Takimi me Kurtin: Liderët e opozitës kërkojnë koordinim të plotë me partnerët ndërkombëtarë
Liderët opozitarë i kanë kërkuar kryeministrit Albin Kurti, që të ketë koordinim të plotë me partnerët ndërkombëtarë.
Të tre liderët e partive opozitarë, raportin RFE, i shkuan në takim Kurtit për të diskutuar për zhvillimet e fundit në vend, e sidomos në veri të vendit.
Takimi është thirrur tri ditë pasi përfaqësuesit serbë u tërhoqën nga institucionet e Kosovës në të gjitha nivelet dhe pas deklaratave të vetë Kurtit se janë intensifikuar kërcënimet e Serbisë për destabilizmin e situatës në veri të vendit.
Në takim shkuan Lumir Abdixhiku i Lidhjes Demokratike të Kosovës, Memli Krasniqi i Partisë Demokratike të Kosovës dhe Ramush Haradinaj i Aleancës për Ardhmërinë e Kosovës.
Kreu i PDK-së tha pas takimit se Kosovës “në këto moment Kosovës i duhen veprime të përgjegjshme që e ruajnë sovranitetin e vendit”.
Ndërsa lideri i LDK-së tha se në takim me Kurtin nuk kanë parë ndonjë plan konkret e “as gatishmëri për koordinim të plotë më aleatët ndërkombëtarë”.
Ai tha se meqë gjendja e sigurisë në vend “është shumë e rëndë” është jetike koordinimi me partnerët, me theks Shtetet e Bashkuara të Amerikës.
Ndërsa Haradinaj lëshoi takimin dhe shkroi se u detyrua ta bënte këtë për shkak që, siç tha, “Kurti mbante ligjërata e nuk na sqaronte se përse ka prishur raportet me Amerikën”.
“Për mua është e papranueshme që në raste kaq të ndjeshme, të prishim raportet me aleatin kryesor të sigurisë,” reagon ai përmes rrjetit social Facebook.
Bashkimi Evropian dhe Shtetet e Bashkuara i kanë kërkuar Kurtit që të shtyjë vendimin për targat.
Më 5 nëntor, përfaqësuesit e serbëve ofruan dorëheqjen nga institucionet e nivelit lokal në Kosovë, nga Gjyqësori, Policia, si dhe nga Qeveria dhe Kuvendi i Kosovës.
Largimet nga institucionet e Kosovës ndodhën pasi Qeveria e Kosovës më 1 nëntor nisi zbatimin e planit prej tri fazash për riregjistrimin e makinave me targa të lëshuara nga Serbia në ato RKS – Republika e Kosovës.
Dje, ministri i Punëve të Brendshme, Xhelal Sveçla, deklaroi se “aktualisht situata në veri është e qetë” dhe se janë në vazhdimësi në koordim me KFOR-in dhe EULEX-in.
Ai tha se deri më 7 nëntor, Kosova ka pranuar dorëheqjen e 461 zyrtarëve serbë të rendit, 107 policëve kufitarë dhe dhjetë hetuesve policorë.
Dhjetë deputetët e Listës Serbe – partisë më të madhe të serbëve në Kosovë – kanë dorëzuar të hënën dorëheqjet e tyre në Kuvendin e Kosovës
Edhe gjyqtarët serbë dhe punëtorët administrativë në Mitrovicë të Veriut kanë dhënë dorëheqje. Në gjykatën në këtë qytet ishin gjithsej 19 gjyqtarë serbë.
Paralajmërimet e Listës Serbe për largim nga institucionet e Kosovës kanë ardhur pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS – Republika e Kosovës.
Kurti u bëri thirrje serbëve në veri të vendit që të mos japin dorëheqje, ngase siç tha ai, “bojkotet nuk janë zgjidhje, institucionet nuk kanë alternativë”.
Për dallim nga Kosova, raporton RFE, Serbia e ka mbështetur vendimin e Listës Srpska. Partnerët ndërkombëtarë kanë përsëritur thirrjet për ruajtjen e qetësisë në Kosovë, si dhe që të shmanget eskalimi i tensioneve të krijuara.
