“Shaip Kamberi nuk është Putini, që pushteti në Beograd e ka aq shumë frikë”

Banorët e Tërnocit të Madh, fshat vetëm 6 kilometra nga Bujanoci, politika edhe një herë i zhvendosi në qendër të vëmendjes. Në këtë fshat pritet edhe votimi i tretë për të përmbyllur zgjedhjet parlamentare në Serbi.

Për shkak të parregullsive që u konstatuan në qendrën e votimit nr.6 në shkollën fillore “Muharrem Kadriu”, u krye rivotimi. Rivotimi erdhi pas vendimit të Komisionit Qendror të Zgjedhjeve të Serbisë, edhe pse Komisioni Komunal në Bujanoc ka hedhur poshtë kërkesën e Koalicionit të Shqiptarëve – Lugina e Bashkuar, që kryesohet nga Shaip Kamberi.

Në këtë rivotim për liderin e PPD kanë votuar 670 nga 1.086 votues sa ka gjithsej qendra e votimit, që tregonte se Kamberi mund të fitonte mandatin e deputetit të Parlamentit të Serbisë. Por ky nuk ishte fundi i kësaj historie politike kur janë në pyetje shqiptarët e Luginës së Preshevës, pasi që pasoi ankesa e Partisë Socialiste të Serbisë, të cilën Komisioni Komunal e refuzoi por KQZ e konfirmoi. 

Socialistët në ankesën e tyre theksojnë se në rivotim “në qendrën e votimit nr.6 kanë votuar pa dokumente të vlefshme”, vendim ky që ka shty dhe seancën konstituive të Parlamentit të Serbisë. Ndër të tjera edhe për arsye se Koalicioni i Shqiptarëve këtë vendim të KQZ e çoi pranë Gjykatës Administrative të Serbisë.

Fshati Tërnoc ku ndodhet dhe qendra e kontestuar e votimit nr.6 në shkollën fillore “Muharrem Kadriu” është rreth 6 kilometra nga qyteti Bujanocit. Nga Bujanoci deri në këtë fshat rruga është e asfaltuar, përgjatë saj janë shtëpi të vjetra ndonëse ka dhe prej atyre që janë të reja. Shumica e shtëpive janë “nën dry”, sepse pronarët e tyre jetojnë dhe punojnë në vendet e BE. Shumë shtëpi, pak njerëz, edhe pse zyrtarisht në Tërnoc të Madh jetojnë 6 mijë shqiptarë. 

“Nëse na thërrasin të dalim edhe një herë në zgjedhje, ne do të dalim. Pavarësisht nga politika, ne këtu kemi edhe probleme tjera, dhe gjithçka sillet rreth problemit me neve shqiptarëve,” thotë një i ri shqiptar në pastiçerinë “Kanisa”.

Ky fshat është dhe vendlindja e kandidatit për deputet Shaip Kamberi dhe vetë shqiptarët çuditen pse ai që në raundin e parë nuk e ka konfirmuar mandatit të tij të deputetit në Parlamentin e Serbisë.  

Në lajmin e dhënë se Tërnocin e Madh po e viziton një gazetar, shqiptarët na bashkohen dhe flasin hapur rreth asaj se “atyre tani politika nuk ju intereson” sepse “ka kohë që as në Bujanoc, as në Preshevë dhe as në Medvejgjë, nuk është hapur asnjë fabrikë ku do të punësoheshin njerëzit.”

“Në vend se të jetojnë dhe rriten këtu, bashkëqytetarët tanë duhet të shkojnë tek kushërinjtë e tyre në vendet e Evropës. Kryesisht në Zvicër dhe Gjermani, dhe aty me një punë të stërmundimshme të fitojnë para sa për të mbijetuar. Mund të shikoni se sa njerëz do të ketë këtu për tre javë, kur fillon pushimi në vendet e BE, aty ku punojnë kushërinjtë tanë,” thotë Nefati.

Bedri Rashiti është punëtor në punon në sigurimin e Komunës së Bujanocit. Thotë se në Tërnoc jetesa është gjithnjë e më e vështirë, dhe se “mbijetesa e shqiptarëve tashmë varet nga ajo se çfarë mbërrin nga diaspora.”

“Ka rënë interesimi për kultivimin e duhanit, në një kohë që ishte dhe bima kryesore për jetesë. E gjithë rruga e cila ishte e njohur me banorët që mbarështonin kafshë, tani nuk merret më me bujqësi. Gjithçka ka rënë në mbijetesë, sepse nuk ka perspektivë për të rinjtë që të punojnë në profesionin e tyre,” thotë Rashiti për të përditshmen serbe “Danas”.

Në periferi të Tërnocit të Madh është shkolla fillore “Muharrem Kadriu” e cila mbanë emrin e partizanit të njohur shqiptar nga Lufta e Dytë Botërore, i cili iu përkushtua zhvillimit të industrisë, para së gjithash minierës së antimonit që sot është “relike e një kohe”. 

