Video/ Shas, banorët mbrojnë Kalanë nga Amfilohije. Vetëvendosje mbështet banorët…
Banorët e zonës së Anës së Malit dhe jo vetëm kanë penguar të dielën rrugëtimin e Amfilohijes për në Kalanë e Shasit.
E gjitha kjo ndodhi pasi peshkopi i Kishes Ortodokse Serbe me një numër të madh mbështetësish, më shumë se 150 vetë, me makina tentuan të depërtojnë në mes të një gardhi fizik që kishin ngritur banorët. Në pamundësi të depërtimit, makinat u ndalën dhe për një kohë të gjatë pati diskutime në mes Amfilohijes dhe banorëve, raporton shkruan Ulqini Online.
”Nuk jeni të mirë se ardhur në këtë mënyrë. Këto objekte janë tonat, ne i kemi ruajtur dhe ne do ti ruajmë”, kështu iu drejtuan Amfilohijes banorët që kishin bllokuar rrugën. Pas një përleshje të banorëve me policinë, kjo e fundit zhbllokoi rrugën për të kaluar mbështetësit e Kishës Ortodokse Serbe por nuk i la për të hyrë në kishën e Shën Gjonit në Kalanë e Shasit, aty ku edhe ishte planifikuar aktiviteti.
Lëvizja Vetëvendosje bashk me banorët e Shasit, Anës së Malit dhe Ulqinit
Pas përleshjes së të dielës në Shas, të banorëve të Anës së Malit dhe jo vetëm , në njërën anë dhe peshkopit serb Amfilohije me policinë në anën tjetër, Lëvizja Vetëvendosje duke denoncuar përpjekjen e klerikëve të kishës serbe, përkatësisht peshkopit Amfilohije Radoviq, për të përvetësuar trashëgiminë kulturore e historike shqiptare, përmes një deklarate thekson se i bashkangjiten protestave të banorëve të Shasit, Anës së Malit dhe Ulqinit, dhe kërkon që qeveria e Malit të Zi, por edhe ajo e Kosovës dhe e Shqipërisë të mos lejojnë provokime e përvetësime të tilla të trashëgimisë sonë kombëtare.
Ja dhe postimi i plotë:
Lëvizja VETËVENDOSJE! e denoncon përpjekjen e klerikëve të kishës serbe, përkatësisht peshkopit Amfilohije Radoviq, për të përvetësuar trashëgiminë kulturore e historike shqiptare. Amfilohije dhe klerikë të tjerë kanë planifikuar mbajtjen e liturgjisë në rrënojat e qytetit ilir e më vonë arbëror, Shasit, me pretendimin provokativ se shqiptarët janë myslimanë, e rrënojat e kishave në Shas i përkasin pra sipas tyre, kishës serbe.
Ky esencializim i shqiptarëve është si provokativ ashtu edhe i papranueshëm. Pjesë e identitetit historik dhe aktual shqiptar janë edhe trashëgimitë materiale e shpirtërore të tre religjioneve që kanë patur dhe ende kanë shqiptarët, pra katolicizmit, ortodoksisë dhe myslimanizmit, përfshi këtu edhe vëllazëritë sufiste, si bektashinjtë etj. Xhamitë, teqet, kishat, tempujt, qofshin ato ende në përdorim, apo rrënoja të lashtësisë, janë ndërtuar nga shqiptarët e paraardhësit e tyre, dhe i kanë shërbyer po atyre. Andaj çdo pretendim për t’i paraqitur ato si pronë a trashëgimi e një kombi tjetër, është e papranueshme dhe anti-historike. Është veçse një tentativë për t’i paraqitur shqiptarët si ardhacakë, pa trashëgimi e kontribut historik vetjak.
Ne i bashkangjitemi protestave të banorëve të Shasit, Anës së Malit dhe Komunës së Ulqinit, dhe kërkojmë që qeveria e Malit të Zi, por edhe ajo e Kosovës dhe e Shqipërisë të mos lejojnë provokime e përvetësime të tilla të trashëgimisë sonë kombëtare.
