Përballje e ashpër e kandidatëve për Kryeministër të Britanisë

Rishi Sunak dhe Liz Truss janë përballur rreth të ardhmes së ekonomisë britanike, në debatin e tyre të parë televiziv.

Ish-Sekretari britanik i Thesarit dhe ministrja e Jashtme britanike, raporton RFE, garojnë për pozitën e kryetarit të Partisë Konservatore, pozitë që mundëson me automatizëm edhe pozitën e kryeministrit, pas dorëheqjes së Boris Johnsonit javë më parë.

Sunak i tha Trussit se plani i saj për taksa do të përballë miliona njerëz me mjerim dhe diçka e tillë do të bie si barrë për Partinë Konservatore në zgjedhjet e ardhshme.

Truss tha se rritja e taksave, vendim i Sunakut, do të çojë në recesion.

Të dy garuesit, të cilët kanë qenë në kabinetin e njëjtë deri tri javë më parë, kanë pasur me raste qëndrime shumë të ashpra ndaj njëri-tjetrit.

Pas debatit, mbështetësit e Trussit janë ankuar se Sunak ka qenë shumë agresiv ndaj saj, diçka që kampi i Sunakut e ka mohuar.

Megjithatë, të dy kanë zbutur tonet në fund të debatit.

Truss ka thënë se do të donte ta kishte Sunakun në ekipin e saj, nëse bëhet kryeministre.

Sunak, në anën tjetër, ka lavdëruar qëndrimin e Trussit ndaj Rusisë.

Të dy konkurrentët do të bëjnë fushatë në javët në vijim për të bindur rreth 180,000 anëtarët e Partisë Konservatore me të drejtë vote.

Fituesi i zgjedhjeve, raporton RFE, do të bëhet publik më 5 shtator.

Johnson, i cili ka dhënë dorëheqje më 7 korrik, pas disa muajsh të skandaleve etike, vazhdon të jetë në krye të Qeverisë britanike, derisa t’i zgjidhet pasardhësi.