Tërmet në Rumani, lëkundjet e tokës ndihen edhe në Kosovë

Sot rreth orës 14:20 janë ndier lëkundje të tokës në Kosovë. Qendra Mesdhetare Sizmologjike, EMSC, raporton se epiqendra e tërmetit i cili ra në orë 14:16, me mangitudë 5.5 të shkallës Rihter dhe thellësi 40 kilometra, ishte 5 kilometra nga Tismani në Rumani.

EMSC raporton se lëkundjet e këtij tërmeti të fuqishëm janë ndier edhe në disa vende të rajonit.

Pas këtyre lëkundjeve të tokës ka reaguar Shemsi Mustafa nga Rrjeti Sizmologjik i Kosovës duke i qetësuar qytetarët se nuk kishte tërmet.

“Ju lutemi. Mos të krijohet panik tek qytetarët, me tituj me të dhëna jo të sakta. Në Kosovë nuk kishte tërmet. Tërmeti ka goditur në Rumani, por për shkak të fuqisë dhe energjisë se liruar dhe përhapjes nëpër mjet valëve sizmike kap distancë deri 500km,” shprehet Mustafa në reagimin e tij përmes rrjetit social Facebook.

Ndryshe, pas goditjes kryesore me magnitudë 5.5 të shkallës Rihter, EMSC raporton për disa pasgoditje që variojnë nga 3.5-39 të shkallës Rihter ku e fundit u regjistrua në orën 14:29 ishte me magnitudë 3.5 të shkallës Rihter dhe thellësi 5 km.