Takimet në Jug të Shqipërisë, Berisha: Edi Rama dhe Saimir Tahiri kryen krime kundër njerëzimit!

Situatë dramatike, ky ishte konstatimi i Kryetarit të Partisë Demokratike, Sali Berisha pas takimeve që zhvilloi me banorët në Jug të Shqipërisë, ku gjendja ishte e mjeruar dhe vendi ishte shpopulluar.

Duke falënderuar banorët e zonës për mikëpritje, Kryetari i PD tha se nga Lazarati u kthye më i impresionuar se kurrë në 30 vite nga një vizitë, por aty kishte konstatuar se Edi Rama dhe Saimir Tahiri kanë kryer krime kundër njerëzimit.

“Jugu ndodhej në situatën më dramatike. Falenderim për debatin e hapur, mendimet dhe opinionet që shprehen në takimet që unë zhvillova në salla, në rrugë, në kafene, me qytetarët e Gjirokastrës, Derviçanit, Memalijt, Libohovës. Në të gjitha këto takime, kthehem më i motivuar se kurrë, në përpjekjen tonë për të shpëtuar Gjirokastrën dhe Shqipërinë nga regjimi absolutist i Edi Ramës.

Unë me përgjegjësi të plotë mund t’u them shqiptarëve, se jugu i Shqipërisë ndodhej në situatën më dramatike, se shpopullimi i Gjirokastrës dhe jugut është i paimagjinueshëm. Se rrënimi ekonomik si shkak kryesor i këtij shpopullimi, tejkalon të gjitha përmasat. E kam menduar disa herë në udhëtimin tim, mund ta vlerësoj si udhëtimin në katakombet e biznesit të jugut. Do u jap vetëm një shembull: në Libohovë nga 50 kompani ndërtimi në vitin 2013, nuk kishte asnjë sot,” tha Sali Berisha duke e cilësuar një politikë jashtëzakonisht perfide për shpopullimin e kësaj zone që ndiqet nga qeveria.

“Largimi i të gjitha institucioneve nga Gjirokastra, kishte boshatisur si qendër administrative si kurrë në ekzistencën e saj në shekuj. Nuk më hiqet nga mendja një nënë pensioniste që më thotë: i thuaj Edi Ramës, si mund të shkoj unë në Tiranë për një certifikatë me pensionin që kam. Nuk udhëtoj dot, se rruga më kërkon aq para se marr unë pension. Dhe unë mbetem pa shërbim, pa certifikatë. Kjo gjendje shprehej në mënyrë të dhimbshme në universitetin e Gjirokastrës. Nga një qendër e fuqishme rajonale, sot atje dominonte mungesa masive e studentëve dhe boshatisja e universitetit. Në një farë mënyre, të gjitha masat e kësaj qeverie çonin në vdekjen e një qyteti, që sot qendron në kurorën e trashëgimisë kulturore botërore.”

Nga Lazarati po kthehej më i impresionuar se kurrë ndërsa kishte konstatuar se Edi Rama dhe Saimir Tahiri kanë kryer krime kundër njerëzimit.

“Unë u ktheva më i impresionuar se kurrë në 30 vite nga një vizitë, nga vizita ime në Lazarat. Çfarë konstatova aty? Me bisedimet e shkurtra, konstatova se Edi Rama dhe Saimir Tahiri kanë kryer krime kundër njerëzimit në këtë fshat. Krime të vërteta me operacionin e tyre anti-drogë. Bandat kriminale me uniformë nuk kanë ngurruar të vendosin tytën e automatikut fëmijës 2-3 vjeçar, nënës që mbronte fëmijët, kryeplakut të fshatit t’i shkrehin bresëhritë pse bënte detyrën. Një terrorizëm të tillë Lazarati nuk e ka parë kurrë në jetën e tij.

Unë i garantoj banorët se shumë shpejt do organizoj skuadra dhe grupe hetime për të mbledhur dhe evidentuar këto krime. Edi Ramës i them se do marrë ndëshkimin e merituar për këto krime. Ne mbetemi parti e zbatimit të ligjit, por nuk mund të pranojmë kurrë brutalitete ndaj personave pa asnjë lidhje me operacionin e tyre,” tha Kryetari i Partisë Demokratike duke mos harruar dhe minoritetin, aty ku armik i qenies së tyre është sekti i Rilindjes.

“Sot armik i qenies së tyre është sekti i Rilindjes, që i vjedh, i plaçkit dhe i keqtrajton ata çdo ditë. Vizitova Derviçanin, Dropullin. Po shkretohej minoriteti. Ajo zonë ka pesë ndërmarrjet më të mëdha të Shqipërisë. Çdo ditë ato përballen me probleme të mëdha të energjisë sepse nuk u dërgohet korrenti 20 kilovolt. U thashë se Edi Rama mund të vijë dhe të thotë disa fjalë greqisht, por ai është hipokrit, një armik i lirive të tyre,” tha Kryetari i Partisë Demokratike, Sali Berisha, duke përfunduar:

“Ndaj u bëj thirrje që të lidhemi me një zotim solemn. Sot armik i qenies së tyre është sekti i Rilindjes, që i vjedh, i plaçkit dhe i keqtrajton ata çdo ditë. Falenderoj edhe njëherë të gjithë mikpritësit e mi, kthehem me mirënjohjen më të thellë ndaj tyre.”