Alternativa anti-krizë e PD, Berisha: Zemërimi, revolta, padurimi i shqiptarëve kulmon nesër!
Zemërimi, revolta, padurimi i qytetarëve shqiptarë kulmon nesër, ishte paralajmërimi që lëshoi sot Kryetari i Partisë Demokratike, Sali Berisha, 24 orë para protestës së madhe opozitare ku pritet të publikohet dhe alternativa anti-krizë e PD dhe opozitës.
“Zemërimi, revolta, padurimi i qytetarëve shqiptarë po kulmon, po rritet çdo orë dhe me padurimin më të madh po presin protestën e nesërme në ora katër të pasdites si një ngadhënjim të plotë të popullit opozitar, si një dëshmi përfundimtare e vendimit të këtij populli për të mos pranuar kurrë më, armikun e egër të votës së tyre të lirë, të sillet siç është sjellë me ta. Për të mos pranuar kurrë më, një kryehajdut të të gjitha kohërave, për t’i vjedhur, për t’i varfëruar, për t’i mjeruar ata. Për të mos pranuar kurrë më tej, një armik të qenies së tyre, që po i përzë, po i dëbon, çdo ditë nga Shqipëria.
Që ka shndërruar dheun e tyre në një dhe, në të cilin shqiptarët nuk besojnë. Që eksporton çdo ditë, nga ky vend, më shumë se çdo gjë tjetër, krim, drogë dhe drogë dhe krim. Që dhunon masivisht të drejtat e shqiptarëve. Një armik i egër i opozitës, pas Enver Hoxhës, Edi Rama është armiku më i papajtueshëm me opozitën. Shqiptarët e shohin se çfarë fjalori të ulët prej halabaku ordiner përdor ky njeri për opozitën. Shqiptarët konstatojnë se i mbrujtur me edukatën e babait-xhelat, trashëgiminë e dajës-xhelat, ky ka për kundërshtarin, psikologjinë e xhelatit. Të gjitha këto janë temat e protestës,” tha Sali Berisha duke shtuar se qytetarët shqiptarë nesër do njihen me alternativën anti-krizë të Partisë Demokratike dhe opozitës.
“Qytetarët shqiptarë nesër do njihen me alternativën anti-krizë të PD dhe opozitës. Edhe njëherë, ftoj çdo shqiptar, demokrat dhe demokrate, qytetarë pa parti, anëtar të partive të tjera politike opozitare, por edhe socialistë, që janë shumë më afër me ne se me sektin e rilindjes, të bashkohemi për kauzën tonë të drejtë nesër. Dhe të çelim me atë protestë, një lëvizje të fuqishme që ka si synim madhor, përmbysjen e këtij regjimi antishqiptar. Ka si synim madhor, rikthimin e Shqipërisë në standardet demokratike, votën e lirë. Ndëshkimin e hajdutëve të pasurive publike dhe fondeve publike, shpartallimin e krimit të organizuar me zero tolerancë ndaj tij. Ka si synim madhor që vendimet për Shqipërinë dhe shqiptarët të mos merren në Beograd, të mos merren në Ankara, por veçse në Tiranë.
Të largojmë një person, një antishqiptar, një armik të qenies shqiptarë, të lirive dhe të drejtave tona. Protesta, ju po e shihni, sirenat e zemërimit dhe urrejtjes ndaj kësaj qeverie, të dhimbjes, sakrificës dhe mjerimit, po ulërijnë në zemrat e të gjithë shqiptarëve në të katër anët e vendit. Ndaj shpreh mirënjohje të pakufishme për ata që do mbushin rrugët dhe sheshet e Tiranës. Rroftë protesta. Rroftë populli opozitar,” tha Berisha duke shtuar se Edi Rama përpiqet të shtypë opozitën në parlament, por nuk do e arrijë kurrë ndërsa kishte një mesazh për Kryeministrin:
“Opozita është sot më e fuqishme se kurrë. Ai gabon rëndë kur shan si halabak ordiner, duke treguar se çfarë edukate familjare ka marrë. Duke treguar se çfarë mendësie ka biri i xhelatit për kundërshtarin politik. Por e ka të kotë, do përballesh me opozitën, duke përballesh me popullin.”
Edhe në këtë konferencë të përjavshme të kryedemokratit, mediat në shërbim të Edi Ramës bënë përpjekje për të zbuluar skenarin e protestën, por Sali Berisha ishte më i qartë se kurrë:
“Detyrat janë të ndara, unë kam fjalimin, bashkëpunëtorët e tjerë kanë skenarin, të tjerë kanë himnin. Do ketë risira, ka nga të gjitha aspektet. Të gjithë mund të vijnë në protestë, përveç Lulzim Bashës, që duhet të sqarojë akuzën e tmerrshme. Të tjerët janë anëtarë të PD, nuk mund të marrin leje te unë që të protestojnë. Basha ka një akuzë të tmerrshme, ka deklaruar se nuk është e vërtetë, nuk ka dhënë asnjë fakt, asnjë provë për ato akuza që ekzistojnë aty. Hetimi këtu nga selia po vazhdon. Kështu që mendoj se është shumë i detyruar të zbardhë, të ketë burrëri, të tregojë edhe nëse i takon të hyjë brenda, ose të shpallet i penduari i drejtësisë, dhe fiton lehtësira. Por të tregojë të vërtetën,” tha Kryetari i Partisë Demokratike duke sqaruar se populli opozitar do përdorë të gjitha metodat e mosbindjes civile.
“Ju kam deklaruar se opozita është në protestë, populli opozitar është në protestë kundër kësaj qeverie. Populli opozitar do përdorë të gjitha metodat e mosbindjes civile dhe do shpallë moton e tij nesër në protestë. Sepse ne nuk mund të pajtohemi kurrë me shpërbërjën e kombit shqiptar nga konfiskimi i lirive të shqiptarëve nga një qeveri e lidhur kryekëput me krimin, drogën, vjedhjen dhe mashtrimin. Ne e kemi shumë seriozisht këtë betejë,” tha Kryetar i Partisë Demokratike, Sali Berisha, duke i dhënë përgjigje dhe megafonëve të Edi Ramës se policia ka dhënë leje vetëm për dy orë:
“Policia në interesin e saj më të mirë, të mos bëhet mercenare e Edi Ramës. Këtë i them policisë unë. Ka Kushtetutë, protestuesit janë fuqia absolute morale e vendit. Mjerë ai që i prek. Protesta do të zgjasë sa të dojë populli shqiptar. Sa t’i teket popullit opozitar. Ai është nesër sovrani i Shqipërisë.”
