Trump dhe Putin do ta zgjidhin çështjen e Kosovës

Çështja e Kosovës pritet të zgjidhet në takimin e Presidentit Trump me homologun e tij rus Putin në Helsinki, shkruan e përditshmja serbe “Blic” duke ju referuar një burimi diplomatik, i cili saktëson se ky është edhe plani i kreut shtetëror serb dhe presidentit të Serbisë, Aleksandar Vuçiç.

“Evropa nuk ka fuqi, as vullnet, as mundësi që të detyroj shqiptarët për të bërë diçka. Për këtë arsye, për çështje kaq të rëndësishme për ne, ideja është që të bijnë dakord Putin dhe Trump, e më pas Evropa ta pranoj si një çështje të mbyllur,” thekson burimi i të përditshmes serbe duke shtuar se të gjithë po presin takimin e presidentit amerikan dhe atij rus i cili do të zhvillohet më 16 korrik në Helsinki.
Burimi diplomatik i “Blic” thekson se Vladimir Putin dhe Donald Trump për Kosovën do të flasin vetëm një minut, aq kohë sa i duhet për të shkëmbyer disa fjali, por kjo do të ishte e mjaftueshme që çështjet të lëvizin nga pika e vdekur dhe të përafrohet të paktën zgjidhja më e shpejtë.

“Trump dhe Putin deri në fund të vitit do të vendosin për Kosovën, ky është një rast i mirë për të gjetur zgjidhjen. Opsionet që ofron BE janë kot, kur asnjëra nga palët nuk i pranon ato,” thekson burimi i të përditshmes serbe duke kujtuar se ishte ambasadori amerikan në Serbi ai i cili për televizionin publik serb, RTS tha se zgjidhja e çështjes së Koosvës mund të ndodhë deri në fund të këtij viti.