Investimet e biznesit në makineri dhe pajisje 455 mln euro, më të ulëtat që nga viti 2010

Megjithëse emergjenca në tregun e punës po ushtron presion mbi rritjen e investimeve në automatizimin, të dhënat zyrtare tregojnë se shpenzimet e bizneseve për makineri dhe pajisje kanë ardhur me ulje në vitin 2021.

Sipas të dhënave të INSTAT të gjitha sipërmarrjet në sektorin e prodhimit dhe shërbimeve raportuan në tatime 53.3 miliardë lekë (455 mln euro) shpenzime për blerjen e makinerive dhe pajisjeve. Këto shpenzime ishin 21 për qind më të ulëta se në vitin 2020 dhe gjithashtu ishin në nivelin më të ulet që nga viti 2010.

Megjithëse se disa sektorë të industrisë si ajo e veshjeve dhe këpucëve dhe industria ushqimore raportuan se po rrisin investimet në blerjen e makinerive dhe pajisjeve për të zbutur efektin e reduktimit të fuqisë punëtore, të dhënat zyrtare tregojnë të kundërtën.

Rënia e investimeve në këtë zë të rëndësishëm të biznesit po tregon se, ekonomia e vendit nuk po orientohet drejt produktivitetit dhe një modeli që tenton të udhëhiqet nga novacioni.

Nga të dhënat e INSTAT shihet se gjatë dekadës së fundit investimet më të mëdha në teknologji, makineri dhe pajisje ishin në vitin 2014 me rreth 101 miliardë lekë dhe në vitin 2017 me rreth 96 miliardë lekë.

Rënia e investime në këtë zë lidhet me përfundimit e disa investimeve në të mëdha në energjetike. Të dhëna më të detajuara tregojnë se shpenzimet për makineri dhe pajisje në kompanitë me aktivitet në sektorin e energjisë elektrike shënuan rënie vjetore me 45 % në vitin 2021. Sektori i energjisë është i katërti për investimet e larta në mekanizim pas sektorit të tregtisë, ndërtimit dhe telekomunikacionit.

Tregtia me shumicë është sektori me investimet më të mëdha në makineri dhe pajisje me 8,7 miliardë lekë në vitin 2021, me rënie vjetore 12% në vitin 2021. Sektori i tregtisë po vuan rënien e konsumit nga reduktimi i popullsisë dhe strukturimit të biznesit drejt njësive të mëdha të biznesit.

Sektori i ndërtimit renditet i dyti për investimet e larta në makineri dhe pajisje me rreth 5,5 miliardë lekë në vitin 2021 me rënie vjetore 26.7%, ndërsa në telekomunikacion rënia ishte 14%.

Bizneset në të gjithë sektorët i rritën investimet në makineri dhe pajisje gjatë vitit 2020 për të amortizuar mungesat në punonjës që u krijuan nga pandemia Covid-19 si pasojë e kufizimeve në lëvizje./Monitor/