Pas mediave, akuzon shef i tyre Rama: Ça proteste! Një nongratë dhe një spiun mbledhin militantët e tyre?

Arsyeja e daljes publike sipas ministres së Financave, Delina Ibrahimaj, ishte nxitja e individëve për të investuar në bono thesari dhe obligacione, por kështu nuk rezultoi me ato që foli gjatë gjithë kohës Kryeministri Edi Rama, ku u mor me opozitën dhe protestën e saj të 12 Nëntorit, duke sqaruar më në fund një herë e mirë mesazhet e mediave që ka në shërbim, që kaluan tashmë në bezdi duke konstatuar për tre ditë se “protesta e Sali Berishës dështoi sepse nuk kishte dhunë”!

Kur jemi te sharjet e opozitës dhe Sali Berishës, atyre sot nuk iu shpëtoi as Britania e Madhe, ku për krizën e emigrantëve, Rama konstatoi se sulmi për shqiptarët ishte i kalkuluar.

Fillimisht Ministrja e Financave, Delina Ibrahimaj, tha se shumë shpejt do të nisin një fushatë sensibilizuese për të dhënë informacione lidhur me përfitimet dhe procedurën që duhet të ndjekin qytetarëtnë për të investuar në bono thesari dhe obligacione.

“Kemi folur shumë për rritjen e çmimit të energjisë, inflacionit që kanë prekur popullatën dhe për masat që qeveria ka marrë, por nuk kemi prekur elementin e normave të interesit. Që prej nisjes së luftës, bankat qendrore filluan të rrisin normat bazë të interesit, kështu dhe BSH ka rritur normat në fillimit të vitit, nga 0.5% në fillim të vitit sot është 2.75%.

Arsyeja që jemi sot këtu dhe flasim për nxitjen e individëve për të investuar në titujt qeveritarë, pasi përfitueshmëria është shumë më e lartë sot seç ishte një vit më parë.

Sot kanë kthime shumë më të larta dhe kanë një mundësi investimi në disa tituj që e kanë riskun praktikisht 0. Kur flasim për tituj flasim për bono thesari dhe obligacione, dhe për të informuar publikun ne do nisim një fushatë sensibilizuese, për të marrë informacione, benefite dhe procedurën që duhet të ndjekin,” tha Delina Ibrahimaj ndërsa Edi Rama shumë shpejtë u fut në shinat e asryes pse vërtetë kishte dalë, opozita dhe protesta e 12 Nëntorit, për të cilën tam-tamet e tij nuk pushojnë për ta bindur opinionin e gjërë se nuk kishte njerëz dhe si e tillë ajo dështoi ndonëse mediat ndërkombëtare e thonë të kundërtën.

Dhe, është vetëm Edi Rama që nuk i ka parë sesa persona ishin në shesh ndërsa i cilësoi militantë që nuk kanë lidhje me popullin, por nuk e kishte të vështirë të konkludonte se ishte një protestë politike e organizuar nga Sali Berisha dhe Ilir Meta, që paguhen nga të huajt për të bërë dëm.

“Për ca proteste më flisni? Për cilët qytetar? Për një protestë partish? Një nongratë dhe një spiun që mbledhin militantët e tyre? S’ka lidhje me popullin, është protestë partish për pushtet, për të prishur e për të marrë, me të vetmin rezultat që hodhën ca bojë këtu që u deshën të punonin punëtorët natën për ta larë… ça proteste?

As nuk di sa ishin, as i kam parë as më interesojnë, mund ta bëjnë çdo ditë po të duan, është një çorbë që e kemi parë prej 30 vitesh që e gatuan i njëjti kuzhinier, një nongrata. Më vjen keq që militantë shkojnë pas atyre që paguhen nga të huajt për të bërë dëm,” u shpreh Edi Rama duke bërë publike një risi që shqiptarët nuk e kishin të qartë se nga vijnë paret as për çadrën socialiste që kërkonte të hapte kutitë ose të largohet Berishia dhe as 21 Janarin e përgjakshëm me 500-600 persona me hunjë në dorë dhe ca të rinjë që i furnizonte PS me gurë për të qëlluar policët nëse ruajnë flamurin kombëtar.