Shkolla është ndërtuar me ndihmën e Agjencisë Tika nga Turqia, për të cilën është dhe një dedikim në një tabelë në hyrje të shkollës, nga nxënësit dhe banorët në gjuhën shqipe, serbe dhe turke. Mësimi vijon nga 700 nxënës shqiptarë. Një godinë kaq moderne nuk ka në këtë pjesë të Tërnocit ndoshta është kjo dhe arsyeja pse me vite të tëra është dhe një qendër votimi për të gjitha zgjedhjet.

Oborri i shkollës është i  madh. Në këtë pjesë të qytetit dikur ishte thertorja e Ndërmarrjes për përpunimin e mishit “Jugokoop” nga Bujanoci.

Në tu kthyer në qendër të qytetit nuk ka asnjë repart prodhimi. Nën dry janë dyqanet, mekanikët dhe gomisterët që ofrojnë vetëm shërbime.

“Probleme ndërmjet serbëve dhe shqiptarëve këtu nuk ka, ka probleme në mes të politikanëve lokal dhe atyre në Beograd, dhe e gjitha në dëm të shqiptarëve. Njerëz të pasur, që të tillë janë rrallë, dhe të varfër, ka si në mesin e shqiptarëve ashtu edhe serbëve. Ata këtu gjithmonë do të jetojnë bashkë, por kjo nuk  mund të thuhet për interesin e politikanëve, para së gjithash atyre që janë në pushtet në Beograd,” sqaron për të përditshmen serbe “Danas”, Kryetari i Këshillit Kombëtar të Shqiptarëve dhe tërnocasi autokton, Ragmi Mustafa. Ai saktëson se shqiptarët në vendet e rajonit, Maqedoni të Veriut, Mal të Zi dhe Bosnje Hercegvoinë “nuk kanë probleme sepse në njëfarë mënyrë janë integruar në sistem, gjë që nuk është rasti me Serbinë”.   

“Duhet të raportoni se nuk është edukatë që Presidenti i Serbisë, dhe Kryeministrja, kur futen në Bujanoc ulen në kafe në qendër të qytetit, dhe nuk duan të futen në godinën e Komunës Bujanoc, vetëm për arsye se në krye është një shqiptar,” thonë qytetarët e Tërnocit.

Dëgjojmë se vende pune për shqiptarët pjesërisht ka vetëm në Poliklinikë!  

“Tani problemi, edhe me Shaipin. Po ky nuk është Putini, që e kanë aq shumë frikë Vuçic e Daçiç. Është e qartë se dikush dëshiron që në Parlamentin e Sebisë, shqiptarët jo të kenë 10, për asnjë përfaqësues. Nëse Kamberi arriti ti ‘tund’ atëherë është e qartë e gjithë kjo situatë e ngatërruar me votat për mandatin e tij” thotë Isuf për gazetën serbe “Danas”.

Në afërsi të njërës prej tre xhamive në Tërnoc të Madh janë dy rimorkio traktori përplot me dru për ngrohje. Ndërsa po i shikojmë del një njeri dhe pyet fillimisht në gjuhën shqipe, e më pas edhe në atë serbe:

“Dëshironi dru?”

Kur e sqarojmë se cila është arsyeja e vizitës sonë në Tërnoc, ai na thotë se “politika nuk i intereson”.

“Zotëri, politikë është jeta. Nëse nuk e shes këtë rimorkio me dru nuk do të kem para të blejë një thes me miell, vaj dhe krip për familjarët e mi dhe tu çoj lartë në mal,” thotë shqiptari i cili është nga Tërnoci i Vogël dhe ka ardhur të fitoj diçka në fshatin qendror. Të gjithë ne e mbyllëm gojën.

Shqiptarët në Tërnoc  të Madh nuk janë njerëz të pasur. Ata si të tjerët i mundon varfëria, shqetësimi për shëndetin dhe perspektiva e fëmijëve.

I gjithë rrëfimi politik rreth përsëritjes së votimeve është një “shembull i keq” se si po injorohet vullneti i mirë zgjedhor i atyre që duan të integrohen në sistemin e Serbisë. Ndryshe, shqiptarët e Luginës se Preshevës deri më sot, që nga vendosja e sistemit shumëpartiak në Serbisë në vitin 1991, kishin vetëm dy deputetë. I pari ishte profesori i fizikës nga Presheva dhe themeluesi i Partisë për Prosperitet Demokratik, PPD, Riza Halimi, në tre mandate, e më pas pasardhësi i tij, Shaip Kamberi. Shqiptarët kurrë nuk kishin një post ministror, ose sekretar shteti, përveç se disa poste në Qendrën për Koordinim për Serbinë e Jugut, të cilat që nga viti 2000 e deri më sot nuk ishin ekzekutive./Danas/