Të mbijetuarit e dhunës seksuale, Osmani: Përvoja e Kosovës mund ta ndihmojë Ukrainën!
Presidentja e Kosovës, Vjosa Osmani, në takim me delegacionin e Rrjetit Global të Viktimave dhe të Mbijetuarve të Dhunës Seksuale të Luftës nga Ukraina e Kolumbia, tha se përvoja e Kosovës mund ta ndihmojë Ukrainën në trajtimin e të mbijetuarve të dhunës seksuale.
“Sot prita një Delegacion të Rrjetit Global të Viktimave dhe të Mbijetuarve të Dhunës Seksuale të Luftës nga Ukraina dhe Kolumbia. Përvoja e Kosovës mund ta ndihmojë Ukrainën në trajtimin e të mbijetuarve të dhunës seksuale. Populli i Kosovës është në krah të popullit ukrainas dhe do të vazhdojë mbështetjen ndaj tij me të gjitha mundësitë,” shprehet përmes rrjetit social Facebook Vjosa Osmani pas takimit.
Historia më e re e Kosovës, tha Presidentja Vjosa Osmani, bart në vete rrëfimin e trishtë të mbi 20 mijë grave të dhunuara gjatë luftës së vitit 1999 nga regjimi i Serbisë.
Ndërsa Kryeministri i Kosovës, Albin Kurti sot në takim me përfaqësuesit e Rrjetit global të viktimave dhe të mbijetuarve të dhunës seksuale gjatë luftës SEMA shprehu keqardhje për të dhënat rreth krimeve të dhunës seksuale të raportuara në Ukrainë.
Raportet tregojnë se Rusia po përdor dhunën seksuale si pjesë të strategjisë së saj ushtarake në Ukrainë, tha kryeministri, duke shprehur keqardhje të thellë për situatën e rëndë atje.
“Kjo na kujton luftën tonë të viteve 1998-1999 në Kosovë, dhe siç ndodhi këtu, dhe në të gjitha luftërat e tjera, numri i të mbijetuarve ka gjasa të jetë shumë më i lartë se sa sugjerojnë shifrat zyrtare, sepse krimet seksuale shpesh nuk raportohen, për shkak të stigmës që i rrethon,” është shprehur Albin Kurti, njofton zyra për informim e Kryeministrit.
Përfaqësuesit e rrjetit SEMA, Iryna Dovgan dhe Volodymyr Shcherbachenko nga Ukraina, si dhe Pilar Rueda dhe Angela Maria Escobar nga Kolumbia, nga ana e tyre shprehën mirënjohjen e tyre për mbështetjen dhe mundësinë për të shkëmbyer përvojat lidhur me dokumentimin dhe drejtësinë për krimet e dhunës seksuale gjatë luftës.
Kurti, theksoi se Qeveria e Kosovës, po punon ngushtë me institucionet si dhe organizatat e shoqërisë civile, në procese të drejtësisë tranzicionale gjithëpërfshirëse, të përqendruara te viktimat dhe me ndjeshmëri gjinore, që plotësojnë nevojat dhe kërkesat e të mbijetuarve të dhunës seksuale.
Ai përmendi punën e Komisionit Qeveritar për Njohjen dhe Verifikimin e Statusit të të Mbijetuarve të Dhunës Seksuale gjatë Luftës, që u mundëson të mbijetuarve të aplikojnë për njohjen e statusit, e që garanton trajtim të sigurt të informacionit dhe mbrojtjen e të drejtave të tyre. Po ashtu, theksoi se për lehtësim të qasjes në drejtësi, Qeveria ka rritur buxhetin për 4 prokurorë, 6 profesionistë dhe 2 përkthyes shtesë për krimet e luftës, thuhet në njoftim për takimin e përbashkët me zëvendësministren e Drejtësisë, Nita Shala dhe përfaqësueset e organizatave joqeveritare ndërsa përfundon:
“Duke veçuar kontributin e Vasfije Krasniqi, u theksua domosdoshmëria e angazhimit të mëtejmë të përbashkët për të luftuar stigmën që rrethon dhunën seksuale gjatë luftës.”
