KPK shkarkon nga detyra gjyqtarin Artan Lazaj

Komisioni i Pavarur i Kualifikimit ka shkarkuar nga detyra gjyqtarin e Tiranës, Artan Lazaj. Sipas KPK, ai ka një sërë problemesh me pasurinë.

Në përfundim të këtij procesi, trupa e përbërë nga Brunilda Bekteshi, Lulzim Hamitaj, Olsi Komici, vendosi: “në zbatim të nenit d të aneksit të kushtetutës dhe nenit 61, vendosi: Të shkarkojë nga detyra subjektin e rivlerësimit Artan Lazaj, gjyqtar pranë gjykatës së rrethit Tiranë. Vendimi mund të ankimohet pranë KPA, 15 ditë nga data e publikimit të vendimit të arsyetuar”.

Lazaj u njoh me rezultatet e hetimit nga Komisioni i Pavarur i Kualifikimit. Trupa gjykuese e kryesuar nga Brunilda Bekteshi, relatoi një sërë problematikash të konstatuara në pasurinë e kandidatit për Këshillin e Lartë Gjyqësor.

Komisioni u shpreh se Lazaj nuk ka burime të mjaftueshme financiare për të justifikuar pasurinë dhe ka bërë deklarim të rremë. Sa i përket figurës morale dhe aftësive profesionale, trupa gjykuese deklaroi se nuk e ka përmbyllur hetimin.

Fill më pas kandidati për këshillin e Lartë Gjyqësor këmbënguli se pasuria e tij është e ligjshme dhe renditi të gjithë argumentat për të rrëzuar pretendimet e KPK.

Ai tha se e vetmja pasuri e tij është një apartament në Tiranë, të cilin ende se ka shlyer plotësisht.
“Ju më keni vendosur në një betejë, më ftoni të luftoj e më keni dhënë një shpatë. Por në fakt, ju keni edhe shpatën edhe mburojën. Unë kam vetëm një shtëpi 128 metra katrorë në Tiranë. Si e kam përfituar unë këtë pasuri? Është produkt i punës time 25-vjecare. Gjatë hetimit iu tregova edhe arredimin e shtëpisë, sepse doja të bëhej vettingu”, ka sqaruar Lazaj në seancën dëgjimore.

AI i kujtoi komisionit se nuk duhet të merrej me gabime drejtshkrimore, pasi edhe vetë anëtarët e trupës kanë bërë plot në tilla, kur i kërkojnë atij informacion për vitin 1011.

Ai tërhoqi vëmendjen e organeve të vettingut, që të përmbushin qëllimin e reformës, për të zbuluar gjykatësit që kanë vënë pasuri me para të pista.

“Kam dhënë dënime të përjetshme, disa prej personave që kam dënuar nuk janë arrestuar ende nga policia e shtetit. Më kanë kërcënuar për jetën. Por, nëse keni qëllim ta hidhni gjyqtarin Artan Lazaj si preh në mes të kriminelëve , atëherë nuk kam cfarë të them”, ka vijuar ai më tej.

Artan Lazaj e mbylli fjalën, duke kërkuar konfirmimin në detyrë e në dalje bëri një apel për institucionin e Vettingut.