“Së pari nuk kam qenë asnjëherë dakord dhe s’kam për të qenë kurrë dakord me këtë shenjën e barazisë. Mund ta vendosni shenjën e barazisë sa herë të dëshironi, por kjo është puna juaj. ‘Ka pasur akuza, ju për ata dhe ata për ju’, besoj se nuk është vështirësi e madhe të bëhet dallimi mes komentit të një fakti dhe akuzave pa fakte. PD është financuar me para ruse gjysmë mbi dollarë për të rrëzuar PS, nuk është akuzë, por fakt. Ky është një fakt i dokumentuar për fat të keq. Një fakt i zbuluar nga media në SHBA, nga media ndërkombëtare, i përqeshur gjerësisht nga shumëkush këtu dhe nga media kombëtare, dhe i konfirmuar nga Shërbimi Sekret Amerikan, CIA.

Akuzat me serb dhe se di me ça tjetër, janë prodhime të një tërbimi të madh, një tërbim non-gratash dhe spiunësh për një çështjeje kryesore në rajon për një investim që duhet të jetë krenari kombëtare. Sepse do të transformojë Durrësin. Do të rritet eksponencialisht punësimin. Të ngresh akuza të tilla në hava, është fatkeqësi kombëtare,” tha Rama dhe ndonëse e panë me zë e figurë si hakërrehet ndaj atyre deputetëve të Lulzim Bashës që i shërbyen për një seri ligjesh dhe kishin dyshime për Portin e ri të Durrësit ai thotë se punon në lartësimin e shqiptarëve dhe Shqipërisë:

“Ne kemi bërë zgjedhjen. Nuk lë rast pa lartësuar emrin e shqiptarëve dhe Shqipërisë kur flas në gjuhë të huaj, por non-gratat e turpërojnë emrin e Shqipërisë sa hapin gojën dhe me emrin e tyre. S’ka gjë më shumë për të ardhur keq, saqë mediat reflektojnë këtë deformim pa asnjë kontribut. Unë mund t’ju akuzoj të gjithëve për bashkëpunëtorë me djallin, por kjo mbete akuzë në hava.

Ndaj nuk është detyra juaj të që të provoni këtë, por e imja. Kjo është vendosur që në kohën e Romës. Shqiptarët ushqehen me dokrra dhe dëngla. Është barra e atij që akuzon që të provojë akuzën dhe jo barra e atij që akuzohet, që të provojë se akuza është e vërtetë. Cilët serbë, cilët kinezë? Cilët?! PD është financuar me para ruse, ky është fakt. Është në më shumë se dy burime, të cilët duhet të jenë bibla dhe kurani juaj,” tha Kryeministri duke vazhduar me lartësimin e Shqipërisë duke e akuzuar se ka një opozitë të blerë nga rusët me gjysmë milioni dollarë, e cila pas takimit me përfaqësuesin e Putinit, i nguli thikkën UÇK-së dhe Shqipërisë.

“PD-ja është financuar me gjysmë milioni dollarë nga para ruse dhe ky është fakt, është e dokumentuar dhe madje me dy burime. Për më tepër është habi e madhe se si një fakt tjetër rrëqethës, unë do thosha tragjik. Në këtë godinë është pritur përfaqësuesi i Vladimir Putinit, një muaj përpara se PD-ja të jepte votën në Këshillin e Europës, duke bashkuar qëndrimin me partinë e Vladimir Putinit, kundër UÇK-së dhe kundër Shqipërisë.

Është pritur këtu një rus real, me emër, me mbiemër, me titull. Është bërë dhe një deklaratë nga këtu, ku takimi është vlerësuar posaçërisht i rëndësishëm dhe një muaj më mbrapa i është ngulur thika mu në palcë të kurrizit UÇK-së dhe Shqipërisë nga PD-ja. Se që rusët të paguajnë. Duhet të kesh dhënë një provë apo jo. S’mund të paguajnë kot. S’mund të derdhin kot gjysmë milioni dollarë për të financuar një parti politike. Pse duhet t’ia jepnin PD-së ato para, pse të mos ia jepnin një partie tjetër, megjithëse nuk është e vetmja parti PD, që ka lidhje rusë. Fjalët e mia gjithmonë dalin siç keni pasur rastin ta vini re, se unë nuk hedh fall. Unë kur flas e di shumë mirë se çfarë them,” tha Edi Rama ndërsa të gjithë atyre shqiptarëve që fikën televizionin në ditën e tmerrit me sharje ndaj deputetëve të opozitës që vetëm goja e tij e pistë i nxjerr, u tha sot se nuk është sharje t’i thuash tjetrit në sy je pa atdhe kur është pa atdhe.

