Shqetësimi i Mustafa Nanos, vetëm Kosova ndan Shqipërinë me Serbinë!

Konferenca ndërkombëtare e zhvilluar dje në Beograd, me temë “Serbët dhe shqiptarët – Në cilin drejtim?” mori një përgjigje të çuditshme nga analisti Mustafa Nano. Duke folur në këtë konferencë, Nano foli me idenë sikur i njehë mirë serbët, se nuk është hera e parë që viziton Beogradin, se sa i dobishëm ishte letërkëmbimi me Zoram Panoviç për dy kombet, edhe pse nuk i lexon njeri, duke konstatuar se asgjë në botë nuk është e ngjashme siç është bota e Shqipërisë me Serbinë. Dhe këtë botë, përfundon Mustafa Nano, fatkeqësisht e shemb Kosova!

“Nuk e prisja që kjo konferencë të fokusohej kaq shumë te Kosova, sepse nëse fokusohemi te Kosova, e dimë të gjithë që Kosova është një zinxhir që na mban këmbët të lidhura, ku nuk ka vend për të diskutuar dhe unë kam qenë më optimist përpara se të fillonte kjo konferencë, sesa jam tani”, e nisi fjalën e tij, Nano, duke vijuar se në fund të takimit shpresonte të rifitonte optimizmin por se atij nuk i kishte pëlqyer realiteti të cilin e prezantoi shefi i diplomacisë serbe, Ivica Daçiç e që nuk përkonte me botën e Mustafa Nanos.

“U theksua më shumë se njëherë, edhe nga ministri i Jashtëm serb, Ivica Daçiç, i cili u përpoq të nxjerrë në pah disa ndryshime natyrore midis serbëve dhe shqiptarëve, edhe tjetra në rastin kur u la mënjanë çështja e Kosovës dhe i shpëtuam çështjes së Kosovës për një çast, për të zhvilluar diskutimet.”

Këto lloj ndryshimesh Nano tha se mund t’i gjejmë kudo, midis çekëve dhe sllovakëve, francezëve, dhe ngriti zërin për mollën e tij të ndarë në dysh, shqiptarë dhe serbë.

“Unë personalisht shoh më shumë të përbashkëta sesa dallime midis serbëve dhe shqiptarëve. Serbët dhe bota e tyre më duket shumë e ngjashme me botën time. Asgjë në botë nuk është e ngjashme siç është bota e Shqipërisë me Serbinë. Unë kur vij në Beograd, ndihem si në shtëpi,” tha Nano duke mos lënë pa përmendur edhe programin e tij televiziv “Provokacja” me të cilin emër u mburrë edhe pse nuk është asgjë tjetër vetëm se një fjalë idiote serbe e aktualizuar nga regjimi i Vuçiçit pas çdo incidenti të sajuar nga Beogradi zyrtar në Kosovë. Misioni i këtij emisioni, sipas Mustafa Nanos është të përcjell mesazhin se asgjë që i përket botës serbe nuk është e çuditshme për shqiptarët, asgjë nuk është armiqësore për shqiptarët, ndonëse ky mision nuk është se është pasqyruar në emisionet e transmetuara. Në fund, ai i shqetësuar tregon se kush është ajo që i bënë “luftë” përshtypjeve të mira që Mustafa Nano ka për serbët.

“Aktualisht është çështja e Kosovës që na ndan, asgjë tjetër. Ndërsa dallimet e tjera, sikurse thashë, janë normale”.

Që askush ndër shqiptarë nuk e lexon letërkëmbimin Panoviç-Nano këtë nuk e ka diskutuar njeri, por që nuk e lexon as vetë Mustafa Nano, ky është trishtim. Trishtim aq i madh sa ky mos lexim prodhoi edhe kësi lloj broçkullash:

“Jam përpjekur të jem kritik ndaj veseve shqiptare, defekteve shqiptare, çështjeve shqiptare. Zoran Panoviç po bën të njëjtën gjë dhe kështu ai po informon opinionin shqiptar me çështjet serbe. Ndërsa unë po bëj të kundërtën, po informoj serbët, po përpiqem t’u tregoj atyre kush janë shqiptarët. Kur vjen çështje tek besimi fetar, ne jemi ballkanas, jemi pak të relaksuar, nuk shqetësohemi aq shumë sikurse ndodh me të tjerë diku tjetër. Kështu unë gjej më shumë të përbashkëta se sa dallime. Kjo është diçka që unë nuk e dëgjoj, nuk dëgjoj persona të tjerë që të thonë të njëjtën gjë dhe nuk e di pse”, tha Nano duke mos e pas të qartë se në letërkëmbimin në fjalë, vërtetë Nano është kritik ndaj veseve shqiptare por jo edhe letërkëmbyesi i tij ndaj serbëve, sepse ai thjeshtë rrëfen se kush janë serbët dhe çfarë mendojnë për shqiptarët.

Për të konfirmuar edhe arsyen pse në tryeza të tilla ftohen injorantë të kalibrit, Mustafa Nano rrëfeu edhe përjetimin e tij nga vizita e fundit në Beograd, kur kishte ndaluar në  Preshevë. Ishte tronditur Mustafa Nano se ka shqiptarë që jetojnë në Luginën e Preshevës dhe mendjen e kanë në Tiranë e Prishtinë dhe jo në Beograd, dhe futi në një çështje edhe serbët që jetojnë në Mitrovicë dhe mbajnë sytë nga Beogradi ashtu si edhe minoritetin grek që jeton në Shqipëri dhe janë të lidhur me Athinën. Dhe jo vetëm kaq!

Nga Beogradi i tij i dashur i bëri thirrje kryeministrit të tij:

“Dua që Edi Rama të vijë dhe t’u thotë këtyre njerëzve, dëgjoni ju jeni këtu, jeni pjesë e Serbisë dhe do të jeni këtu gjithë kohën. Pra, bëni më të mirën, integrohuni këtu, në këtë botë. Harojeni Tiranën, domethënë, jeni shqiptarë, flisni shqip, duhet të ruani identitetin tuaj dhe duhet të jeni të informuar se çfarë ndodh në Tiranë dhe Prishtinë. Por, ju jeni këtu, jeni pjesë e botës serbe, jetoni këtu. Këto lloji mesazhi dua nga Edi Rama dhe presidenti Vuçiç dhe politikanë të tjerë në Ballkan. Dua që të shpërndajnë këtë lloji mesazhi. Por nuk i shikoj që ta bëjnë këtë”, përfundoi fjalën e tij Mustafa Nano, duke shpëtuar të pranishmit që nuk po e kutponin dot botën e këtij njeriu të cilit i pengon shqiptari nga Presheva që mbanë sytë nga Tirana e Prishtina, sepse serbët, jo vetëm ata që ai thotë se i njehë, por si ata të pranishëm në Konferencë  ashtu edhe në Sidney e Chicago, Selanik dhe Vjenë, Republika Srpska e Malt të Zi, Kosovë e Maqedoni,  jo vetëm që mbajnë kokën nga Beogradi, por zbatojnë çdo urdhër që vjenë nga Presidenti i Serbisë.

Konferenca ndërkombëtare “Serbët dhe shqiptarët – Në cilin drejtim?”, përfundoi ashtu siç ishte parashikuar nga organizatorët, agjencitë e lajmeve TANJUG  dhe ATSH, të mos thuhet asgjë në mënyrë që të organizojnë takimin e radhës.