Arrestimet e zyrtarëve, PS rikthen nismën në Kuvend/ Ja provat që duhet të paraqesë Prokuroria

Në janar të këtij viti maxhoranca me anë të një nisme kërkonte që të ndryshonte rregulloren e Kuvendit, në rastet kur Prokuroria kërkonte arrestimin e një ministri apo deputeti.

Por pas shumë debateve maxhoranca u tërhoq nga kjo nisme dhe e ngriu atë, por duket se pas shtatë muajsh e ka kthyer sërish si nismë.

Këto kërkesa për ndryshime u bënë në një kohë, kur në Kuvend shqyrtohej lejimi ose jo i arrestimit të Saimir Tahirit, shkruan Panorama.

Maxhoranca depozitoi në Parlament ndryshim të rregullores së Kuvendit, në të cilën është riformuluar nga e para neni 118 që jep “autorizimin për procedimin” e një deputeti apo një anëtari të Këshillit të Ministrave.

Me ndryshimet e reja, prokurori që do të kërkojë arrestimin e një deputeti, heqjen e lirisë apo kontrollin e banesës së tij, duhet t’i paraqesë kërkesën kryetarit të Kuvendit. Në këtë kërkesë, veç relacionit të arsyetuar, prokurori duhet të paraqesë dhe provat mbështetëse mbi të cilat bazon akuzat për arrestimin e deputetit.

Procedurë kjo e re, pasi deri më sot prokurori, të drejtën e paraqitjes së provave mund ta bëjë vetëm para Gjykatës.

Por pas tërheqjes nga kjo nismë, PS duket se i është rikthyer edhe një herë dhe tenton që të bëjë ndryshimet në rregullore.

Këto ndryshime u denoncuan dhe nga Partia Demokratikë me anë të deputetit Oerd Bylykbashi, i cili në një dalje për mediat ditën e shtunë, deklaroi se kjo nismë është futur sërish në Kuvend.

“Edi Rama dhe Gramoz Ruçi bashkë e kanë kthyer Parlamentin jo vetëm në strehën e kriminelëve, por e kanë kthyer edhe në mbrojtësin e kriminelëve. Gramoz Ruçi po sjell në Parlament me kërkesë të Edi Ramës për miratim, të enjten që vjen, të një vendimi i cili rastin “Tahiri” e kthen në rregull.”, ishte kjo një pjesë e deklaratës së Bylykbashit.