“Pse, ia bëni këtë pyetje vetes apo nuk ka rëndësi. Është më interesante të merreni me fantazmat serbe që nuk ekzistojnë dhe mbi të gjitha a nuk është turp. Mirë dakord në këtë çorbën e brendshme s’e merr vesh i pari të dytin dhe të gjithë kanë gjetur rehatin e tyre duke vendosur shenjat e barazisë, edhe këta, edhe ata. Akuzat e ndërsjella, sharjet e ndërsjella.

Çfarë sharje është t’i thuash tjetrit në sy je pa atdhe. Kur është pa atdhe. Sepse për mua dikush që paguhet me para të huaja, apo dhe me para vendase për të shkelur interesin kombëtar është pa atdhe. Nuk ka shkelje më të madhe të interesit kombëtar se sa të votosh bashkë me partinë e Putinit kundër UÇK-së apo të marrësh para ruse për të rrëzuar qeverinë e vendit tënd edhe sikur të jetë më e keqja. Atëherë je pa atdhe, nuk diskutohet. Çfarë sharje është kjo?”, tha Kryeministri Edi Rama pa sqaruar se çfarë janë këto që dolën ditë më parë nga goja e tij në parlament:

“Kriminel”, “gënjeshtar”, “skizofren”, “i korruptuar”, “vjedhës”, “kreu i mafias”, “tradhetar”, “bedelë”, “pusho”, “gjel deti Peqini’, “pa din e iman”, “të pafe”,  “të shitur”, “të pafytyrë”, “po të kishit fytyrë”, “Si s’ju vjen turp”, “Ju kanë tërhequr prej hundësh”, “jeni të mallkuar” , “Ju jeni ca të mbaruar”, “Je aksident”, “baltosës”, “bartësit e mallkimit që nga 1912”, “nuk kuptoni pse jeni këtu”, “mblidheshit si dele dhe blegërinit”, “gojën e keni të shkëputur nga truri”, “kastravecë do dilni nga kjo histori”, “s’keni flamur”, “Jeni turpi i tyre çdo ditë që hapni gojën”, “s’lini dy gurë bashkë”, “Ju kanë futur një dru që s’e merrni veten më”, “s’dilni dot nga psikoza e bishtit”, “Gjykata, sportel për të rritur pazarin”,  “je si miza në të ndenjurat e kalit”,  “mos ngatërro jashtëdaljet e organizmit”, “Foltore politike e katundit mizerabël”, “katundarët më mizerabël mes nesh”,  “s’keni histori”, “s’keni dinjitet”, “i bëni hije kot kësaj toke”, “kastravecë”, “me baltë”, “turpëroni vendin”, “poshtëroni të gjallë e të vdekur”, “personalizim i tradhtarëve”, “gjel me shtyp”, “pulë të shtypesh”…

Në fund, autorit të gjithë këtyre sharjeve, Kryeministri Edi Rama, nuk i shëtoi sot as qeveria britanike për të cilën ai tha se ka hyrë në një rrugë pa krye ndërsa iu referuar krizës së emigrantëve dhe kërkesës së shqiptarëve për të liberalizuar vizat.

“Situata dihet se cila është. Ne mund të themi shumë gjëra, por dihet që qeveria britanike ka hyrë në një rrugë pa krye me gjithë politikën e re që ka ardhur s rezultat i Brexit dhe të tjera dhe të kërkosh liberalizim vizash është gjëja që unë e kam thënë dhe përsëritur, por faktikisht ata janë në një drejtim të kundërt me këtë.

Kështu që çfarë të them më shumë se kaq, ndërkohë që falja do kishte zgjidhur shumë gjëra. Fakti që falja nuk erdhi tregon që sulmi ka qenë i kalkuluar, nuk ka qenë një nga ato shprehjet që dalin pa dashje.”