Arrestohet një serb pjesëmarrës në masakrën e Dubravës
Policia e Kosovës ka bërë të ditur sot se ka arrestuar një serb me inicialet G.M, i dyshuar për krime lufte kundër popullsisë civile, si pjesëmarrës në masakrën e Dubravës.
Policia ka njoftuar se ka zhvilluar hetime për krimet e kryera gjatë luftës në Kosovë dhe ka pranuar informacionin për të dyshuarin.
“Policia e Kosovës, respektivisht Njësia për Hetimin e Krimeve të Luftës, në bashkëpunim dhe me autorizim të Prokurorisë Speciale, ka zhvilluar hetime lidhur me krimet e kryera gjatë periudhës kohore të viteve 1998/99 në Kosovë, ku përmes rrugëve hetimore- operative ka pranuar informacion për një të dyshuar potencial si pjesëmarrës në këto krime, konkretisht në masakrën e Dubravës në maj 1999”, thuhet në njoftimin e Policisë Kosovës ku cili mësohet se i dyshuari është intervistuar dhe me aktvendim është ndaluar për 48 orë me urdhër të Prokurorisë Speciale.
“Policia e Kosovës, me datën 01.12.2022, ka shoqëruar të dyshuarin mashkull kosovar serb, G. M. (1958) në Polici për intervistim dhe procedura të mëtejme. Në konsultim me prokurorin kompetent i dyshuari i lartcekur është intervistuar në prezencë të avokatit të tij të siguruar sipas detyrës zyrtare, nën dyshimin se i njëjti është përfshirë në veprën penale ‘krime lufte kundër popullsisë civile’”, thuhet tutje në njoftim.
