Takimi në Ambasadën e SHBA, Hovenier: Sot mbajtëm një sesion dëgjimor rreth Asociacionit

Pas takimit në Ambasadën e SHBA në Prishtinë, Ambasadori amerikan Jeffrey Hovenier duke falënderuar pjesëmarrësit bëri të të ditur se u zhvillua një seancë dëgjimore rreth Asociacionit të komunave me shumicë serbe.

“Sot mbajtëm një sesion dëgjimor në Ambasadën amerikane në Prishtinë, rreth Asociacionit të komunave me shumicë serbe. Falenderues ndaj pjesëmarrësve të ndryshëm, që ndanë pikëpamjet dhe ekspertizën e tyre,” tha Ambasadori Jeffrey Hovenier përmes rrjetit social Twitter duke përfunduar:

“Ne vazhdojmë të avokojmë për zbatimin e të gjitha zotimeve të dialogut.”

Ndërkohë Kryeministri i Kosovës,  Albin Kurti, i cili nuk ishte prezent në këtë takim por përfaqësohej me shefin e kabinetit, Luan Dalipi, nuk e komentoi takimin vetëm sa u shpreh shkurt:

“Ata që janë në takim do ta thonë fjalën e tyre,” tha kryeministri Albin Kurti pasi homazheve te shtatorja e heroit Zahir Pajaziti në Prishtinë.

Me përfundimin e takimit, doli dhe vetë Ambasadori i Shteteve të Bashkuara në Prishtinë, Jeff Hovenier, për të sqaruar opinionin e dezinformuar me ditë të të tëra se SHBA nuk mbështet asnjë marrëveshje që shkel Kushtetutën e Kosovës ose që kërcënon sovranitetin, pavarësinë dhe karakterin multietnik të saj.

“Ne kundërshtojmë rreptësisht krijimin e një entiteti që i ngjan Republikës Srpska në Bosnje dhe Hercegovinë,” tha Ambasadori Hovenier duke përsëritur se SHBA pret që Kosova t’i përmbushë obligimet e saj”.

“Ne kërkojmë nga Qeveria e Kosovës që ta ofrojë vizionin e saj për Asociacionin, që beson se mbron të ardhmen e Kosovës si shtet sovran, i pavarur, multietnik, demokratik, dhe siguron të drejtat e pakicave në përputhje me marrëveshjet e Brukselit dhe Kushtetutën e Kosovës,” tha Ambasadori amerikan d uke shtuar se kjo është vendimtare, e rëndësishme dhe urgjente.

“Ne jemi të gatshëm të ofrojmë ekspertizë dhe mbështetje politike, për t’u siguruar se ai funksionon në interes të të gjithë kosovarëve,” tha ai duke siguruar se partneriteti i SHBA me Kosovën është i palëkundur ndërsa sqaroi se diskutimi në këtë takim u përqendrua në tri gjëra.

“Së pari, si mund të funksionojë një asociacion në praktikë? Pjesëmarrësit në këtë takim ngritën një sërë temash, përfshirë pikëpamjet mbi përgjegjësitë e mundshme dhe kufizimet e mundshme të Asociacionit. Së dyti, si mund të funksionojë një asociacion sipas kornizës ligjore të Kosovës? Sërish, dëgjuam opinione të ndryshme, përfshirë Marrëveshjen e Brukselit dhe vendimin e Gjykatës Kushtetuese [të Kosovës] të vitit 2015. Së treti, si mund të kontribuojë një asociacion në zhvillimin ekonomik dhe ofrimin efektiv të shërbimeve të Qeverisë për serbët e Kosovës dhe komunitetet e tjera pakicë? Dëgjuam pikëpamje sesi Asociacioni mund të ndihmojë t’i adresojë çështjet dhe nevojat që janë thelbësore për çdo komunitet.”

Ndryshe, në takimin e organizuar nga Ambasada e SHBA në Prishtinë ku temë e diskutimit ishte themelimi i Asociacionit të komunave me shumicë serbei, morën pjesë zyrtarë nga Presidenca, Qeveria, partitë opozitare, diplomatë dhe anëtarë të shoqërisë civile.