Trafiku shqiptaro-serbë i drogës në Mitrovicë
Derisa në pajtimin shqiptaro-serb po dështon si politika vendore ashtu edhe ndërkombëtare, biznesi dhe së fundi edhe trafiku ndërkombëtar i drogës po shënon rezultate të konsiderueshme në qytetin e ndarë të Mitrovicës. Këtë më së miri e dëshmon rasti i fundit i arrestimit të pesë personave nga jugu dhe veriu i Mitrovicës, të përfshirë në punën e një laboratori të drogës që u zbulua nga policia, në fshatin Çukiq të Zubin Potokut.
KosovaPress raporton se bëhet fjalë për tre shqiptarë dhe dy serbë, që të gjithë nga qyteti i Mitrovicës.
Të arrestuarit me inicialet A.A, B.Ç, B.V, R.K dhe D.P, dyshohet se janë përfshirë në punën e këtij laboratori që ka shërbyer për përpunimin e drogave si heroinë dhe morfinë.
“Tre prej këtyre personave ndodhen tashmë në arrest shtëpie, ndërsa dy të tjerëve u është caktuar masa e paraburgimit prej 30 ditësh. Ata dyshohet se kanë ndihmuar secili në formën e vet në punën e laboratorit i cili ka shërbyer për përpunimin e narkotikëve të ndryshëm me anë të barnave, acideve, tabletave dhe të ngjashme, të cilat ndihmojnë në prodhimin e drogave sintetike dhe substancave psiko-aktive”, theksojnë burime të KosovaPress, duke shtuar se ka akoma persona të përfshirë, por që janë në kërkim të Policisë.
Drejtoria e Përgjithshme e Policisë së Kosovës nuk japin emra por lidhur me shtesë rreth të aksionit theksojnë se në vazhdën e veprimeve operativo-hetimore dhe në funksion të zbatimit të ligjit, me datë 05.06.2018 në Veri të Mitrovicës, përkatësisht në Zubin Potok, me urdhër të Gjykatës, policia ka realizuar aktivitetet e saja me qëllim të parandalimit dhe luftimit të trafikimit me narkotikë.
“Si rezultat i veprimeve policore, gjatë kontrollit në një vend malor, në një ahur të improvizuar si dhomë është zbuluar laboratori i cili dyshohej se shërbente për përpunimin e drogave sintetike, disa medikamente, katër armë të gjata, disa radio-lidhje dhe pajisje tjera të dyshuara, të cilat janë konfiskuar në cilësi të provave materiale. Policia e Kosovës ka arritur të identifikoj dy persona të dyshuar, të cilët dyshohet se janë përfshirë në këtë aktivitet kriminal, njëri serb nga Kosova ndërsa tjetri serb nga Serbia, të cilët janë në kërkim policor. Policia e Kosovës ne bashkëpunim dhe koordinim me organet e drejtësisë është duke vazhduar me hetime”, thuhet në përgjigjen e policisë dërguar Agjencisë kosovare të lajmeve KosovaPress.
