Quinti më tha: Kërkesa e Kosovës, legjitime! Vuçiç: Gënjeshtra!

Pas takimit me përfaqësuesit e serbëve të Kosovës, Presidenti i Serbisë, Aleksandar Vuçiç, mbajti dhe mbledhjen e Këshillit të Sigurisë Kombëtare për të përfunduar me një deklaratë para opinioni publik duke thënë se autoritetet kosovare kanë mbështetjen e shteteve të Quintit që aksionin e targave e konsiderojnë legjitim, ndërsa ai dhe shteti serb do të jenë në mbështetje të serbëve edhe pas kërcënimit të liderit të tyre Goran Rakiç i gatshëm për luftë.

“Ne para disa ditësh kemi marrë një notë ku janë qëndrimet e shteteve të Quintit, në Pikën 2. që ka të bëjë me targat e makinave, thuhet, se duhet të kuptojmë se aksioni kosovar është legjitim. U kam thënë se kjo nuk është e vërtetë, se bëhet fjalë për gënjeshtra. Gjatë gjithë kohës bëhet fjalë për targa KS, e KS janë targa me status neutral. Ata thonë s’bënë, se janë hequr targat KS, se duhet targa RKS. Kjo që flet Prishtina, Bashkimi Europian, nuk shkruan asgjëkundi. Munden. Unë e përsëris, ne pranojmë targat KS, janë me status neutral, por ata nuk duan as të dëgjojnë,” vazhdon dhe gënjen Vuçiç edhe sot kur Serbia vazhdon dhe lëshon targa me qytetet e Kosovës, si KM, PR, PZ etj. dhe të gjithë ata serbë që u bindën ti regjistrojnë makinat me targat RKS, makinës së tyre iu vu flaka nga strukturat e sigurisë së Aleksandar Vuçiçit dhe sot me mburrje e thotë se janë vetëm 18 serbë që pranuan këtë ndryshim targash.

“Plani është që ti lejojnë të dalin, dhe mos ti lejojnë të futen kurrë më në territorin e Kosovës. Nuk do të përsëritet më viti 2004 dhe asnjë aksion i ngjashëm. Serbia nuk do të lejoj përndjekjen e serbëve. Ne kemi shqyrtuar sot planin franko-gjerman dhe do t’i informojmë lidhur me këtë. Ajo që është shumë e rëndësishme, dua t’ju them për faktin e rolit që ka NATO. Nuk është roli i NATO-s të luftoj kundër popullsisë lokale. Kur do të fillojnë forcat e NATO-s të reagojnë në përputhje me Kartën e OKB, kjo është pyetja ime. Ndalohet formimi i Ushtrisë së Kosovës, e ata lejojnë që ushtria të bëjë baza, futet në veri të Kosovës. Kërkojnë nga ne të shkelim Kartën e OKB dhe Rezolutën 1244, të gjitha ato që i kanë shkelur vetë ata. Nëse nuk duam, pason dajaku,” tha Vuçiç duke përdorur tjetër fjalor nga Goran Rakiçi i cili doli si Slobodan Milosheviçi në Gaziemstanin e vitit 1989

“Kemi rënë dakord që sipas mundësive tona të ruajmë paqen dhe stabilitetin, por të ngelim me popullin tonë. Sot kemi folur edhe për gjendjen në forcat tona të armatosura dhe këtu kemi marrë masat e duhura,” tha Presidenti i Serbisë duke shtuar se pikërisht me këtë duhet të merret NATO

“Në veri të Kosovës, për tu futur duhet marrë leje nga KFOR-i, dhe kryetarët e katër komunave por kjo nuk ju intereson. Nuk dua të merrem me motivet e Kurtit. Pse guxon ti bëjë të gjitha këto, sepse kurrë nuk është dënuar. E vetmja gjë që kanë bërë është që i kanë mbështetur. Një gjë është e sigurt, serbët në Kosovë nuk do ti lëmë vetëm,” tha Vuçiç duke gërthitur, “nuk ka dorëzim”!

“Nuk ka dorëzim, nuk ka dorëzim, Kosova mbetet ashtu siç kemi thënë para një muaji. Se është bërë një pjesë e riregjistrimit, por në KS, dhe jo RKS, dhe kryesisht në jug. Targat KS flasin për status neutral, gjithça pranojnë përveç targave. Sa i përket serbëve ata kërkuan takim me mua. Ne ju thamë të mos bien pre të provokimeve, kjo ishte lutja ime. Që dikush të ndërmarrë aksione të armatosura kundër tyre, nuk do të munden, ” tha Vuçiç duke komentuar konstatimin e gazetares serbe të N1 që liderët e Listës Srpska që në vitin 2018 kishin bërë thirrje për riregjistrim dhe sot thonë jo.

“Pozicioni jonë është i tillë, që hapësirën e kemi të kufizuar me mikrona, dhe me qëllim na kanë çuar deri aty me fuqinë e tyre. Fjala është për gënjeshtra, këtë e dinë të gjithë. Prishtina gjithmonë do të has në mbështetjen e Quintit. Unë pres, që javën e ardhshme të futet në procedurë Kosova në Këshillin e Evropës. Kjo është afruar, do të shkoj me propozimin irlandez, mund të zgjas edhe një vit por e keni të qartë se cili do të jetë epilogu. Ky është një presion shtesë për Serbinë, që tu thuhet se e drejta ndërkombëtare nuk na intereson, ne jemi grup i shteteve më të fuqishme që mund të bëjmë gjithçka. E ti Vuçiç, ti nga autoritar, do rritesh në autokrat, më pas në diktator, nëse nuk dëgjon liderin, ne do të ndërmarrim pak aksione kundër teje dhe Qeverisë së Serbisë,” tha paksa më i qartë se herë të tjera dhe në siklet e sipër duke bërë dhe trimin:

“Më mirë një ditë si skifter, se sa 100 vjet si miu!”

“Unë nuk kam ku të shkoj, që të largohem, dhe as Serbia nuk ka ku të shkoj. Ne kemi Kartën e OKB, rezolutat, të drejtën ndërkombëtare, që mund t’ju referohemi, bisedimet, negociatat, dëshirën për arritjen e zgjidhjeve të kompromisit. Kishte prej atyre që donin të na bindin se nuk kanë gjuajtur sistemet energjetike në vitin 1999. Nuk ka asnjë prej tyre që nuk kanë gjuajtur,” tha Presidenti i Serbisë që për diçka është i bindur:

“Vendet e Quintit kurrë nuk kanë bërë asgjë kundër Prishtinës, nuk ju thashë rastësisht, nuk na dhanë kurrfarë rasti që diçka të pranojmë. Nuk keni ku të shkoni, s’ka dorëzim, do ta ruajmë Serbinë,” tha në fund Presidenti i Serbisë, Aleksandar Vuçiç, duke harruar se ishin shtetet e Quintit ose Shtetet e Bashkuara, Gjermania, Mbretëria e Bashkuar, Franca dhe Italia, që ndërhynë para skadimit të afatit të 1 Gushtit për të bindur Kryeministrin e Kosovës, Albin Kurti, që të shtyjë afatin deri më 31 Tetor për regjistrim e makinave me pronar serb, me targat RKS.