Video/ 23 vjetori i Masakrës së Srebrenicës: Turp për njerëzimin

Përkujtohen viktimat e Masakrës së Srebrenicës. Në qendrën memoriale në Potoçari sot u varrosën edhe 35 viktimat të gjenocidit dhe u mbajt një mbledhje komemorative me rastin e 23 vjetorit të tragjedisë në Srebrenicë.

Sekretari amerikan i Shtetit, Mike Pompeo tha se SHBA është me popullin e Bosnje Hercegovinës. “Nuk do të harrojmë ata që nuk janë më. Nderojmë viktimat e gjenocidit,” tha Pompeo.

Ndërkohë Përfaqësuesja e lartë për Politikë të Jashtme dhe Siguri pranë Bashkimit Evropian, Federica Mohgerini dhe Komisioneri për Zgjerimin e BE, Johanes Hahn përmes një deklarate të përbashkët theksojnë se detyra e Evropës dhe bashkësisë ndërkombëtare është që të kujtojë se tragjedi të tilla, turp për njerëzimin më nuk duhet të ndodhin.

“Në ditën e shënimit të 23 vjetorit të masakrës mendimet tona janë me familjet që kanë vuajtur dhe kanë humbur familajrët. Detyra e Evropës dhe bashkësisë ndërkombëtare është që të kujtojë se tragjedi të tilla, turp për njerëzimin më nuk duhet të ndodhin”, theksojnë Mohgerini dhe Hahn.

Njëzetetre vjet më parë, forcat serbe vranë mbi 8 mijë myslimanë në Srebrenicë të Bosnje dhe Hercegovinës. Kjo masakër u cilësua si akti më i keq i gjenocidit në Evropë që nga Lufta e Dytë Botërore.