“Duaje tënden”, në Prishtinë protestohet për bojkotim të produkteve serbe

Studentët e Universitetit “Hasan Prishtina”, kanë protestuar sot në Prishtinë, me qëllim të rritjes së mbështetjes për bojkotim të produkteve serbe. Studentët derisa marshuan bënë thirrje nga të gjithë që t’i bojkotojnë këto produkte serbe. Gjatë këtij viti, Serbia është shndërruar në partnerin kryesor tregtar në Kosovë.

Me pankartat “Duaje tënden”, “Ata barrikadojnë rrugët, ne barrikadojmë ekonominë e tyre”, “Mos e forconi armikun”, është mbajtur protestë në Prishtinë paqësore “Bojkoto produktet serbe”, e cila u organizua nga studentët e Fakultetit të Edukimit.

Sipas tyre duhet të ngrihet vetëdijesimi i popullit për të ndaluar blerjen e produkteve të Serbisë dhe të konsumojnë produktet e vendit, në mënyrë që të fuqizohet ekonomia e Kosovës e jo ajo e Serbisë.

Laurita Terpeza, studente e Fakultetit të Edukimit, ka thënë se duhet kujtuar atë që ka kaluar populli i Kosovës për shkak të Serbisë dhe duhet të ndalohet blerja e produkteve të Serbisë.

“Arsyeja që kemi organizuar këtë marshim paqësor është që të kujtojmë atë që ka kaluar populli ynë, ku ne deri më tani kemi ushqyer armikun tonë me duart tona. Andaj, i bëj thirrje gjithë shqiptarëve anë mbanë botës të bojkotojnë produktet e Serbisë. Më mirë të rrinë pa ngrënë se të ushqehemi nga helmi i tyre. Më mirë të fokusohemi te produktet vendore, të fuqizojmë shtetin tonë, ushtrinë tonë dhe jo atë të serbëve”.

Kurse, Yllëza Murtezi, po ashtu studente në Universitetin e Prishtinës, k thwnw se patriotizmi në liri është që të bojkotohen produktet serbe, pasi sipas saj me blerjen e tyre po fuqizohet Serbia.

“Blerja e produkteve serbe çon në fuqizimin e një shteti që përveç se kërcënon me luftë… Patriotizmi në luftë që të dalim e të luftojmë për t’i dalë në krahë atdheut, ndërsa patriotizmi në liri është që të bojkotojmë produktet me barkod 860. Ne ju bëjmë thirrje popullit tonë të bojkotojnë produktet serbe… Historia që harrohet përsëritet”.

Alketa Rrahimi, studente në Fakultetin e Edukimit, tha se për ta ndihmuar Kosovën duhet bojkotimi i produkteve serbe. Sipas saj me blerjen e tyre po financohet ushtria serbe.

Kujtojmë se edhe gjatë periudhës janar-tetor 2022, krahasuar me periudhën e njëjtë të vitit 2021, janë importuar 850 milionë euro më shumë mallra nga jashtë. Për shkak se eksportet për këtë periudhë janë rritur vetëm me 154 milionë euro, deficiti tregtar është thelluar dhe ka arritur në minus 3.9 miliardë euro.

Agjencia e Statistikave në raportin e fundit ka treguar se importi i mallrave me Serbinë ka vazhduar të rritet derisa më Shqipërinë ka shënuar rënie.

Veç në muajin tetor të këtij viti Kosova ka blerë mallra nga Serbia në vlerë mbi 34 milionë euro. Kurse, në të njëjtën kohë në vendin tonë nga Shqipëria kanë hyrë mallra në vlerë të 21 milionë eurove, që i bie, mbi 10 milionë me pak se sa nga Serbia.

Në 5 vitet e fundit, Kosova ka importuar më së shumti mallra nga Serbia në vitin 2017. Në vitin 2017 vlera e importit të mallrave nga Serbia ishte 449 milionë e 305 mijë euro, në vitin 2018 ishte 386 milionë e 475 mijë euro, më 2019 ishte vetëm 4 milionë e 443 mijë euro. 2019-ta ishte viti kur ish-kryeministri Ramush Haradinaj kishte vendosur taksë 100% për produktet që vinin nga Serbia.

Në vitin kur u shfaq pandemia, 2020, vlera e importit nga Serbia ishte 173 milionë e 428 mijë euro. Kurse në vitin 2021, vlera është rritur përsëri dhe ka arritur në 305 milionë e 398 mijë euro./Monitor/