Shqipëri-Mali Zi/ Markoviç, vlerat tona: NATO, BE dhe pakicat!

Mbledhja e përbashkët e qeverive të Shqipërisë dhe Malit të Zi, e cila po zhvillohet në Shkodër është  konfirmim i shteteve mike dhe lidhjeve të forta të popujve, tha kryeministri malazez, Dushko Markoviç.

“Fakti se kjo është mbledhja e parë që qeveria e Malit të Zi e organizon me një shtet tjetër konfirmon miqësinë tonë, lidhjet e forta në mes të popujve tanë dhe vendosmërinë që të vazhdojmë dhe kultivojmë marrëdhëniet e mira fqinjësore. Dhe fakti që po zhvillohet në Shkodër, me rëndësi aq të madhe dhe histori, si dhe potencialet që ndajmë, është simbol i vëtetë i marrëdhënieve në mes të Malit të Zi dhe Shqipërisë. E nga viti i kaluar ne jemi aleatë në kuadër të NATO-s, që është edhe një vlerë e marrëdhënieve tona”, tha Markoviç.

Prioritet i Malit të Zi dhe Shqipërisë, tha Markoviç është anëtarësimi në BE. Duke shprehur gatishmërinë e Malit të Zi që edhe në të ardhmen do të jetë mbështetje në realizimin e qëllimeve të përbashkëta integruese, ai tha se do të shkëmbëhen edhe përvojat malazeze.

“Krahas plotësimit të obligimeve tona kemi forcuar dhe përparuar kapacitetet tona, që është edhe njëra ndër vlerat tona më të mëdha të këtij procesi, dhe që do të ketë efekte afatgjate pozitive,” tha Markoviç.

Në fund të fjalës së tij në këtë mbledhje të përbashkët të dy qeverive, Dushko Markoviç theksoj rëndësinë e pakicave në bashkëpunimin e ndërjsellt Mali i Zi-Shqipëri.

“Si temë të veçantë për fund, për shkak të rëndësisë që ka, dëshiroj të theksoj pasurinë që kemi të dy vendet, popujt tanë që jetojnë në njërin dhe vendin tjetër, si pakica e në fakt dua të them, qytetarë: shqiptarët në Mal të Zi dhe malazezët në Shqipëri, që është njëra ndër lidhjet më të rëndësishme të dy vendeve. Shqiptarët në Mal të Zi janë qytetarë që kontribuojnë në përparimin e vendit, pjesëmarrës aktiv dhe promotor të realizimit të prioriteteve strategjike shtetërore, faktor i stabilitetit dhe ndërtimit të së ardhmes më të mirë. Siç janë malazezët në Shqipëri, qytetarë që kontribuojnë në përparimin e saj dhe jetën shoqëroro-politike duke ruajtur traditën dhe identitetin. Gjithsesi, gjithmonë mund të pretendohet më e mira, dhe përpjekjet e qeverive tona duhet të vazhdojnë edhe më tutje të drejtohen nga realizimi i të drejtave të garantuara të pakicave, në përputhje me standardet ndërkombëtare,” përfundoi Markoviç.