Arsimi në rrezik, Berisha: Edukimi, procesi më serioz i PD nesër në pushtet!
Aksioma e njohur, hap një shkollë të mbyllësh një burg, jo vetëm që nuk respektohet nga ardhja e Partisë Socialiste me në krye Edi Ramën në pushtet, por krahasuar me 9 vite më parë sot kemi 208 mijë nxënës dhe studentë më pak. Më këtë situatë alarmante, në takimin me mësues dhe ekspertë të arsimit parauniversitar, Kryetari i Partisë Demokratike, Sali Berisha, sjell shifra të frikshme që konstatojnë se Edukimi është në rrezik, sot kur janë mbyllur 620 shkolla, janë dyfishuar policët ndërsa janë trefishuar burgjet!
Para mësuesve dhe ekspertëve të arsimit, Kryetari i PD u zotua se Edukimi do të jetë procesi më serioz i veprimtarisë së Partisë Demokratike nesër në pushtet.
“Nga 9 vite më parë, ne numërojmë 208 mijë fëmijë, nxënës, studentë më pak në shkollat tona. Kemi një rrokullisje prej 27%. Dhe ju jeni dëshmitarë të gjendjes reale të nxënësve, gjendjes familjare, mes fshatit dhe qytetit, mes të mëkëmburve dhe të varfërve, kemi një shpërfillje ndaj figurës së misionarit të këtij procesi që është mësuesi. Kemi një ndryshim thelbësor në filozofinë e edukimit.
Gradualisht është spostuar edukimi i bazuar në vlerat, liritë, dinjitetit, me edukimin e nënshtrimit të bazuar në nënshtrim. Është vendosur një kontroll i turpshëm mbi mësuesin. Qëndrimet e tyre në median sociale janë jo të pakta rastet kur ata janë pushuar, apo transferuar për statuset në Facebook-un e tyre. Por është i papranueshëm trajtimi i tyre material,” tha Sali Berisha ndërsa foli për infrastrukturën shtoi se ajo përsëri është në rrënim.
“Sot 90% e shkollave nuk kanë ngrohje, nuk kanë ngrohje as shkollat në Tiranë sepse kreu i bashkisë shpenzon 10 milionë euro për dezinformim mediat, për furça të pseudopersonalitetit të tij. A mund të imagjinohet? Dhe nuk i shpenzon ato 10 milionë euro për ngrohjen e shkollave të Tiranës. 70% e shkollave nuk kanë ujë të rrjedhshëm. Dhe kushtet në këto shkolla janë njësoj që nga koha kur janë krijuar shkollat ndoshta, jo dekada, por edhe shekuj mbrapa.”
Kjo qeveri ka përdhosur dhe aksiomën e njohur, hap një shkollë të mbyllësh një burg, ku përveç mbylljes së 620 shkollave ka tre fishuar kriminalitetin.
“Shkollat në Shqipëri mbyllen njëra pas tjetrës. Janë mbyllur 620 shkolla. Ndërkohë është dyfishuar numri i policëve. Është 2-3-fishuar kriminaliteti. Janë 2-3-fishuar burgjet. Aksioma e njohur, hap një shkollë të mbyllësh një burg, këtu është shndërruar mbyll një shkollë, të hapësh një burg,” tha Kryetari i Partisë Demokratike, Sali Berisha, duke siguruar se Arsimi do jetë prioritet i PD nesër në pushtet!
“Duke garantuar ju se për ne edukimi është një proces themelor duke filluar nga pasqyrimi i tij dhe reflektimi i tij në identitetin tonë kombëtar, në të sotmen dhe të ardhmen tonë, ne e kemi dhe do ta kemi këtë proces, procesin më serioz të veprimtarisë së PD nesër në pushtet.”
