Kurti: Nuk e kam dëgjuar fjalimin e Ramës, qëndrimi im për Gjykatën Speciale dihet
Fjalimin e kryeminsitrit të Shqipërisë, Edi Rama, para Asamblesë së Përgjithshme të KiE tha se nuk e ka dëgjuar meqë kishte një agjendë të ngjeshur, por Kryeministri i Kosovës, Albin Kurti, tha se qëndrimi i tij për Gjykatën Speciale është i njëjtë sikurse ai që kishte në vitin 2015.
“Kam qenë në Peje sot dhe tërë ditën nëpër takime të shumta e në mbrëmje përpiqem të përditësohem për mëngjesin e nesërm. Brengën e shqetësimin tim dhe kritikën e kundërshtimin tim unë e kam thënë në pranverën e verën e vitit 2015 kur u patën përgatitur amendamentet kushtetuese që në qershor nuk kaluan e në gusht u risollën pa u ndryshuar. Nuk kam qëndrime të reja për këtë çështje.” tha Albin Kurti duke shtuar se Dhomat e Specializuara nuk u karakterizuan për nga transparenca.
“Pra nuk mund të lavdërohen për transparencë dhe po ashtu së shpejti bëhen dy vjet që kemi mbajtjen në paraburgim pa një datë gjykimi. Mbi të gjitha unë besoj që faktorët ndërkombëtar do të duhej të mobilizohen që krimet e kryera gjatë luftës në Kosovë nga forcat e Serbisë, të ndiqen dhe gjithashtu përgjegjësit e faktorët të gjykohen e dënohen,” tha Kryeministri Kurti i prerë se kushdo që flet në arenën ndërkombëtare do të duhej nga faktorët ndërkombëtar ta trajtojë këtë çështje sepse në Kosovë tha ai ka ndodhur gjenocidi të cilin e ndaloi NATO-ja dhe ende ka pa numër krime të pa adresuara.
“Nuk mund të flasësh për luftën në Kosovë e ta mbrosh Kosovën pa e adresuar krimin e Serbisë në Kosovë!”
Komentet rreth kërkesës së Kryeministrit të Shqipërisë, Edi Rama, para Asamblesë Parlamentare të Këshillit të Evropës për anulimin e Raportit të Dick Martyt, Kryeministri i Kosovës, Albin Kurti, i bëri pasi pranoi Raportin e Komisionit Evropian për Kosovën nga Shefi i Zyrës së Bashkimit Evropian në Prishtinë, Tomas Szunyog.
Kurti: Raporti i KE-së vlerëson shumë të arritura në Kosovë
Ky është raporti i parë që përfshinë periudhën e plotë njëvjeçare të qeverisjes së tij, cila sipas tij, ka shënuar progres në shumë fusha, tha Kryeministri i Kosovës, Albin Kurti, në një dalje publike me Shefin e Zyrës së Bashkimit Evropian në Prishtinë, Tomas Szunyog, pasi ky i fundit i dorëzoi Raportin e Komisionit Evropian për Kosovën.
“Përkundër krizave globale me të cilat u përball jo vetëm Kosova, por i gjithë kontinenti evropian që nga pasojat e pandemisë deri te kriza e energjisë dhe ajo e inflacionit, Raporti përgëzon Kosovën për stabilitetin dhe qëndrueshmërinë politike,” tha Kurti në fillim duke shtuar se lufta kundër korrupsionit dhe krimit të organizuar dhe pa skandale, e ka ngritur Kosovën në raportet ndërkombëtare.
Ambasadori i BE-së në Prishtinë, Tomas Szunyog, nga ana e tij tha se Raporti i KE-së për këtë vit, njeh progresin e përgjithshëm të Kosovës, veçanërisht në sundimin e ligjit, si në krahasim me vitin e kaluar ashtu edhe me vendet e rajonit.
“Me një qeverisje të mirë po ofrojmë një klimë të përshtatshme të bërit biznes, vitin që lamë pas shënuam rritje ekonomike 10.7 për qind të bruto-produktit vendore kjo është më shumë se çdo vit tjetër në historinë e shtetit tonë,” tha Albin Kurti duke shtuar se lufta në Ukrainë pas agresionit rus ka forcuar nevojën për unitet në Evropë dhe ka ringjallur agjendën e zgjerimit.
“Kjo vëmendje politike për Ballkanin i jep shpresë Kosovës që të avancojë në rrugëtimin evropian. Kosova është rreshtuar menjëherë me perëndimin,”
Me këtë rast, Kryeministri Albin Kurti tha se Kosova ka intensifikuar angazhimin sa i përket liberalizimit të vizave dhe dy muaj më parë, i ka dorëzuar Komisionit Evropian një raport të detajuar për progresin në sundim të ligjit, luftën kundër korrupsionit dhe menaxhimit të migrimit, fusha në të cilat shtetet anëtare kanë pasur hezitime, ndërsa përfundoi:
“Të arriturat tona janë konfirmuar nga Komisioni dhe mirëpritur nga të gjithë vendet anëtare të Këshillit dhe kemi arritur të futemi në agjendë të Grupit të Punës për viza pas më shumë se katër vitesh.”
