Me Presidentin Begaj, Osmani: Koordinim dhe harmonizim të politikës jashtme me Shqipërinë

Nevojë për koordinim dhe harmonizim të mëtejmë, veçanërisht në politikën e jashtme, theksoi Presidentja e Kosovës, Vjosa Osmani, pas takimimit me Presidentin e Republikës së Shqipërisë, Bajram Begaj, ndërsa shtoi se Shqipëria duhet të jetë zë i fuqishëm i Kosovës në institucionet ku aktualisht Kosova nuk ka përfaqësim.

Presidenti Begaj, nga ana e tij, ka uruar Presidenten Vjosa Osmani dhe qytetarët e Kosovës për 15-vjetorin e pavarësisë ndërsa ka theksuar se Shqipëria do të jetë vazhdimisht në krah të Kosovës duke kontribuar në fuqizimin e pozitës ndërkombëtare të saj.

Ndërkaq Presidentja Osmani, ka theksuar se Kosova po e kremton 15-vjetorin e shtetësisë së saj në përballje me sfida, por e vendosur për të ecur përpara në forcimin e shtetit dhe e përkushtuar në rrugëtimin euroatlantik.

“Në këtë 15-vjetor të pavarësisë kujtojmë me respekt të gjithë ata që kontribuuan për lirinë, pavarësinë dhe shtetndërtimin, që nga arkitekti i shtetit të Kosovës, presidenti historik, Dr.Ibrahim Rugova e deri te vajzat e djemtë e UÇK-së, të udhëhequr nga komandanti legjendar Adem Jashari, shumë nga të cilët ranë heroikisht për lirinë dhe Republikën,” tha Presidentja Vjosa Osmani.

Marrëdhëniet ndërmjet Kosovës dhe Shqipërisë, nga të dy presidentët u vlerësuan jo vetëm miqësore, por vëllazërore, ndaj u zotuan se do të angazhohen për intensifikim të tyre.

Të dy presidentët theksuan se Kosova e Shqipëria janë bashkërisht të angazhuara dhe të përkushtuara në mbrojtjen e demokracisë, paqes dhe lirisë dhe se stabiliteti i rajonit është jetik në mënyrë që të dy shtetet të vazhdojnë rrugëtimin evropian.

Ndryshe, Presidenti i Republikës së Shqipërisë, Bajram Begaj, po qëndron në Prishtinë ku do të marrë pjesë në kremtimin e 15-vjetorit të Pavarësisë së Kosovës.