreson që ta kenë të arsyetuar se kush kërkon shkarkimin e saj nga Drejtësia!
“Puna ime në vite besoj që ka folur më së qarti se çfarë funksioni dhe në ç’mënyrë është kryer puna e Prokurorit. Vënia në dispozicion e akteve të punës time, ku 160 të pandehur janë dënuar me dënim të formës së prerë dhe vetëm 3 prej tyre kanë marrë pafajësinë. Jam munduar në këtë proces të përfaqësoj për të gjithë që në çdo moment nga ana ime janë vënë në dispozicion fakte që ky proces ka qenë i afektuar. Vendimi në kundërshtim me ligjin,” tha Elisabeta Imeraj pas vendimit të KPA që tashmë më nuk i duhet nëse e ka mik Edi Ramën dhe me kë ha drekë e darkë.
Ndryshe, më 12 prill, Kolegji i Posaçëm i Apelimit ka vendosur të rihapë hetimin administrativ ndaj prokurores Elisabeta Imeraj, dhe marrjen e provave të reja të kërkuara prej saj. KPA vërejti se gjetjet e vëzhguesit ndërkombëtar përbëjnë provë në vetvete dhe si të tilla do t’i nënshtrohen shqyrtimit gjyqësor.
