Sali Berisha: Edi Rama, ne të dy jemi armiq!

Kryetari i Partisë Demokratike, Sali Berisha, para qindra mijëra qytetarëve që iu përgjigjën thirrjes për të protestuar, kishte mesazhe të qarta si për fajtorin që Shqipëria është në rrezik ashtu dhe për të gjithë ata shqipëtarë që kanë filluar të humbin besimin se ky vend nuk bëhet!

Edi Rama, ne të dy jemi armiq. Ti do vetëm pushtetin kurse unë me këta bura, gra, djem e vajza kemi parim lirinë dhe vetëm lirinë, tha Sali Berisha duke u betuar para flamurit se votën kurrë nuk do t’ia fal Kryeministrit aktual!

“Keni ardhur nga mijëra kilometra larg, nga SHBA, Europa, për t’u bashkuar me frontin e shpëtimit të Shqipërisë. Zoti ju bekoftë. Mirënjohje për djemtë dhe vajzat, gratë e burrat që lanë gjithçka dhe u bashkuan në protestë, duke u bërë burim drite, dielli, shprese për mbarë shqiptarët.

Sonte më shumë se kurrë, mendjet, zemrat e sytë e mbarë shqiptarëve janë drejtuar tek ju. Erdhën nga të katër anët në bulevard sepse ju thirri ora e lirisë, ju thirri ora e Shqipërisë. Pushtimi ju ngriti në këmbë, për të shpëtuar vendin. ka vendosur monizmin plotë, ai ia mbathi, koha e tij është e numëruar.

Edi Rama, ne të dy jemi armiq, është e rëndë ta them këtë por zemra ime fjalë tjetër nuk nxjerr. Ti do vetëm pushtetin kurse unë me këta bura, gra, djem e vajza kemi parim lirinë dhe vetëm lirinë. Ne jemi armiq Edi Rama sepse ti pushtetin e do për të pasuruar veten duke varfëruar e poshtëruar qytetarët ndërsa unë dhe këta protestues këtu, lirinë e duan për të bërë të lirë shqiptarët, për t’iu kthyer atyre dinjitetin,” tha Sali Berisha duke i bërë të qartë Edi Ramës se nuk e njohin pushtetin e vjedhur.

“Edi Rama, jemi sot këtu për t’u betuar para flamurit të kombit, se votën kurrë nuk ta falim, pushtetin mbi votën e vjedhur kurrë nuk ta njohim. Harroje. mos luaj me votën sepse jemi të vendosur të mos pranojmë kurrë. Jemi vendosur të bëjmë çdo sakrificë që burrat dhe gratë, djemtë e vajzat e Shqipërisë të votojnë me dinjitet dhe të vbotojnë të lirë.

Edi Rama, ti këto kohë, këto vite, je treguar armik i fjalës së lirë. Je treguar armik i egër i fjalës së lirë. Ti ke përdorur metodat e frikës dhe terrorit për të zhytur shqiptarët në heshtje dhe mbyllur gojën e tyre. Ti ke përdorur tendera për të blerë mediat e vendit. Vërsulesh dhe shan me gjuhë ordineri gazetarët vetëm se ata bëjnë detyrën e tyre. Jam këtu për të garantuar shqiptarët se fjala e lirë do të jetë motoja jonë, beteja jonë dhe ata që guxojnë të prekin fjalin do të mjerohen”.

Duke konkluduar se ky është vetëm fillimi i marshit opozitar të lirisë, Kryetar i PD u zotua se Edi Ramës do ti presin biletën:

“Edi Rama, nga ky shesh, në emër të qytetarëve shqiptarë të bëj thirrje, boll vodhe, ik. Shqipëria është në rrezik sepse në rrezik është e ardhmja e saj. Një komb që lind dhe rrit fëmijë për emigracion, është një komb pa rini, po të ardhme. Edi Rama në 5 vite largoi 540 mijë të rinj dhe shqiptarë nga Shqipëria. As Çubrilloviçi nuk do kishte ndjekur një politikë tjetër ndaj shqiptarëve,” tha Kryetari i PD, Sali Berisha, duke përfunduar:

“Edi Rama ka një urrejtje gjenetike ndaj shqiptarëve, sepse i përket atij soji që vriste, ekzekutonte, burgoste, qytetarët shqiptarë dhe që e dinte që ata të shtypur i urrenin për vdekje bllokmenët hoxhistë. Për të gjitha këto qëndrime, ne do t’i presim atij biletën dhe ky është vetëm fillimi i marshit tonë të lirisë.”

Ndryshe, nga protesta e organizuar nga Partia Demokratike dhe shoqëria civile nuk munguan mesazhe nga të gjitha shtresat shoqërore që në këtë protestë dëshmuan se janë të vendosura ta ndëshkojnë fajtorin që sot gjimnazisti, studenti, inxhinieri, biznesmeni, diplomati e madje edhe mjeku janë në gjendje të mjerueshme sepse Edi Rama qeverisë!