Presidentja Osmani pritet nga Papa Françesku, njohja e Kosovës nga Vatikani avancon raportet shekullore

Duke falënderuar Atin e Shenjtë për kujdesin që ai po tregon ndaj Kosovës, Presidentja e Kosovës, Vjosa Osmani thekson se synimi për njohje nga Vatikani kontribuon në avancimin e mëtejmë të raporteve shekullore.

“E lumtur të pritesha në audiencë private nga Papë Françesku në Selinë e Shenjtë. Papën e njoftova me vendosmërinë tonë për ta kultivuar e promovuar më tej paqen, harmoninë dhe bashkëjetesën ndërmjet njerëzve, si vlera të popullit tonë, mbi të cilat janë kultivuar e ruajtur prej afro dymijë vjetësh edhe raportet tona me Selinë e Shenjtë.

Në mënyrë të veçantë e falënderova Atin e Shenjtë për kujdesin që ai po tregon ndaj Kosovës dhe e falënderova për vendimin e tij të para pesë vjetëve, që Administratën Apostolike ta ngrinte në nivel të dioqezës. Ishte kënaqësi e veçantë po ashtu që të shkëmbeja me të pikëpamjet mbi orientimin euroatlantik të Kosovës dhe progresin e vendit tonë drejt këtij synimi,” u shpreh Presidentja e Kosovës, Vjosa Osmani, përmes rrjetit social Facebook pas pritjes nga Papa Françesku duke përfunduar:

“Thellimi i mëtejmë i raporteve me Vatikanin dhe zgjerimi i bashkëpunimit në shumë fusha janë orientimi ynë i përbashkët. Synimi i Kosovës për njohje nga Vatikani kontribuon në këtë drejtim dhe në avancimin e mëtejmë të raporteve tona shekullore.”