Bilanci i sezonit turistik, Rama: Ky sektor përbën 17% të PBB, qershor-gusht të ardhurat u rritën 30%

Turizmi përbën 17% të Prodhimit të Brendshëm Bruto, PBB, në vend. Kryeministri Edi Rama, së bashku me ministret e Turizmit dhe Financave, si dhe kryebashkiaken e Durrësit zhvilluan një takim për bilancin e sezonit turistik në vend, në kuadër të Ditës Botërore të Turizmit.

“Kemi pasur një diversifikim shumë domethënës të fashave nga Veriu në Jug, falë edhe investimeve të mirëmenduara që janë edhe pikat më tërheqëse të Veriut sidomos një turizëm që ka sjellë disa vizitorë në disa qytete. Kjo shikohet edhe nga hotelet që kanë qenë plot e për plot dhe në rrugë digjitale.

Turizmi ishte rreth 4% kur ne e morëm drejtimin e vendit. Kemi qenë një vend pa turizëm. Sot është 17% në prodhimin kombëtar. Kemi qenë një vend dhe kjo gjë ka vazhduar prej disa vitesh që bëhej lajm për pisllëkun që dilnim në mediat e huaja si një vend pis i ndotur. Kemi pasur një nga gangrenat më të mëdha të Shqipërisë. Fushën e plehrave të Durrësit e cila bënte lajm çdo verë. Në gjithë mediat që shkruajnë për turizmin Shqipëri e nxjerrë kokën”, deklaroi kryeministri.

Ministrja e Financave dhe Ekonomisë, Delina Ibrahimaj, deklaroi se qarkullimi i të ardhurave në sektorin e turizmit është rritur me 30% gjatë muajve qershor-gusht, ndërsa punësimi është rritur me 4 për qind krahasuar me një vit më parë.

“Që në vitin 2021 kontributi i turizmit në GDP e vendit rezultoi 7.5%, pra vetëm ato struktura që lidhen ngushtësisht dhe drejtpërdrejt me turizmin, pra hotelet, restorantet, agjencitë e udhëtimit apo kompanitë e dhënieve me qira të shtepive dhe makinave.

Kontributi i atyre sektorëve që lidhen indirekt, kontribuojnë në turizëm, si sektorët e transportit, të investimeve në strukturë turistike, në ndërtime hotelesh, në ndërtim rrugësh, në ndërtime marinash etj., të ardhurat shkojnë në 17.5%.

10 vite më parë kontributi ishte 3-5%, ndërsa në 2021 ishte 17.5%.

Këtë vit, vetëm në qershor-gusht kemi pasur një rritje të qarkullimit të këtij sektori me 30%. Ka pasur qytete me rritje më të lartë Saranda dhe Durrësi, por të gjitha qytetet kanë pasur një rritje të qarkullimit mbi 28%.

Rritje e punësimit të turizmit me 4% krahasuar me vitin e kaluar, që tregon se kapacitetet janë rritur, numri i bizneseve është rritur, që numri i net-qëndrimeve, i shfrytëzimit të kapaciteteve është rritur, pra tregon një ecuri shumë pozitive”, tha Ibrahimaj.

Sa i përket vizitorëve të huaj gjatë vitit 2022, vizitorët nga Gjermania dhe Italia kanë një rritje përkatësisht me 60 dhe 85%.  Ndërsa të ardhurat e bashkive nga menaxhimi i plazheve janë rritur me 74% krahasuar me 2019, deklaroi ministrja e Turizmit, Mirela Kumbaro.

“Të ardhurat e bashkive nga menaxhimi i plazheve krahasuar me vitin 2019 janë rriture me 74%. Bashkia e Himarës ka një rritje rekord prej 137%”./Monitor/